Evvan 13 - Skolt Koltta Gospel of John 1988

Isõs pââss mättʼtõspäärnees juõʹljid

¹ Leša ouddâl eʹjjpeeiʹv prääʹzneǩ Isõs tiõʹđi, što suu äiʹǧǧ leäi puättam da son mõõnči sõrgg tän maaiʹlmest Eeʹjjes årra. Son leäi räʹǩstam tõiʹd, kook maaiʹlmest leʹjje suu jiijjâs, da räʹǩsti siʹjjid loopp räjja.

² Isõs leäi mättʼtõspäärneesvuiʹm pričaašš väʹlddmen. Piârgglõk leäi maazzlâsttam Juudas Iskarioot, Semman pääʹrn ǩiõllâd suu.

³ Da Isõs tiõʹđi, što son leäi vuäǯǯam puk vääʹld Eʹjstes. Son tiõʹđi, što leäi puättam Vuâsppååʹd åʹrnn, da tiõʹđi, što mâânn väʹst Vuâsppååʹd årra.

⁴ De son kaggõõđi stuäʹlest da jaausčõõđi da čõõni uʹtreeʹnneǩ pirrses.

⁵ De son väälai čääʹʒʒ põõzzõõttâmnäppa da aaʹlji põõssâd mättʼtõspäärnees juõʹljid da koškkii tõin uʹtreeʹnnǩin, koon son leäi čõõnnâm pirrses.

⁶ De pueʹđi Semman Pietar puõtt, kååʹtt cieʹlǩi suʹnne: «Šurr, ton-ǥo põõzzak muu juõʹljid?»

⁷ Isõs vaʹsttii: «Ton jiõk fiʹtte, mâiʹd mon tuejjääm, leša õʹhttešt veâl fiʹttjak.»

⁸ Pietar cieʹlǩi suʹnne: «Ton jiõk ni kuäʹss vuäǯǯ põõssâd muu juõʹljään.» Isõs vaʹsttii suʹnne: «Jõs mon jiõm põõzz tuu, jiõk vueiʹt teäʹnab leeʹd muiʹn.»

⁹ Semman Pietar cieʹlǩi suʹnne: «Šurr, põõzz tâʹl še ǩiõđid da vueiʹv.»

¹⁰ Isõs cieʹlǩi suʹnne: «Kååʹtt lij läuggam, tõn ij taarbâž teäʹnab põõssâd ko juõʹljid, tâʹl son lij čeestai. Tij leäʹped čeestai, leša jeäʹped puk leäkku pottaz.»

¹¹ Isõs tiõʹđi, ǩii suu puätt ǩiõllâd. Tõn diõtt son cieʹlǩi, što puk jiâ leäkku pottaz.

¹² Ko Isõs leäi põõssâm seeʹst juõʹljid, son mõõni teâvõõttâd da maaʹcci väʹst stuälla da kõõjji seeʹst: «Fiʹttjeʹped-a, mâiʹd tuejjeem tiʹjjid?

¹³ Tij ceäʹlǩǩveʹted muu uʹčteeʹlen da Šurrân. Tuõđ ceäʹlǩǩveʹted, tõt mon leäm.

¹⁴ Ko mon, tij uʹčteeʹl da Šurr, leäm põõssâm tij juõʹljeed, feʹrttjeʹped tij še põõssâd kueiʹmm kueiʹmed juõʹljid.

¹⁵ Leäm čuäʹjtam, mäʹhtt mon tuejjääm. Tuejjeʹǩed tij seämmanalla, mäʹhtt mon leäm tuejjääm.

¹⁶ Tuõđi, tuõđi mon ceälkam tiʹjjid: iʹlla kääzzaǩ šoorab eeʹžždes ij-ǥa sääʹn viikki šoorab ko sääʹn vuõltteei.

¹⁷ Fiʹttjeʹped-a tän? Leäʹped sveâtai, ko tuejjeʹped tõn mieʹldd.

¹⁸ Jiõm mon maainâst teeʹst pukin: mon teâđam, ǩeäiʹd leäm vaʹlljääm. Leša tät Pââʹss ǩeeʹrj sääʹnn âlgg šõddâd tuõttân: ’Tõt, kååʹtt påårr muu leeiʹb, lij kaggõõttâm muu vuâstta.’

¹⁹ Ceälkam tän juʹn ouddâl ko tõt šâdd, što tij ååskčid, što mon leäm tõt, mii leäm.

