Evvan 20 - Skolt Koltta Gospel of John 1988

Isõs kåccai jieʹlled

¹ Ääiʹjeld pâʹsspeeiʹv tueʹlää, ko leäi veâl seuʹnnjed, Magdaala Mäʹrjj pueʹđi ääuʹd årra da vuâmmši, što ǩeäʹdǧǧ, kååʹtt leäi ääuʹd uus ooudâst, leäi sirddum nuuʹbb sâjja.

² Son uurči Semman Pietar årra da tõn nuuʹbb mättʼtõspäärna, koon Isõs räʹǩsti, årra. Son cieʹlǩi: «Šurr lij vikkum meädda ääuʹdest, jeäʹp-ǥa tieʹđ, koozz son lij pijjum.»

³ Pietar da tõt nuʹbb mättʼtõspäärnaž vuõʹlǧǧe tâʹlles ääuʹd ǩiččâd.

⁴ Suäna uʹrčče palddlõõžži, leša tät nuʹbb leäi jåʹttlab ko Pietar da ǩiõrggni ooudbeäʹlnn ääuʹd årra.

⁵ Son kuâbsti sizz da vuõiʹni leeiʹnid, leša ij mõõnnâm sizz.

⁶ Suu mââibeäʹlnn pueʹđi Semman Pietar da mõõni äudda. Tåʹben son vuõiʹni kaarrâmleeiʹnid.

⁷ Piustõkleiʹnn, mii leäi leämmaš Isõõzz vueiʹvest, iʹlleämmaž kaarrâmleeiʹni seʹst, tõt leäi šnååppast jeeʹres sââʹjest.

⁸ Tâʹl tõt nuʹbb mättʼtõspäärnaž, kååʹtt leäi puättam ooudbeäʹlnn ääuʹd luzz, mõõni še sizz da vuõiʹni puk da ååskai.

⁹ Tâʹl ij suännast ni kuäbbaž fiʹttjam Pââʹss ǩeeʹrj sääʹn tõʹst, što son kåccjeʹčči jaaʹmmjest.

¹⁰ Mättʼtõspäärna mõʹnne väʹst põrttseez.

Isõs čuäʹjtââtt Magdaala Märjja

¹¹ Mäʹrjj čueǯǯai ääuʹd uus ooudâst da reäǥǥai. Reäǥǥeeʹl son kuâbsti äudda,

¹² leša son vuõiʹni kuõʹhtt viõʹlǧǧespiiutâsaʹŋǧǧel išttâd åårrmen tõʹst, koʹst Isõõzz råʹpp leäi leämmaž, nuʹbb vueiʹvvrõõžžâst, nuʹbb jueʹlǧǧrõõžžâst. Aʹŋǧǧel cieʹlǩǩe Märjja:

¹³ «Mâiʹd reäǥǥak, kaav?» Son vaʹsttii: «Šurr lij vikkum meädda, jiõm-ǥa tieʹđ, koozz.»

¹⁴ Tõn-a ko cieʹlǩi, son jåårǥli da vuõiʹni Isõõzz čueǯǯam sieʹljstes, leša ij tobddâm tän.

¹⁵ Isõs cieʹlǩi suʹnne: «Mâiʹd reäǥǥak, kaav? Ǩeän ooʒʒak?» Mäʹrjj juuʹrdi suu šâddhåiddjeejan da cieʹlǩi: «Šurr, jõs ton leäk viikkâm suu meädda, de säärn, koozz leäk suu piijjâm. Mon viiǯǯam suu meädda.»

¹⁶ Isõs cieʹlǩi: «Mäʹrjj!» Mäʹrjj jåårǥli da cieʹlǩi: «Rabbuuni!». Hebreaǩiõʹlle tõt šâdd: uʹčteeʹl.

