YA-SFADOCI MRKV 6 - Hini Uwasi-u-Biadrcimowa 1929

¹ Chena ini uci luhfa; macimi nahvlwrkv ut vsisgegi si bia-wv; chena u kvgahgimrfhi u nakvla-kuhi.

² Chena iah bia-yrgi ini vlwrkvhsi-grsagigi vlami kvgahgi-miwa betiga ini msi-kvmiqi : chena maci u notvwr-wrli cihfa-feki, Drniwa uci bonv-nrnv yrmv ilani yolumv wiahi? chena, Nahiwa si ini laburwa ma-melo-fuci yrmv ilani? macimi nahiwa iyoiv vlvini yaki mvgeci pakvtafewanv u laci-wvli uci pakvta-nrnv?

³ Hv mvtv inv yrmv utqi-pakvtafewi-lani, nili u qihfvli Male, chena u janinrli Jamse, chena Josise, chena Svimvne? macimi hv mvtv ut iqamhi weci utvsi gelvwa? iwvki. Macimi u gisfaku-wrli nihki.

⁴ Chena Jesise, Mrmosigesqatv mvtv bur vdali utvga-lamakufewa, waci-waphi nahvlwrkv ut vsisgegi, chena alagenv nahvlwa-lamrci macimi nahvlwrkv ya-drci wegiwr-pagi, u talvhi nihi.

⁵ Chena rlwi ’n’tvsi lvwi mvgeci pakvtafewa, waciwaphi wvhsi u laci-wvli usgici si bonvmv-wrci Irkufwi ya-qilu-galici lanvwahi, macimi u gega-hvhi nihi.

⁶ Chena u qvqahdrna-latvmv-wvhi u bur dapwahsawa-nilici. Chena gryrukv nili udawa-nafv brmfa pami kvgahgimiwa.

⁷ Chena utvhpi-mvhi nihi matvhfwi-gita-neswi, chena ut v-lami wrwenaskv-wvhi nihi mrsv neswi; macimi u melvhi wvhsi maku-fihtvwr-wrci nihi wivgilah-fihi;

⁸ macimi u mvyrwi-mvhi wvhsi bur wiahi rmwa-dolici yalr-melici, waciwa’ rpvdhowa pahi; mvtv tvkuwhv, mvtv bedrkv, mvtv muni u muni-bedrkv-nwrgi;

⁹ wakv wvhsi nhrlici pfakhuhi mafiqvh-fowanv : chena tagi neswi gode-wvli kih betani-gapwv isiwa.

¹⁰ Chena, Goqa-lrqv-grci tvsi becfr-yaqa wegiwv, ’n’tvsi vpiku brlu’ hini uci wapfaku u talvhi.

¹¹ Chena goqa-grci-tvsi mvtv ga hutvhpana-gopwv, macimi mvtv nihki ga hvhkvwah-drku-wrki, yasi ini uci wapfa-yaqa, pvpvwv-tanv-muku ini paqi ya-dagi sebrci ki fidwrgi wvhsi u dabwawani-wrci nihki.

¹² Chena nihki luhfaki macimi nvnvhimi-waki wvhsi ilaneki mvtveni si tahawani-wrci.

¹³ Chena u luhfa-pvgilr-wvhi maci wvninah-fihi, chena maci u lumgonr-wvhi pami ya-qilu-galici, macimi u gegahr-wvhi.

¹⁴ Chena ugimv Halade nodrga ini; xvga u wefowa naiahkv wr-kudota : chena Jrne inv Fvfvhqi-ulalhiwanv uwa unskv nili na-palici uci, macimi waciganhi yolumv wrsikvki pakvtafe-yrli weyrgi, iwvpi.

¹⁵ Pvyaqv kutvkvki Elvicv inv iwvki. Chena nrlatv, Mrmo-sigesqatv inv, nayola nr-nakuti nihki mrmosiges-qacki, iwvki.

¹⁶ Pvyaqv Halade iah nodrgaci ini, Jrne, inv ga-gisgiqat-whvkv uwa unskv inv iwv.

¹⁷ Xvga Halade mahci welv wrwenga chena u masa-nrli Jrneli, macimi u gjepi-lrli giphudewa-nagi nili Halotivseli uci, w T ewvli Filvbe welv u janinrli; xvga u mahci wewi-nrli nili.

¹⁸ Xvga Jrne, Mvtv mvyrwvtwi kutaladewa-nagi wvhsi bonvci gi janinv wewvli, u talrli Haladeli.

