YA-SFADOCI MRKV 5 - Hini Uwasi-u-Biadrcimowa 1929

¹ Chena grmagi ini msi-napi si biaki nihki, betiga ini ut vsisge-mwrgi nihki Girlasenvki.

² Chena ini ulvga-lagi ia huci biaci luhfrci, walanv ’n’tvsi u nvxgr-goli ilaneli nili nabowr-lvku umoli weciwafi wivgilah-feli,

³ inv u bonv ya-drci nili Ir nabowr-lvku : macimi mvtv ilani gidani u kvtvwi gjepi-lrli nili, mvtv, mvtv weginrqi uqrnhi;

⁴ xvga inv naiahkv mahci mosvgi gjepifu fvgigr-pifowanv chena uqrnhi, macimi inv naiahkv u mahci pginvhi nihi uqrnhi chena nili fvgigr-pifowanv u paxgi-nrnv : chena mvtv ilani u bonv wesikv-tuwewa wvhsi wacvma-hrci nili.

⁵ Chena mostvwi, tapahgi chena gesagi, nili lr nabowr-lvku macimi nili lr mvmvqvh-giki, inv pvh tvlvho-tvmwv, chena u pami kvgiskudr-weiv sekunhi.

⁶ Chena inv iah nawrci Jesiseli mrlrqv uci, mamaqi macimi usvsilvwa-hrli nili;

⁷ chena wivkvho-tvmwv kvlvwawih-simowa, Nahiwa ni bonv wvh ipanv-lalv gelv, Jesise, u Qihfvli inv Gci Mospi Mvnatu? Gi ta hvhdoci-mala Mvnatu, tagi mvmyanrn-hilu, isiwa.

⁸ Xvga, Biaci luhfrlu, gelv wivgi-lahfi, inv ilani uci, u talrli nili.

⁹ Chena u nvtuhtv-wrli, Nahiwa gi tasifu? Mahsa-lakv ni tasifu; xvga maci nelvwa, u tagoli.

¹⁰ Chena ulrmi u nvnvhbrci-magoli wih bur ini uci drmqa luhfa-ikvwrci nihi.

¹¹ Huwa ’n’tvsi vbeki yapfvtagi ini maqvhgigi msaloki kusgoki bami wihfani-wrci.

¹² Nihki laskvwn-nrga kusgoki, wvhsi nelvwa manvwvhi becfrmv-kici nihki, u tasi nvnvhbrci-makuhi nihi.

¹³ Macimi u melvhi welrni nihi. Chena nihki wivgilah-feki biaci luhfaki, macimi udfr-wvhi nihi kuskuhi : chena inv na-kudwa-lakv kusku brlvciptu ini ga-gisgrp-kvhgi ini msi-napigi si lakuwhvsga, ya-tfwici nvwitu nesana-matvhfana tabawa; macimi nihki naphu-qeki ini msi-napigi.

¹⁴ Chena nihki ya-svmrcki usimoki, macimi ini rcimoki ini udawa-nagi, chena ini belasgi drmqa. Chena nihki biaki u mv’wrpvdr-nrwv ini mviahci biamikvgi.

¹⁵ Macimi Jesiseli si biaki nihki, chena u talrpvmr-wrli nili la-kusgr-kutv wvninah-fihi bami lamvtv-pilici, betani-gali chena mvyrwi gesqali, inv mviahci bonrtv nili mviahsa-lalici : chena grwilv-waki nihki.

¹⁶ Chena nihki na-nama-giki ini ud rcimuhtvwr-wvhi nihi yasi nvgi inv la-kusgr-kutv wvninah-fihi chena nihi kuskuhi.

¹⁷ Chena nihki ut vlami gcihkvwr-wrli wvhsi u sqryrm-wrgi uci srwa-lici nili.

¹⁸ Chena yasi ini ulvga-lagi pami Ikvgi, inv mviahci lakusgr-kutv wvninah-fihi u nvnvhbrci-mrli wvhsi manvwvhga weci vbemrci.

¹⁹ Chena mvtv welrni u talala-mrli, wakv, Nhrla ya-drivni wegiwv gih grnvki, macimi wetvmvwi yasi msrgi wiahi inv Dabalamiwatv mviah-ci panv-lahgi, chena yasi bonvmo-lahgi gitaminrqa-ladewa, u talrli nili.

²⁰ Chena inv wapfa ya-hrci, macimi ut vlami Ifwrtutv Degapul-vsegi yasi msrgi wiahi mviahci panv-lakuci Jesiseli : macimi mvivci tahaki jrivhki ilaneki.

²¹ Chena iah mahci Jesise kvbrci nuhgi ini ulvga-lagi vsuwa wvyatvhqa, maci mahsa-lalici u mrwvdwa-ludr-goli; macimi mrlrqvhi ini msi-napi vpiwv.

