Evvan 15 - Skolt Koltta Gospel of John 1988

Vijnnmuõr da tõn ååuʹs

¹ «Mon leäm tuõđi vijnnmuõrr, da Eččam lij muõrršõddeeja.

² Son kärss muʹst meädda puk oouʹsid, koin jiâ šõõdd šââdd, leša puuʹttast oouʹsid, kook liâ šââddaid tiudd, što tõk pooutče veâl jeäʹnab.

³ Muu säännam lij juʹn puʹtstam tiʹjjid.

⁴ Põõššâd tij muʹst, tâʹl mon põõžžam teeʹst. Ko åʹhss ij põõžž vijnnmuõrâst, tõt ij vueiʹt kueʹdded šââddaid. Seämma tij še jeäʹped pââʹst šõddeed šââdd, jõs jeäʹped põõžž muʹst.

⁵ Mon leäm vijnnmuõrr, tij leäʹped ååuʹs. Tõt, kååʹtt pââšš muʹst da ǩeäʹst mon põõžžam, tõt pohtt jiânnai šââddaid. Muutää tij jeäʹped vueiʹt tuejjeed ni mâiʹd.

⁶ Kååʹtt ij muʹst põõžž, suu suõʹppjet meädda mâʹte ååuʹs, da nuʹt son kåškk; kåʹšǩǩoouʹsid noorât da suõʹppjet toʹlle, da tåk tõk pueʹlle.

⁷ Ko tij põõššveʹted muʹst, tâʹl muu säännan pâʹšše teeʹst, da tij vuäǯǯveʹted muʹst puk, mâiʹd juʹn raukkveʹted.

⁸ Ko tij puʹhttveʹted jiânâs šââdd da šõddveʹted muu mättʼtõspäärnžen, Eččam vuäǯǯ tõʹst ciist.

⁹ Nuʹt mäʹhtt Eʹčč lij räʹǩstam muu, nuʹt mon še leäm räʹǩstam tiʹjjid; põõššâd muu räʹǩsvuõđstan.

¹⁰ Tij ko jäkktõõllveʹted muu päkkmuužžään, tij põõššveʹted muu räʹǩsvuõđstan, nuʹt mäʹhtt mon leäm jäkktõõllâm Eččan päkkmuužžid da põõžžam suu räʹǩsvuõđstes.

¹¹ Leäm mainstam nääiʹt, što vuäǯǯčem rämmšed tij diõtt da tij še vuäǯǯčid rämmšed tiuddsest.

¹² Mon pääkkam tiʹjjid räʹǩsted kueiʹmm kueiʹmed nuʹt, mäʹhtt mon še leäm räʹǩstam tiʹjjid.

¹³ Tõn šoorab räʹǩsvuõđ ij ni ǩii vueiʹt čuäʹjted, ko tõn što son oudd jiõggâs naʹzvaanees peäʹlest.

¹⁴ Ko tij jäkktõõllveʹted muu päkkmuužžään, leäʹped muu naʹzvaan.

¹⁵ Jiõm cieʹlǩ tiʹjjid teäʹnab kääzzǩen, tâʹl kääzzaǩ ij tieʹđ, mâiʹd suu eeʹžžed tuejjad; kååččam tiʹjjid naʹzvaanân, tâʹl leäm teâđtam tiʹjjid puk, mâiʹd leäm kuullâm Eʹjstan.

¹⁶ Tij jeäʹped vaʹlljääm muu, pâi mon vaʹlljeem tiʹjjid. Pakkum tiʹjjid mõõnnâd da šõddeed šââdd, kååʹtt pââšš. Tâʹl Eʹčč oudd tiʹjjid puk, mõõn suʹst muu nõõmâst äännveʹted.

¹⁷ Nääiʹt mon pääkkam tiʹjjid: räʹǩsteʹǩed kueiʹmm kueiʹmed.»

Maaiʹlm vâjjad Isõõzz oummid

¹⁸ «Ko maaiʹlm vâjjad tiʹjjid, muʹštted, što tõt lij ouddâl tij vâjjääm muu.

¹⁹ Ko tij kuulčid maaiʹlme, maaiʹlm räʹǩsteʹčči tiʹjjid mâʹte jiijjâs. Leša tij jeäʹped kuul maaiʹlme, pâi mon vaʹlljeem tiʹjjid tõn kõõskâst. Tõn diõtt maaiʹlm vâjjad tiʹjjid.

²⁰ Muʹštted, mâiʹd cieʹlǩǩem tiʹjjid: ’Ij kääzzaǩ leäkku eeʹžždes šoorab’. Ko muu leät vâjjääm, vâjjeet tiʹjjid še. Ko oummu liâ jäkktõõllâm muu saaʹnään, sij jäkktâʹlle tiʹjjid še.

²¹ Puk tän sij tuejjee tiʹjjid muu diõtt, tõn diõtt ko sij jiâ toobd suu, kååʹtt lij muu vuõlttääm.

²² Mon ko jiõm leʹčče puättam da mainstam siʹjjid, sij jiâ leʹčče viõrrlam reäkka. Leša ååʹn sij jiâ vueiʹt rieʹǩǩin peälštõõttâd.

²³ Kååʹtt vâjjad muu, vâjjad še Eččan.

²⁴ Ko jiõm leʹčče tuejjääm tij kõõskâst nåkmid tuâjaid, koid iʹlla ni kuäʹss ni ǩii tuejjääm, tâʹl sij jiâ leʹčče viõrrlam reäkka. Leša ååʹn sij liâ vuäinnam tuâjään da sij vâjjee muu da Eččan.

²⁵ Nääiʹt šâdd tuõttân sij lääʹjjez sääʹnn: ’Sij vâjjee muu veäʹrtää’.

²⁶ Mon vuõlttääm tiʹjjid Vieʹǩǩteeja, tuõđšvuõđ Jiõgg, kååʹtt vuâlgg Eeʹjj åʹrnn. Son puätt da tuõđašt muʹst.

²⁷ Tij še tuõđšteʹped muʹst, tõn diõtt ko tij leäʹped aalǥâst juʹn leämmaž muin õõutsââʹjest.»