Evvan 12 - Skolt Koltta Gospel of John 1988

Isõõzz vuõidât Betaniast

¹ Kutt peeiʹv ouddâl eʹjjpeeiʹv Isõs pueʹđi Betania gåårda, koʹst jeälsti Lasarõs, koon Isõs leäi counnâm jaaʹmmjest.

² Tåʹben Määrf kuâssti veärain Isõõzz, da Lasarõs leäi õhtt, kååʹtt leäi poorrmen suiʹn.

³ Mäʹrjj vaaʹldi pieʹllǩilo kaallšõs nardusvuõiddâz da pååusai Isõõzz juõʹljid da koškkii tõiʹd jiijjâs vuõptivuiʹm. Põʹrtte šõõddi tiiud vuõidâshaajj.

⁴ Tâʹl õhtt mättʼtõspäärnain, Juudas Iskariot, kååʹtt leäi Isõõzz õlmmsauʹvddi, kõõjji:

⁵ «Mõõn diõtt tän vuõiddâz jiâ kaaupšam? Tõʹst leäi vuäǯǯad kolmmčueʹđ denaarâd da tieʹǧǧid leäi vueiʹtted jueʹǩǩed vääivaš oummid.»

⁶ Leša ij Juudas vääivaš oummin perstam. Son cieʹlǩi nääiʹt tõn diõtt, ko leäi suõl; son leäi õhttsaž kåʹššel hoiʹddjeei, da tõʹst son vaaʹldi tieʹǧǧid jiijjâs taarbi diõtt.

⁷ Isõs cieʹlǩi: «Lueʹšt suu leeʹd. Uuʹd suu šeäʹštted tän muu jääʹmmempeeiʹv räjja.

⁸ Vääivaš oummu teeʹst liâ jueʹǩǩ poodd ââlda, leša mon jiõm leäkku.»

Lasarõs

⁹ Jõnn joukk juudlažneeʹǩǩ kuʹlle, što Isõs leäi Betaniast. De sij puõʹtte tåk, jiâ pâi Isõõzz diõtt, leša še Lasarõõzz diõtt, koon Isõs leäi counnâm jaaʹmmjest.

¹⁰ Tâʹl jõnnpaapp tattu kåʹdded Lasarõõzz še,

¹¹ tõn diõtt ko määŋgas juudlažneeʹǩǩ suu diõtt mõʹnne Isõõzz peälla da oskku suu.

Isõs puätt Jerusaaʹlma

¹² Nuuʹbb peeiʹv prääʹznka noorõõttâm narod kuuli, što Isõs leäi pueʹttmen Jerusaaʹlma,

¹³ Sij vaʹldde virbboouʹsid da mõʹnne suu vuâstta da čuõʹrvvje: «Hoosianna, bloouslõvvum leäǥǥas son, kååʹtt puätt Šuur nõʹmme, Israeeʹl koonǥõs!»

¹⁴ Isõs kaauni nuõrr siõm ååʹssel da iišti tõn seälgga, nuʹt mäʹhtt ǩeeʹrjtum lij:

¹⁵ «Jeäʹl põõl, nijdd Siion, ǩiõčč, tuu koonǥõs puätt da vuâjj siõm ååʹssel sieʹljest.»

¹⁶ Tän suu mättʼtõspäärna jiâ fiʹttjam, leša ko Isõs leäi čuõvtum, tâʹl sij muʹštte, što tät leäi suʹst ǩeeʹrjtum, da što tõt leäi nuʹt suʹnne še tuejjuum.

¹⁷ Tõk, kook leʹjje leämmaž Isõõzz mieʹldd, mainste, mäʹhtt son leäi kåččam Lasarõõzz ääuʹdest da counnâm suu jaaʹmmjest, da tuõđšte suʹst.

¹⁸ Narod pueʹđi suu vuâstta, tõnt ko tõt leäi kuullâm tõn õõmâstuâjast.

¹⁹ De farisõõzz cieʹlǩǩe kõskkneez: «Vueiʹnnveʹted-a? Ij täʹst ni mii šõõdd. Puk maaiʹlm orčč suu mieʹldd.»

Måtam kreikkla åʹcce Isõõzz

²⁰ Tåʹben leʹjje še måtam kreikkla, kook leʹjje puättam prääʹznka moʹlidvâʹstted.

²¹ Sij puõʹtte Iʹllep årra, kååʹtt leäi Galilea Beetsaidast, da rauʹǩǩe suu cieʹlǩeeʹl: «Šurr, täättčep vueiʹnned Isõõzz.»

²² Iʹllep mõõni mainsted Andreaʹsse, da õhttna suäna mõʹnne Isõõzz årra.

²³ Leša Isõs vaʹsttii siʹjjid: «Äiʹǧǧ lij puättam, da Oummu Päʹrnn mâânn čuõvvâdvuõttses.

²⁴ Tuõđi, tuõđi mon ceälkam tiʹjjid: jõs viõʹlǧǧesjäävv siõm ij kõõčč jânnma da koddu, tõʹst ij šõõdd ni mii, leša jõs tõt kåddai, tõt šõddad jiânâs šââdd.

²⁵ Kååʹtt jieʹllem rääʹǩǩast, mõõnat tõn; leša kååʹtt vâjjad jiijjâs jieʹllem tän maaiʹlmest, son šeäštt tõn âʹǩǩpâjjsaž jieʹllma.

²⁶ Jõs ǩii-ne haaʹlad muu sluužâd, puäđas muu mieʹldd, što kääzzkam leʹčči tåʹben koʹst mon leäm. Muu Eččam ciʹsttai tõn, kååʹtt sloož muu.

