YA-SFADOCI MRKV 4 - Hini Uwasi-u-Biadrcimowa 1929

¹ Chena nuhgi vlami kvgahgimiwa ini sqrbiagi msi-napi. Chena ’n’tvsi u mrwvdwa-ludr-kuhi lvkuqa maci mahsa-lalici, waciga-nvhi ulvga-lagi Ikvmwv, macimi ini msi-napigi lamvtvpi; chena jrivhki nihki mahsa-lagiki ini sqrbiagi msi-napi vbeki pvqvtvhgi.

² Chena maci wiahi u kvgahgi-mvhi nihi pamrtu-wawa-nagi, macimi u talvhi u pami kvgahgimiwawa-nagi,

³ Vhkvwah-saku : Wrpvmahku, inv ya-vcigatv via wapfa wvhsi vcigaci :

⁴ chena ini biamikvtwi, yasi vcigaci, nrlatv menkv ini pvkvci-kvnv si panfanwi, chena nihki wisgiluh-fvki biaki macimi u jrkvdr-nrwv ini.

⁵ Chena nrlatv ini tvh sekunvh-gigi vsisgi si panfanwi, tvh bur ini waivhkv vdagi vsisgi; macimi walanv ini frginwi, xvga ini mvtv waivhkv spihfa-nwi vsisgi :

⁶ chena inv gesagi gesfwi iah biatvh-kufvgi, svhta ini; chena xvga mvtv ujapkvhkv-tuwi, naputa ini.

⁷ Chena nrlatv alagenv nihi grwesahi si panfanwi, macimi nihki grwesaki sqine-geki, chena u napwvs-qahdo-nrwv ini, macimi mvtv mvwifowa neginwi.

⁸ Chena nrlatv ini uwasi vsisgegi si panfanwi, macimi neginwi mv-wifowa, pami sqineginwi chena sqeiv; macimi ini umoiv nfwrpitvgi tfwagfanwi, chena nakudwrsi tfwagfanwi, chena tabawa tfwagfanwi.

⁹ Chena, Ba-bonvkv utvwvgr-wvli wvhsi nodrgaci, welrni inv nodr-gata, iwv.

¹⁰ Chena iah nrnsihkv vpici, nihi ya-pilici gryrukv welv gilagi nihi matvhfwi-gita-neswi u nvtuhdr-kuhi nili pamrtuwawa-nv.

¹¹ Chena u talvhi, Gelvwv si melatipi ini ma-mvivtgi ini u-gimrwewa-nagi Mvnatu uci : wakv nihki ya-picki frgici, jrivhki wi-ahi pamrtuwawa-nagi ipanvdota :

¹² wvhsi nihki nagawrta manvwvhi namu-wrci, macimi bur mosi-taha-wrci; chena nodrga-wrta nihki ma-nvwvhi nodrga-wrci, macimi bur nanuhsa-wrci; belabaga nihki wih kugeki nuhgi, macimi ini wih pvgfa-latvmv-wofoki.

¹³ Chena, Hv gelvwv mvtv ki wrkudr-nrwv yomv pamrtuwawa? macimi nahiwa gah si wrkudr-nrwv jrivhki nili pamrtuwawanv? u talvhi.

¹⁴ Hinv ya-vci-gatv u tutu ini kvlv-wewa.

¹⁵ Chena iuhkumv nihki ini pvkvci-kvnv ya-picki, tv v’dodagi ini kvlvwewa; chena iah mahci nodrga-wrci nihki, walanv Satane biawv, macimi u mvma ini kvlvwewa mviahci v’dodagi weyrwrgi nihki.

¹⁶ Chena iuhkumv nahfrpi nihki ya-do-fucki ini tvh sekunvh-giki, iuhgoni, iah mahci notvmu-wrci ini kvlv-wewa, walanv utvhpanr-nrwv ini weci uwasi-labwrwa;

¹⁷ chena mvtv u bonr-nrwv weyrwrgi ujapkvh-kvtwi, wakv mrlrqvsi wesigif eki; uwa, ina gesanrci-nvmowa walr nrnuhgrc-hadewa iah pvfaqe-yrlici xvga ini kvlvwewa uci, walanv nihki utvgikvh-sinoki.

¹⁸ Chena nihki nrlatv ya-dofucki ini alagenv nihi gr-wesahi; iuhkumv nihki mviahci notvgiki ini kvlvwewa,

¹⁹ chena nili utvmafewanv ini ya-lakuqvh-kvmigigi, chena pvwawi-wvnimafewa, macimi ini mvci-skvtv si tahawa kutvgi wiahi becfaiv, uci napwvsqah-dota ini kvlvwewa, macimi ini mvtv mvwifowa-niwi.

²⁰ Chena nahga nihki ya-dofucki ini uwasi vsisgegi; nihgeni u nodr-nrwv ini kvlvwewa, macimi u mvma-nrwv ini, chena u negdo-nrwv mvwifowa, nfwrpitvgi tfwagfanwi, chena nakudwrsi tfwagfanwi, chena tabawa tfwagfanwi, u talvhi.

