Evvan 2 - Skolt Koltta Gospel of John 1988

Näimm Kaanast

¹ Koolm peeiʹv ǩeeʹjjest leäi näimm Galilea Kaanast. Isõõzz jeäʹnn še leäi tåʹben.

² Isõs da suu mättʼtõspäärna še leʹjje koččum naimmu.

³ Ko vijnn puuđi, ceälkk Isõõzz jeäʹnn suʹnne: «Seeʹst iʹlla teäʹnab vijnn.»

⁴ Isõs ceälkk jeännses: «Mâiʹd ton täättak muʹst, kaav? Muu äiʹǧǧ iʹlla veâl puättam.»

⁵ Jeäʹnnes ceälkk pävvrõõžžjid: «Tuejjeʹǩed puk, mâiʹd son päkk.»

⁶ Tåʹben leʹjje kutt čueʹđ lettar ǩieʹssi ǩeäʹdǧǧleeʹtt, koiʹd juudlažneeʹǩǩ vueʹjjez mieʹldd âʹnne põõzzõõttâm diõtt.

⁷ Isõs cieʹlǩi pävvrõõžžjid: «Teuʹdded liiʹttid čaaʹʒʒin.» Sij tiuʹdde tõiʹd ruõbdi tässa.

⁸ Isõs cieʹlǩi siʹjjid: «Kuäivvad ååʹn täʹst da viikkâd kuuččra.» Di sij viʹǩǩe.

⁹ Kuuččâr njõõʹddi čääʹʒʒ, kååʹtt leäi mottjam viin smakkân. Pävvrõõžži, kook leʹjje čääʹʒʒ kuäivvam, tiõʹtte, koʹst vijnn leäi puättam, leša kuuččâr ij teâttam. Tõn diõtt son kååččai vuõddâm da cieʹlǩi:

¹⁰ «Juâkksaž oudd kuõʹssid vuõššân šiõǥǥ viin, da mâŋŋa, ko sij liâ vuäivvõõttâm, eman hueʹnab, leša ton leäk šeäšttam šiõǥǥ viin mââimõssân.»

¹¹ Tän vuõssmõs õõmâstuâjas Isõs tuejjii Galilea Kaanast da čõõđti čuõvvâdvuõđâs, da suu mättʼtõspäärna oskku suu.

¹² Mâŋŋa tõʹst Isõs mõõni vuâlas Kapernauʹmme, son da suu jeäʹnnes, viilljâs da Suu mättʼtõspäärna; tåʹben jiâ jaukkâm kâʹll peeiʹv.

Isõs puuʹttast ceerkav

¹³ Tâʹl juudlažniiʹǩǩi eʹjjpeiʹvv leäi ââlda. Isõs mõõni pââjas Jerusaaʹlma.

¹⁴ Nuʹt Son kaauni teʹmpplest åummaid, kook leʹjje kaaupšeʹmmen vuâusaid, saauʒid da looʹddid, da teäʹǧǧvaajteeʹjid åårrmen påʹrddpeällsin.

¹⁵ Son raaji nuõʹrin rääiʹp, vuâjti åålǥas teʹmpplest siʹjjid pukid saauʒeezvuiʹm, vuâuseezvuiʹm, seksti låʹnsteeʹji tieʹǧǧid jânnma, oiʹǧǧii sij pooʹrdid kåmmad.

¹⁶ Son cieʹlǩi looʹddi kaaupšeeʹjid: «Viikkâd lååddaid åålǥas, jeäʹlled rajju muu Eeʹjj põõrtâst kauppsââʹj.»

¹⁷ Tâʹl Suu mättʼtõspäärna muʹštte, što lij ǩeeʹrjtum: «Pueʹššvuõtt tuu põõrtad peäʹlest peʹcclâtt muu.»

¹⁸ Juudlažneeʹǩǩ kõʹčče Isõõzzâst: «Måkam miârk čuäʹjtak miʹjjid tuõđštõssân tõʹst, što tuʹst lij vuõiggâdvuõtt tuejjeed nääiʹt?»

¹⁹ Isõs cieʹlǩi siʹjjid: «Pieʹđjteʹǩed tän teʹmppel, mon tõn kolmmân peeiʹvest ciâggtam oʹđđest.»

²⁰ Tâʹl juudlažneeʹǩǩ cieʹlǩǩe: «Tän teʹmppel tuejjumuš piiʹšti meeʹst nelljlokutt eeʹǩǩed, da ton ciâggteʹččiǩ tõn kolmmân peeiʹvest oʹđđest?»

²¹ Leša Isõs nõõmti teʹmpplen jiijjâs rååʹppes.

²² Ko Son mårrni jaaʹmmjest, mättʼtõspäärna muʹštte Suu ceäʹlǩǩem nääiʹt. Sij oskku Pââʹss ǩeeʹrj ǩeeʹrjtõõzzid da Isõõzz jiijjâs sänna.

Isõs tåbdd pukid

²³ Ko Isõs leäi Jerusaaʹlmest eʹjjpeeiʹv ääiʹj, määŋgas ko vuõiʹnne suu, oskku suu õõmâstuâjaid, koiʹd son tuejjii.

²⁴ Isõs ij sami veârram jiijjâs siʹjjid, ko toobdi siʹjjid pukid

²⁵ Isõs ij taarbšam ni ǩeän tuõđštõõzz oummust. Tõn son tiõʹđi jiõčč, mii ooumaž lij.