Evvan 10 - Skolt Koltta Gospel of John 1988

Aʹrvvõs sauʒʒkärddsest

¹ «Tuõđi, tuõđi mon ceälkam tiʹjjid: ǩii ij mõõn sauʒʒkärddsa uus mieʹldd, leša kuärŋŋ tåk jeeʹres sââʹjest, lij suõl da pääkast.

² Tõt, kååʹtt mâânn uus mieʹldd, lij saauʒi peâmmai.

³ Suʹnne vahtt ääʹvad uus, da suu jiõn saauʒ tåʹbdde. Son čuârvv jiijjâs saauʒees nõõm mieʹldd da veekk tõiʹd åålǥas.

⁴ Da son luâštt puk jiijjâs saauʒees åålǥas da son jåått tõi ooudâst, da saauʒ puäʹtte suu mieʹldd, ko saauʒ tåʹbdde suu jiõnâst.

⁵ Leša verraz sij jiâ čuâv, leša čõʹǩǩee suʹst, ko jiâ toobd verrsi jiõn.»

⁶ Nääiʹt Isõs mainsti siʹjjid. Leša sij jiâ fiʹttjam, mâiʹd son mainsti.

Šiõǥǥ peâmmai

⁷ Nuʹt Isõs veâl cieʹlǩi siʹjjid: «Tuõđi, tuõđi mon ceälkam tiʹjjid: mon leäm saauʒi uhss.

⁸ Puk, kook liâ puättam ouddâl muu, liâ suõlli da pääkast jiâ-ǥa saauʒ leäkku kulddlam siʹjjid.

⁹ Mon leäm uhss. Tõt, kååʹtt mâânn sizz muu pääiʹǩ, son kaʹjjââvv. Son vuäitt mõõnnâd da pueʹtted sizz da son käunn ǩeeʹdd.

¹⁰ Suõl puätt pâi suâleed da kåʹdded da hiâvted. Mon leäm puättam, što seeʹst leʹčči kââllasvuõtt.

¹¹ Mon leäm tõt šiõǥǥ peâmmai. Šiõǥǥ peâmmai oudd jiõggâs saauʒees ooudâst.

¹² Päʹlǩǩuum reâuggai iʹlla ni mõõnnallšem peâmmai, tâʹl saauʒ jeäʹla suu jiijjâs. Ko son vuäinn kuuʹmp pueʹttem, tâʹl son kuâđđ saauʒid da čõʹǩǩad; da kuʹmpp ǩeâškad da pieʹđjat tõid.

¹³ Son čõʹǩǩad, ko lij päʹlǩǩuum ijǥa peerast saauʒin.

¹⁴ Mon leäm šiõǥǥ peâmmai; mon toobdam saauʒään da saauʒ tåʹbdde muu.

¹⁵ Nuʹt mäʹhtt Eʹčč tåbdd muu, toobdam mon Eččan; da mon ooudam jiõggan saauʒi ooudâst.

¹⁶ Muʹst liâ jeeʹres saauʒ še, kook jiâ leäkku tän sauʒʒkärddsest. Tõiʹd še mon õõlǥam jååʹđted, da tõk vuäǯǯa kuullâd muu jiõn, da leežž leeʹd õhtt čiõǥǥâr da õhtt peâmmai.

¹⁷ Tõn diõtt Eʹčč rääʹǩǩast muu, ko leäm vaalmâš uʹvdded jiõggan, što vuäǯǯčem tõn väʹst.

¹⁸ Ij ni ǩii tõn vääʹld, leša mon ooudam tõn jijstan. Muʹst lij väʹldd uʹvdded tõn, da muʹst lij väʹldd väʹldded tõn väʹst; tõn päkkmuužž mon leäm vuäǯǯam eʹjstan.»

¹⁹ Da eʹpet aʹlǧǧe juudlažneeʹǩǩ räʹjjtõõllâd täi saaʹni diõtt.

²⁰ Määŋgas cieʹlǩǩe: «Suʹst lij piârgglõk da son lij miõltem. Mõnt tij kulddleʹped suu?»

²¹ Jeärraz cieʹlǩǩe: «Täk jiâ leäkku piârgglõõǥǥ sääʹn; ij tâma piârgglõk vueiʹt ääʹveed čââʹlmteeʹmi čõõʹlmid?»