¹⁹ Macimi Halotivse u mvdala-mrli nili chena mrtvwi taha wvhsi nfrci; macimi rlwi kvtvwelafi;

²⁰ xvga Halade u kufrli Jrneli, wrkutv-mwv yasi nili mvyrwelafi-lici chena ufapi ilaneli, macimi u gcitvwv-hrli. Macimi iah notv-wrci ulrmi wvnfuna-wafi; chena u manwi notv-wrli.

²¹ Chena iah tvwrwi gesagigi Halade u usgi-negewi grsagigi u mactv-wvhi svpv u dabalaciga-mhi, chena nihi mospi-makufewi kvpdenhi, chena nihi ugimrwi ’lanihi Galalegi uci;

²² chena ina nili u drnahfvli Halotivse weci biaci becfali macimi manyaloli, u manwi-lapwvskv-wrli Heladeli inv chena nihi wa-wetvbe-makuci; macimi inv ugimv, Nvtutvmv-wiiu goqa-nahi-grci yasi taha-ivni, macimi ini gah melala u talrli nili iqafvli.

²³ Macimi u jegingamo-mrli, Goqanahi-grci gah nvtutv-mvwi, gah melala ini, brlu’ hini pvhfi n’ ugimrwewa.

²⁴ Chena inv luhfa macimi, Nahiwa nah nvtutv? u talrli u gali. Ca hini wesi Jrne inv Fvfvhqi-ulalhi-wanv, hiwv inv.

²⁵ Macimi walanv inv biaci becfa wawatapi nili ugimrli hawv, chena nvtuhsa, Wvhsi meli-ivni qaiahqi usgici msi saswilrkv-nagi ini wesi Jrne inv Fvfvhqi-ulalhi-wanv ni tasi taha, isiwa.

²⁶ Chena inv ugimv vnhiwawi mvci-lapwv; pvyaqv xvga nili u jeginga-mowanv, chena nihi la-mvtvpilici tvh wihfanigi uci malvwrci bur nkumrli.

²⁷ Chena walanv inv ugimv u wrwenaskv-wrli svmrkvnvli gaheitvwv-hakuci uci, macimi tapigamu wvhsi biado-dagi u wesi : chena inv nhawv macimi u gisgiqat-whrli nili ini giphudewa-nagi,

²⁸ chena u biatu u wesi-wilici usgici msi saswilrkv, macimi ini u melrli nili iqafvli; chena inv iqafv ini u melrli u gali.

²⁹ Chena inv u kvgahgimrfhi iah nodrga-wrci nihki biaki macimi u mvmr-wrli u weyr-nvli, chena ufapsimr-wrli nili nabowr-lvkugi.

³⁰ Chena nihki apvstvleki u mrwvsgrmr-wrli Jesiseli; macimi u wetvmvwr-wrli jrivhki wiahi, goqa-nahi-grci mviahci si Ivwe-wrci nihki, macimi goqa-nahi-grci mviahci kvgahgimiwa-wrci.

³¹ Macimi, Gelvwv nrnsihkv birku lr pvpsqvhgi tvsi, chena vlwrkvh-siku mrlrqvsi, u talvhi nihi. Xvga maci mtvsi bami bir-wrci macimi bami wapfa-wrci, chena nihki mvtv u bonr-nrwv tvwrwe-nvmewa muhci wvhsi wihfani-wrci.

³² Chena nihki wapfaki ini ulvga-lagi nrnsihkv lr pvpsqvhgi tvsi haki.

³³ Chena nihki lanvwaki u nawr-wvhi wapfahi, chena maci u wrkumr-wvhi, macimi nihki mrwv-twi inisi gcipdoki jrivhki nili udawanv uci, macimi u nvwvfwr-wvhi nihi.

³⁴ Chena biaci wapfa welv, macimi u nawvhi maci mahsa-lalici, chena u gitaminrqa-lamvhi, xvga nihki brsi magefvki buryr bonrcki gahcitvwv-haku-wrci ilafeki : macimi ut vlami kvgah-gimvhi maci Vciahi.

³⁵ Chena ini grsagigi uwa ia hulrqe-figi, u kvgahgimrfhi utfa-kuhi, chena, Cah pvpsqvhgi utvsi, chena uwa ini grsagigi ulrqefi;

³⁶ vlikv laskvwi nihki, wvhsi manvwvhi ini belasgi hr-wrci chena udawa-nafv gryrukv, macimi tapanvmu-wrci pasiqi welvwv takvwihi wvh meci-wrci, iwvki nihki.

