Evvan 14 - Skolt Koltta Gospel of John 1988

Isõs lij čuâǥǥas Eeʹjj årra

¹ «Jeälas tij čâđđmeed peʹcclõššu. Åskkad Vuâsppååʹd da åskkad muu.

² Muu eeʹjj pääiʹǩest liâ mäŋgg jieʹllemsââʹj. Ko ij nuʹt leʹčče, ceälkčem-a mon tiʹjjid, što mon mõõnam valmšted tiʹjjid sââʹj?

³ Håʹt mon mõõnam valmšted tiʹjjid sââʹj, puäđam mon väʹst da vääldam tiʹjjid årrsan, što tij še leʹččid tåʹben, koʹst mon leäm.

⁴ Tij tâʹl tobddveʹted čuõkku, kååʹtt veekk tåk, koozz mon mõõnam.»

⁵ Fooma cieʹlǩi: «Šurr, mij jeäʹp tieʹđ, koozz ton mõõnak; mäʹhtt tâʹl teâđčep čuõkku?»

⁶ Isõs vaʹsttii: «Mon leäm čuâǥǥas, tuõđšvuõtt da jieʹllem; jeeʹresnalla ij ni ǩii piâzz Eeʹjj årra.

⁷ Jõs tij toobdčid muu, toobdčid še muu Eččan. Täʹst ooudâs tij tobddveʹted suu: tij leäʹped vuäinnam suu.»

⁸ Iʹllep cieʹlǩi: «Šurr, čuäʹjet miʹjjid Eeʹjj. Tõt lij nokk miʹjjid.»

⁹ Isõs vaʹsttii: «Jiõk-a ton toobd muu, Iʹllep, håʹt mon leäm leämmaž nääiʹt kuuʹǩǩ tijvuiʹm? Kååʹtt lij vuäinnam muu, lij vuäinnam Eeʹjj. Mäʹhtt vuäitak ceäʹlǩǩed: ’Čuäʹjet miʹjjid Eeʹjj’?

¹⁰ Jiõk-a ton ååsk, što mon leäm Eeʹjjest da Eʹčč lij muʹst? Jiõm mon maainâst jiõččan jurddjään, leša Eʹčč lij muʹst da reâugg muu pääiʹǩ.

¹¹ Åskkad, što mon leäm Eeʹjjest da Eʹčč lij muʹst. Leša ko jeäʹped ååsk, åskkad muu tuâjään diõtt.

¹² Tuõđi, tuõđi mon ceälkam tiʹjjid: kååʹtt åskk muu, son pâstt tuõđi tuejjeed tõn, mõõn mon še, da jeäʹnab veâl, tõn diõtt ko mon mõõnam väʹst Eččan årra.

¹³ Puk mâiʹd tij äännveʹted muʹst muu nõmstan, mon tuejjääm, što Eʹčč vuäǯǯči ciist Pääʹrnes diõtt.

¹⁴ Jõs tij äännveʹted muʹst mâiʹd-ne muu nõmstan, mon ooudam tõn tiʹjjid.»

Isõs låʹppad Pââʹss Jiõgg

¹⁵ «Ko tij räʹǩsteʹped muu, tij jäkktõõllveʹted muu päkkmuužžään.

¹⁶ Mon raaukam, što Eʹčč oudd tiʹjjid nuuʹbb Vieʹǩǩteeja, kååʹtt lij âʹǩǩpââjas tijvuiʹm,

¹⁷ tuõđšvuõđ Jiõgg, koon maaiʹlm ij vueiʹt väʹldded vuâstta. Tõt ij vueiʹn ij ni toobd suu; tij tobddveʹted suu, tõn diõtt ko son pääcc årrseed da jeälast teeʹst.

¹⁸ Jiõm mon kueʹđ tiʹjjid vuärbbsen, pâi puäđam årrseed.

¹⁹ Siõmmna ääiʹj ǩeeʹjjest maaiʹlm ij teäʹnab vueiʹn muu, leša tij vueiʹnnveʹted. Ko mon jeälam, tij še vuäǯǯveʹted jieʹlled.

²⁰ Tõn peeiʹv tij fiʹttjeʹped, što mon leäm Eʹjstan da tij leäʹped muʹst da mon teeʹst.

²¹ Tõt, kååʹtt jäkktââll muu päkkmuužžään, rääʹǩǩast muu. Muu Eʹčč rääʹǩǩast tõn, kååʹtt rääʹǩǩast muu. Mon še räʹǩstam suu da iʹlmmtam jiõččan suʹnne.»

²² Juudas — ij Iskariot, leša tõt nuʹbb — cieʹlǩi: «Mõõn diõtt, Šurr, ton iʹlmmtak jiijjad miʹjjid jiõk-ǥa maaiʹlme?»

²³ Isõs vaʹsttii da cieʹlǩi suʹnne: «Kååʹtt-ne ko rääʹǩǩast muu, son jäkktââll saaʹnään. Muu Eččam rääʹǩǩast suu, da Eʹčč da mon pueʹttep suu årrses da jeälstep suu åʹrnn.

²⁴ Kååʹtt ij rääʹǩǩest muu, ij jäkktõõl saaʹnään. Tät iʹlla jiõččan mainstumuš, pâi Eeʹjj, kååʹtt lij muu vuõlttääm.

²⁵ Leäm mainstam tän tiʹjjid ååʹn, ko veâl leäm tijvuiʹm õõutsââʹjest.

²⁶ Leša Vieʹǩǩteeja, Pââʹss Jiõgg, koon Eʹčč vuõlttad muu nõmstan, mättat tiʹjjid puk da mošttat puk, mâiʹd leäm mainstam.

²⁷ Mon kuâđam tiʹjjid rääuh. Ooudam tiʹjjid jiõččan rääuh, koon maaiʹlm ij vueiʹt uʹvdded. Jeälas tij čâđđmest leäkku peʹccel ij ni pââll.

²⁸ Tij kuulid, mâiʹd mon cieʹlǩǩem: ’Mon mõõnam meädda, leša puäđam mååusat årrseed’. Ko tij räʹǩsteʹččid muu, teeʹst leʹčči rämm tõʹst, što mon mõõnam Eččan årra, tõn diõtt, Eʹčč lij šoorab ko mon.

²⁹ Ååʹn leäm ceälkkam tän tiʹjjid ooudbeäʹlnn, što tij ååskčid, ko tõt šâdd tuõttân.

³⁰ Jiõm vueiʹt teäʹnab kuuʹǩǩab mainsted tijvuiʹm, ko tän maaiʹlm vääldlaž lij pueʹttmen. Muu ool suʹst iʹlla väʹldd.

³¹ Leša maaiʹlm âlgg vuäǯǯad tieʹtted, što mon räʹǩstam Eeʹjj da tuejjääm nuʹt, mäʹhtt son lij päkkam. Kaggõõttâd, vueʹlǧǧep tääiʹben.»