²² Chena ’n’tvsi utfa-goli nakuti nihki dabalaci-gacki ini msi-kvmiqi uci, Javlvse sifu; chena, dawv hu nvu-goli nvhekv u fitvli si rgicfali nili,

²³ macimi u nvnvhbrci-magoli, Ni drnah-fafv uwa nrnami vsanwv : gi mvmrtu-mala, wvhsi gelv bir-ivni chena gi laciwvli usgici inv si bonv-mvni, wvhsi inv manvwvhi mafafiho-fuci, macimi lanvwa-wici, u tagoli.

²⁴ Chena u weda-mrli nili; macimi maci mahsa-lalici u nakvla-kuhi, chena u fvggahgr-kuhi.

²⁵ Chena iqawv, ba-bonvkv mskuwi-lugawa matvhfwi-gita-neswi gikvtu,

²⁶ macimi mahci vhqi-nvmwv maci wiahi maci nr-nvtvuci-galici uci, chena u mahci pvgitv jrivhgi ba-bonvgi inv, chena mvtv-wiahi si waivh-grwi, wakv brmaci vliwi ilafi,

²⁷ naiahkv pami nodrga ini wiahi Jesiseli si, biawv ini nakutusgrwa-nagi udrnrgi, chena u tah pahsanvmr-wrli nili u betanikv-nilici.

²⁸ Xvga, Qahqi kvtasgi pahsanvmv-wvga u betanikvnv, nah mafafiha-gopi, iwvpi.

²⁹ Macimi walanv ini wacitvgi u mskumi kvhgidali; macimi u mostu weyrgi yasi gega-hofuci ut vhqi-lugawa.

³⁰ Chena walanv Jesise u pami mostu weyrgi yasi ini wrsikvgi weyrgi uci naiahkv wapfa-yrgi, u kutaku-naku ini ini nakudwa-lowa-nagi, macimi, Nafvwa ni pahsanv-mrqv ni betanikvnv? isiwa.

³¹ Chena u kvgah-gimrfhi, Gi nawrki nihki mahsa-lagiki ki pami fvggahgr-goki, macimi Nafvwa ni pahsa-naqv? gi taiu u takuhi.

³² Macimi nvtvwrpi gryrukv wvhsi nawrci nili mviahci si lvwwelici yomv wiahi.

³³ Pvyaqv inv iqawv pami grwelvwa macimi pvpvwaskv, u pami wrkutv ini mviahci ipanvlo-fuci, biawv chena ya-lvhfv-melici nili si rgicifa, macimi u wetvmv-wiii jrivhgi ini dabwawa.

³⁴ Chena, Udr-nfimv, gi dapwah-sawa gi mahci mafafi-haku; grmrni wapfalu, macimi gegalu git vhqi-lugawa, u talrli.

³⁵ Ia-haiahi gawvgi kvlvwici, nihki uci biaki inv ya-drci wegiwv dabalaci-gatv ini msi-kvmiqi, Gi drnahfv napwv; gociwa naluhci vlikv gi tasi patfvghv ini Ga-gahgimiwa? isiwaki.

³⁶ Pvyaqv Jesise mvtv mvkufa-latv-mwv ini kvlvwewa yaiugi, Tagi wesrla-bwrlu, dapwah-salu pahi, u talrli nili dabalaci-galici ini msikvmiqi.

³⁷ Chena mvtv ilaneli welrni u ta lala-mrli wvhsi nakv-lakuci, waciwaphi Betvli, chena Jamseli, chena Jrneli nili u janinrli Jamse.

³⁸ Chena nihki biaki ini wegiwr-pagi ya-drci inv dabalaci-gatv ini msi-kvmiqi; chena u nama tvtvwrngawa, macimi maci pami wihfvqaki mvmyrdwa-wvhotv-moki ulrmi.

³⁹ Chena iah becfrci, Gociwa ki tvtvwrn-gapwv, macimi ki wihfv-qapwv? inv vpaluhfv mvtv napwv, nabawv wakv, u talvhi nihi.

⁴⁰ Ma-cimi u wrpvla-lamr-wrli nihki. Pvyaqv inv, u pami naiahkv vlikv laskv-wvhi jrivhki nihi, ud rmwalrli nili u fvli inv vpaluhfv macimi u gali chena nihi ba-pvh wedfa-makuci, chena nhaki tv hvpilici nili vpaluh-fvli.

⁴¹ Chena u tah fvgi-laja-nrli nili vpaluh-fvli, Tvlifa, kumvi, u talrli; iah Irbrci-mugi, Iqafv, gi tala, Unsgrlu, ya-hi-ugi ini.

⁴² Macimi walanv inv iqafv unskv, chena brmfa; xvga ma-tvhfwi-gita neswi tfwi-gikvdowi inv. Chena nihki qvqahdrni-ta-haki walanv msi qvqahdrni-tahawa.

⁴³ Chena ulrmi u tapimvhi nihi wvhsi bur ilani wrkutvgi yomv : macimi tapigamu wvhsi nahcipah wiahi melo-fulici nili iqafvli wvh mecilici.