³⁷ Pvyaqv rpvfsa macimi, Melahku gelvwv wvh meci-wrci u talvhi. Macimi, Hv ni na hrpa macimi nah tapanrpa nesana-tabawa salani ya-lalama-kugi tvkuwhv, chena hv nah melrpa nihki wvhsi meci-wrci? u takuhi.

³⁸ Gahfwi ki bonr-nrwv gelvwv wapsqada-wvli? nhrkuna chena wrpvtv-muku, u talvhi. Chena iah wrkutvmu-wrci nihki, Nyrlvnwi, chena neswi nvmah-fvki isiwaki.

³⁹ Chena u tapi-mvhi nihi jrivhki wih lamvtvpilici mrsv jatfwi svhgigi lr sgipvxkvhgi.

⁴⁰ Macimi nihki lamvtv-beki yade-tfwalanv-wvgifi-wrci, mrsv tabawa, chena mrsv nyrlvnwrpitvgi.

⁴¹ Chena u tah mvmanv nili nyrlvnwi wapsqa-da-wvli chena nihi neswi nvmafhi, chena pami spamagi manqvtugi lrpi, gisrci-lvwi, chena u puskunrnv nili wapsqada-wvli; chena u melvhi nihi kvgahgimrfhi wvhsi ya-lvhfv-melici nihi si bonv-malici; macimi nihi neswi nvmafhi u pvhfanvmv-wvhi alagenv nihi jrivhki.

⁴² Chena jrivhki nihki wihfaneki macimi dabho-loki.

⁴³ Chena u maginr-nrwv nihki baxkvhki mryr-laghi, matvhfwi-gita-neswi sosonv uqihfanu, macimi nahfrpi nihi nvmafhi uci.

⁴⁴ Chena nihki ma-mecicki nili wapsqada-wvli nyrlvna-matvhfana-tabawa ilaneki.

⁴⁵ Chena walanv u mvmelo-wihkv-wvhi u kvgahgimrfhi wvhsi ini ulvga-lagi lkv-malici, macimi wvhsi Pafsaita si negr-nelici ini vsuwa wvyatvhqa, ia-haiahi welv rmaskv-wrci nihi mahsa-lalici.

⁴⁶ Chena iah mahci nvkvla-kuci, wapfa ini maqvh-gigi hawv mvwi mvmrtuma.

⁴⁷ Chena ia hulrqe-figi, ini ulvgasi uwa Irutaqa ini msi-napigi biathvnwi, chena welv pahi ini pvqvtvhgi.

⁴⁸ Macimi u pami nawvhi qelvhsi-tahahi yasi jomalici, xvga ini mahsi-gikvgi u nvxgr-nrwv nihki, nvwitu nyawana tv gcitvwvhdo-dagi ini tapahgi Irqv utfvhi, pami pamfa usgici ini msi-napigi; macimi wih pamfr-lvhi :

⁴⁹ pvyaqv nihki, iah nawr-wrci pami pamfali usgici ini msi-napigi, jepv inv si tahaki, macimi wivkvhotv-moki;

⁵⁰ xvga jrivhki nihki u nawr-wrli, macimi patfvgi-tahaki. Pvyaqv walanv u kvlolade-mvhi, macimi Uwasi-labwrfeku : nelv inv; tagi ku-panaku, u talvhi.

⁵¹ Chena spamagi hawv nihi betiga ini ulvgasi; macimi ini mahsigikvgi nvgaskv : chena nihki ulrmi qvqahdrni-ta-haki;

⁵² xvga mvtv nili si nanuh-saki wapsqada-wvli, wakv u ta-hiwv sepfanwili.

⁵³ Chena iah mahci grmagi hrwrci ini si biaki Ginasuladewi vsisgegi, macimi ini sqrbiagi utvhpici-gaki.

⁵⁴ Chena ini ulvga-si ia huci biaci luhfr-wrci, walanv nihki lanvwaki u wrkumr-wrli nili,

⁵⁵ macimi mafhega ini gryruqi drmqa si qvqeki, chena ut v-lami brmwalr-wvhi u tfvna-mwrgi iuhumv ya-qilu-galici, yasi no-drga-wrci tv hvpilici nili.

⁵⁶ Macimi goqa-grci-tvsi si becfa, udawa-nafv, walr udawanv, walr belasgi, nihki u saximr-wvhi nihi ya-qilu-galici ini yrtvh we-wetgeki, macimi u nvnvhbrci-mrwrli, wvhsi manvwvhga pahsanv-mrkuci qahqiga ini tv nipaniqr-dagi u betanikv : chena ya-tfwi pahsanv-mrkuci mafafiho-foki nihki.