²⁰ Tuõđi, tuõđi mon ceälkam tiʹjjid: tõt, kååʹtt väldd vuâstta tõn, koon mon vuõlttääm, väldd vuâstta muu; kååʹtt väldd vuâstta muu, väldd vuâstta suu, kååʹtt lij muu vuõlttääm.»

Isõs da Juudas

²¹ Ko Isõs leäi ceälkkam tän, õõʹʒʒi suʹnne peʹccel. Da son cieʹlǩi vuõiʹǧǧest: «Tuõđi, tuõđi mon ceälkam tiʹjjid: teeʹst lij õhtt, kååʹtt muu ǩeâll.»

²² Mättʼtõspäärna ǩiʹčče kueiʹmm kueiʹmez tieʹđkâni, ǩii seeʹst leʹčči tõt.

²³ Isõs luʹnn iišti mättʼtõspäärnaž, koon son räʹǩsti.

²⁴ Semman Pietar nuâkkši suʹnne da pääkkai kõõččâd Isõõzzâst, ǩii tõt lij, ǩeäʹst son mainsti.

²⁵ Tät mättʼtõspäärnaž nuäjjõõđi âʹlddlab Isõõzz da kõõjji: «Šurr, ǩii son lij?»

²⁶ Isõs vaʹsttii: «Mon lahttääm leeiʹb liõʹmme da ooudam tõn suʹnne.» Isõs lahttii leeiʹb liõʹmme da uuʹdi tõn Juudaʹsse, Semman Iskarioot pärnna.

²⁷ Ko Juudas leäi poorrâm leiʹbbkooska, mõõni suʹnne piârgglõk. Da Isõs cieʹlǩi suʹnne: «Tuejjad sõrgg tõn, mâiʹd joordak.»

²⁸ Ij ni ǩii jeärrsin fiʹttjam, mâiʹd Isõs cieʹlǩi.

²⁹ Jeärraz juʹrdde, što son vuõlttii Juudaazz vuäʹstted prääʹzneǩtarbbsid leʹbe pääkkai uʹvdded mâiʹd-ne väivvšid, ko Juudaazzâst leäi õhttsaž kåʹššel ââʹnnemnalla.

³⁰ Nuʹt Juudas poori tõn leiʹbbkooska da mõõni ǩirrsest åålǥas. Tâʹl leäi inn.

Ođđ päkkmuš

³¹ Juudas ko leäi mõõnnâm åålǥas, Isõs cieʹlǩi: «Ååʹn Oummu Päʹrnn lij ââʹluum čuõvvâdvuõʹtte da Vuâsppåʹd lij čuõvtum suʹst.

³² Vuâsppåʹd pââʹjad suu čuõvvâdvuõʹtte sami sõrgg.

³³ Rääʹǩǩes päärna, leäm tijvuiʹm veâl siõmmna ääiʹj. Tij ooccveʹted muu, leša ceälkam tiʹjjid seämmanalla ko juudlažniiʹǩǩid: tij jeäʹped vueiʹt pueʹtted tåk, koozz mon mõõnam.

³⁴ Pääkkam tiʹjjid oʹđđest: räʹǩsteʹǩed nuʹt kueiʹmm kueiʹmed, mäʹhtt mon leäm tiʹjjid räʹǩstam — što tij še räʹǩsteʹččid nuʹt kueiʹmed.

³⁵ Tõʹst puk tåʹbdde tiʹjjid muu mättʼtõspäärnžen, što tij räʹǩsteʹped kueiʹmed.»

Isõs da Pietar

³⁶ «Šurr, koozz ton mõõnak?», Semman Pietar kõõjji. Isõs vaʹsttii suʹnne: «Koozz mon mõõnam, tåk ton jiõk vueiʹt pueʹtted meâlddan, leša puäđak mâʹnnjlest.»

³⁷ Pietar cieʹlǩi suʹnne: «Šurr, mõõn diõtt jiõm vueiʹt pueʹtted tuu mieʹldd? Mon leäm vaalmâš håʹt jääʹmmed tuu ooudâst.»

³⁸ Isõs vaʹsttii: «Jäämak-a ton muu ooudâst? Tuõđi, tuõđi mon ceälkam tuʹnne: ouʹddelgo ååʹreskääʹnn läull, ton koolm vuâra ǩeâldak muu.»