Isõs maainast jiijjâs jääʹmmʼmest

²⁷ Ååʹn mon leäm suõrggnam. Mâiʹd mon õõlǥam ceäʹlǩǩed? Eʹčč, kaʹjje muu tän vaiʹǧǧes pooddâst. Ij, mon leäm puättam, što ǩeâllʼjeʹččem tän poodd.

²⁸ Eʹčč, čuäʹjet ciistad!» Da ââʹlmest kollʼji jiõnn: «Mon leäm čuäʹjtam cisttan, da čuäʹjtam tõn täʹst ooudâs årra še.»

²⁹ Da oummu, kook čuõǯǯu da kuʹlle tõn, juʹrdde, što tieʹrmes čieʹrǧǧii. Jeärraz cieʹlǩǩe: «Suu säärntõõli aʹŋǧǧel.»

³⁰ Isõs vaʹsttii siʹjjid: «Tät jiõnn ij puättam muu diõtt, leša tij diõtt.

³¹ Ååʹn tät maaiʹlm jåudd suuʹde; ååʹn tän maaiʹlm vueiʹvvåumma läʹǧǧstet åålǥas.

³² Da ko muu jânnmest kaaggât pââjas, ǩeäzzam pukid årrsan.»

³³ Nääiʹt Isõs cieʹlǩi, mõõn nalla son jäämči.

³⁴ Narod vaʹsttii suʹnne: «Mij leäʹp lääʹjjest kuullâm, što Kristõs jeäll âʹǩǩpââjas; mäʹhtt šât ton ceälkak, što Oummu Päʹrnn âlgg pââʹjded? Ǩii lij tõt Oummu Päʹrnn?»

³⁵ De Isõs cieʹlǩi siʹjjid: «Čuõvv lij occnja ääiʹj tij kõõskâst. Jååʹtted, nuʹt kuuʹǩǩ ko teeʹst lij čuõvv, što seuʹnnjõs ij õõstče tiʹjjid. Kååʹtt seuʹnnjõõzzâst jeäll, ij tieʹđ, koozz jåått.

³⁶ Nuʹt kuuʹǩǩ, ko teeʹst lij čuõvv, åskkad čuõvvõʹsse, što tij čuõv päärnžen šõõddčid.» Tän Isõs mainsti da mõõni meädda da peittlõõđi.

Juudlažneeʹǩǩ jiâ ååsk

³⁷ Håʹt son leäi nuʹt jiânnai õõmâstuâjaid tuejjääm juudlažniiʹǩǩi čõõʹlmi õõudâst, jiâ sij åskkam suu,

³⁸ što šõõddči tuõttân profeeʹtt Esai veiʹǩǩumuš, koon son lij ceälkkam: «Šurr, ǩii åskk, mâiʹd mij leäʹp mainstam? Ǩeäzz Šurr čuäʹjti viõǥǥâs?»

³⁹ Tõn diõtt sij jiâ vuäittam åskkad, ko Esai leäi veâl ceälkkam nääiʹt še:

⁴⁰ «Vuâsppåʹd lij seuʹnnjâttam sij čõõʹlmid da kõrrääm sij čâđđmeez, što sij jiâ vuäinče čõõʹlmeezvuiʹm jiâ-ǥa fiʹttjeʹčče ni mõõn jiâ-ǥa jåårǥleʹčče, da jiõm mon siʹjjid pueʹreʹče.»

⁴¹ Nääiʹt mainsti Esai, ko son vuõiʹni suu čuõvvâdvuõđ da mainsti suʹst.

⁴² Tõn diõtt še määŋgas juudlaž vueiʹvvoummu oskku Isõʹsse, leša farisõõzzi diõtt sij jiâ tuõsttâm tobdsted, ko siʹjjid leʹčče rätkkam ceerkvest.

⁴³ Sij räʹǩste oummui uʹvddem ciist jeäʹnab ko Vuâsppååʹd ciist.

Suud

⁴⁴ Isõs aaʹlji mainsted kõrr jiõʹnne: «Kååʹtt åskk muu, åskk še suu, kååʹtt lij muu vuõlttääm.

⁴⁵ Da kååʹtt vuäinn muu, vuäinn še suu, kååʹtt lij muu vuõlttääm.

⁴⁶ Mon puõʹttem maaiʹlme čuõvvân, što ij ni ǩii, kååʹtt muu åskk, pääʒʒče seuʹnnjõʹsse.

⁴⁷ Tõn, kååʹtt kooll muu saaʹnään, leša ij jäkktõõl tõiʹd, mon jiõm suud. Jiõm leäkku puättam maaiʹlme suudâm diõtt, leša kaʹjjeem diõtt.

⁴⁸ Tõʹst, kååʹtt ǩeäčč muu pâiʹl ij-ǥa vääʹld vuâstta muu saaʹnid, lij suu jiijjâs suuʹdi: tõt sääʹnn, koon mon leäm mainstam, sooud suu mââimõs peeiʹv.

⁴⁹ Jiõm mon leäkku mainstam jijstan, leša Eʹčč, kååʹtt lij muu vuõlttääm, lij jiõčč mieʹrrääm, mâiʹd mon mainstam.

⁵⁰ Da mon teâđam, što suu päkkmuš lij âʹǩǩpâjjsaž jieʹllem. Tõn diõtt mon mainstam tõn, mâiʹd muu Eʹčč lij muʹnne mainstam.»