Juudlažneeʹǩǩ pâiʹlǩeäʹčče Isõõzz

²² Leäi täʹlvv da Jerusaaʹlmest leäi ceerkav pââʹzztempeeiʹv prääʹzneǩ.

²³ Isõs vaaʹʒʒi ceerkvest Salomon pääʹʒʒelmuuʹlcest.

²⁴ Juudlažneeʹǩǩ norrõʹtte suu pirr da cieʹlǩǩe suʹnne: «Mõõn kuuʹǩǩ ton ǩiččlõõddak mij ǩeâllʼjemvuõttân? Jõs ton leäk Kristõs, säärn tâʹl miʹjjid tõn vuõiʹǧǧest.»

²⁵ Isõs vaʹsttii siʹjjid: «Leäm tõn tiʹjjid ceälkkam, leša tij jeäʹped leäkku åskkam. Tuâj, mâiʹd tuejjääm Eččan nõõmâst, tuõđšte muʹst.

²⁶ Leša tij jeäʹped ååsk, ko tij jeäʹped leäkku muu saauʒ.

²⁷ Muu saauʒ koʹlle muu jiõnnan, da mon toobdam tõiʹd, da tõk puäʹtte muu mieʹldd.

²⁸ Da mon ooudam âʹǩǩpâjjsaž jieʹllem. Sij jiâ jääʹm ni kuäʹss.

²⁹ Muu Eʹčč, kååʹtt lij siʹjjid muʹnne ouddam, lij šoorab puki. Ij ni ǩii vueiʹt suâleed siʹjjid muu Eččan ǩiõđâst.

³⁰ Mon da Eʹčč leäʹp õhtt.»

³¹ Juudlažneeʹǩǩ noʹrre eʹpet ǩieʹđjid suu čâʹcǩǩem diõtt.

³² Isõs cieʹlǩi siʹjjid: «Mon leäm Eččan päkkmuužž mieʹldd tuejjääm mäŋgg šiõǥǥ tuâj. Mij tõiʹn lij tõt, mõõn diõtt tij tättveʹted muu ǩieʹđjivuiʹm čõckkled?»

³³ Juudlažneeʹǩǩ vaʹsttee suʹnne: «Jeäʹp mij ni mõõn šiõǥǥ tuâj diõtt tuu ǩieʹđjet, leša tõn diõtt, što viggtak Vuâsppååʹd, da tõn diõtt, ko ton, kååʹtt leäk ooumaž, tuejjääk jiijjad Vuâsppååʹden.»

³⁴ Isõs vaʹsttii siʹjjid: «Ij-ǥo tij lääʹjjest leäkku ǩeeʹrjtum: ’Mon säärnam: tij leäʹped Vuâsppååʹd’?

³⁵ Jõs son ceälkk Vuâsppååʹden tõiʹd, koiʹd Vuâsppååʹd sääʹnn pueʹđi — da Pââʹss ǩeeʹrj sääʹnn ij vueiʹt mõõnnâd tuʹššen—

³⁶ mõõzz tij tâʹl ceäʹlǩǩveʹted tõõzz, koon Vuâsppåʹd lij pââʹzztam da vuõlttääm maaiʹlme: ’Ton viggtak Vuâsppååʹd’, tõn diõtt, što mon sarnnum: ’Mon leäm Vuâsppååʹd Päʹrnn’?

³⁷ Jõs mon jiõm tuejjad Eččan tuâjaid, jeäʹled oskku muu.

³⁸ Leša jõs mon tõiʹd tuejjääm, håʹt jeäʹped ååskče muu, åskkad muu tuâjään, što toobdčid da fiʹttjeʹččid, što Eʹčč lij muʹst da mon leäm Eeʹjjest.»

³⁹ Juudlažneeʹǩǩ tattu eʹpet väʹldded suu ǩidd, leša son piâzzi sij ǩiõđi seʹst.

⁴⁰ Isõs mõõni eʹpet Jorddan tun peälla, tõn sâjja, koʹst Evvan vuõššân riisti, da jaauki tåʹben.

⁴¹ Da määŋgas puõʹtte suu årra da cieʹlǩǩe: «Evvan ij tuejjääm ni õõut õõmâstuâj, leša puk mâiʹd Evvan cieʹlǩi tän åummast, lij tuõtt.»

⁴² Da määŋgas oskku suu tåʹben.