²¹ Hinv netvwrkv hv bialofu wvhsi Irmagi bono-fuci ini pusi-legi, walr lrmitvhfv ini tfvnagi, hv mvtv wvhsi ini usgici yr-tvh nepvwici si bono-fuci? u talvhi.

²² Xvga mvtv-wiahi vhdawi gigi-dota, wvhsi ini waciwaphi tapinvu-kufado-dagi; mvtv nuhgi wiahi vhdawi girci-dota, kvtasgi wvhsi ini wvivhfa-yrgi si bia-yrgi.

²³ Wiyafv ilani bonvga utvwvgr-wvli wvhsi nodrgaci, welrni inv nodr-gata.

²⁴ Chena, gcitvwr-feku ini na-notv-maqa : wiahsi tapvcikv da-pvciga-yaqa gelvwv ini gah tapvcigr-lagopwv gelvwv; macimi vliwi gah si mela-gopwv gelvwv, u talvhi.

²⁵ Xvga inv ba-bonvkv, inv wah melaqi : chena inv buryr bonvkv, inv wa huci rnvmota ini weginrqi ba-bonvgi.

²⁶ Chena iwv, Yone yagi ini u gimrwewa Mvnatu, brsi ilani wih ipvgitv menkv ini usgi-drmqa; macimi wih nabawv chena wi hunskv tapahgi gita gesagi, macimi ini menkv wih frginwi macimi sqi-neginwi, mvtv u wrkutv waci ’nigi.

²⁸ Hinv vsisgi-drmqa u negitu mvwifowa pasiqi welv uci; nhihtv ini msisgi, uwa ini mafvhqimi, uwa ini ya-tidagi ini mafvhqi-migi.

²⁹ Pvyaqv ia hvtidalici, walanv u jeginv giskvt-hikv, xvga ini kvwvsqhrwa uwa biaiv.

³⁰ Chena iwv, Drniwa gah si tvqa-ladrpa ini u gimrwewa Mv-natu, walr nahiwa si pamrtuwawa-nagi Ivhgahfa-dopa ini?

³¹ Hini inwi brsi ini nakuti paqa mvstvdewi menkv, ina iadodagi ini ini usgi-drmqa, waghi ini utvhpi inwi nili jrivhki mengrnv ya-daki ini usgi-drmqa,

³² pvyaqv ina vdota ini, sqineginwi, macimi vlikv inwi notv jrivhki nili mamagi-nvsku, chena mvkv-mvgi pgaivh-qvtwi; waciganvhi nihki wisgiluh-fvki ini spamagi uci kvtvwi lwvhsi-noki sebrci ini ya-wikvgi ’n’tvsi.

³³ Chena maci nileni yaki pamrtuwawanv u gilagi kvlo-lvhi ini kvlvwewa nihi, yasi nihki kvtvwi-ilafi-wrci wvhsi notvmu-wrci ini;

³⁴ macimi frgici pamrtuwawa mvtv u kvlo-lvhi nihi : wakv na-hvlwrkv u kvgahgimrfhi u tabrni tapi wetvmv-wvhi jrivhki wiahi.

³⁵ Chena ini grsagigi, ia hulrqe-figi, Hini vsuwa grmagi hr-arku, u talvhi nihi.

³⁶ Macimi u nvkvlr-wvhi nihi mahsa-lalici, ud rmwala-kuhi nihi, ivskv yasi vpici ini ulvga-lagi. Chena ku-tvkvli ulvga-lvli u wedama-kunv.

³⁷ Chena ’n’tvsi pvfaqeiv msrwi mahsigi-kvgi, macimi nili ba-bokvki ini si becfah-fanu ulvga-lagi, waciganvhi ini ulvgasi uwa pami uqikvmi.

³⁸ Chena inv welv ini udrnrgi vpiwv, nabawv usgici nili vnvhkv-nvli : chena nihki ut v-mvchr-wrli, macimi, Ga-gahgimiwa, hv mvtv gi mvkufa-latv wvhsi ihqi-nvmo-ivqa? u talr-wrli.

³⁹ Chena inv vmvmu, macimi u kutatv ini mahsigi-kvgi, chena, Grmahkvwafewa cahi, nola-wilu, u tatv ini msi-napi. Macimi ini mahsigikvgi nvgaskv, chena ’n’tvsi vhdawi mahsi grmahkvwvgi.

⁴⁰ Chena Gociwa ki wesrla-bwrpwv? hv mvtv gawvgi ki mah’ bonr-nrwv dapwah-sawa? u talvhi nihi.

⁴¹ Chena vnhiwawi wesrla-bwrki nihki, macimi, Nafvwa uwa yrmv, yasi we-ginrqi ini mahsigi-kvgi chena ini msi-napi pafadr-kuci ideki.