¹⁷ Isõs cieʹlǩi: «Lueʹšt muu. Jiõm leäkku veâl mõõnnâm Eččan årra. Mõõn särnnad viilljään, što mõõnam Eččan da Vuâsppåådan, tij Eeʹjjed da tij Vuâsppååʹded årra.»

¹⁸ Magdaala Mäʹrjj mõõni da mainsti mättʼtõspäärnaid, što son leäi vuäinnam Šuur, da mâiʹd Šurr leäi suʹnne mainstam.

Isõs čuäʹjtââtt mättʼtõspäärnees

¹⁹ Mâʹŋŋeld seämma pâʹsspeeiʹv jeäʹǩǩää mättʼtõspäärna leʹjje noorõõttâm õõutsâjja lokkuusi tuâkka, tõn diõtt ko sij põʹlle juudlažniiʹǩǩin. Isõs pueʹđi, čueǯǯai sij kõõskâst da cieʹlǩi: «Rääuh tiʹjjid.»

²⁰ De son čuäʹjti ǩiõđees da jieʹrtes. Mättʼtõspäärna räʹmmvuõʹtte, ko vuõiʹnne Šuurâz.

²¹ Isõs cieʹlǩi oʹđđest: «Rääuh tiʹjjid! Nuʹt še mäʹhtt Eʹčč lij vuõlttääm muu, vuõlttääm mon še tiʹjjid.»

²² Tän ko cieʹlǩi, son pååzzai sij ool da jueʹtǩi: «Väʹldded Pââʹss Jiõgg.

²³ Ǩeän rieʹǩǩid tij uʹvddveʹted proʹsttjõõzz, vuäǯǯ tõiʹd proʹsttjõõzz. Ǩeäʹst tij proʹsttjõõzz ǩieʹlddveʹted, ij vuäǯǯ rieʹǩǩees proʹsttjõõzz.»

Fooma pannåskk

²⁴ Fooma, koon cieʹlǩǩeš Juuʹmǩen da kååʹtt leäi õhtt tõn kuâtmlåkksest, iʹlleämmaž tõʹst, ko Isõs pueʹđi.

²⁵ Jeeʹres mättʼtõspäärna mainste suʹnne: «Mij vuõiʹnim Šuur.» Fooma vaʹsttii: «Jiõm kâʹl ååsk, ouʹddelgo vuäinam näuʹllsõõʹjid suu ǩiõđin da piijam suõrmman tõiʹd sõõʹjid da vuäǯǯam piijjâd ǩiõttan suu jeärtta.»

²⁶ Nieʹttel ǩeeʹjjest mättʼtõspäärna leʹjje eʹpet õõutsââʹjest, da ååʹn leäi Fooma še. Uus leʹjje lookkâst, leša Isõs pueʹđi sizz, čueǯǯai sij kõõskâst da cieʹlǩi siʹjjid: «Rääuh tiʹjjid!»

²⁷ Da son cieʹlǩi Fooma: «Piij ååʹn suõrmad tääzz da ǩiõčč ǩiõđään da piij ǩiõđad jeärttsan. Jeäʹl leäkku pannååskast, naǥa ååsk.»

²⁸ Fooma vaʹsttii: «Šurram, Vuâsppåådam!»

²⁹ Isõs cieʹlǩi: «Ton ååskak tõn diõtt, ko vuõiʹnniǩ. Leklva liâ tõk, kook åskka, håʹt-i jiâ vueiʹn!»

Mõõzz Ǩeʹrjj lij ǩeeʹrjtum

³⁰ Isõs tuejjii mättʼtõspäärnees poodd määŋgaid jeeʹresnallšem õõmâstuâjaid, leša tõk jiâ leäkku ǩeeʹrjtum tän ǩeârjja.

³¹ Tät puk lij ǩeeʹrjtum tõn diõtt, što tij ååskčid, što Isõs lij Messias, Vuâsppååʹd Päʹrnn, da teeʹst leʹčči jieʹllem, ko åskkveʹted suu.