YA-SFADOCI MRKV 14 - Hini Uwasi-u-Biadrcimowa 1929

¹ Huwa yasi mahci nesuku-nvgiki vhdawi ini pamfrsiwawi lamvfkuh-qawa macimi ini buryr unadagi tvkuwhv : chena nihki ugi-mrwi mkvtaukulvyaki macimi nihki yr-ivwi-gacki u nvtunahr-nrwv wvhsi manvwvhga masanr-wrci nili nhi-lvwewa uci, macimi nfr-wrci nili :

² xvga nihki iwvki, Tagi ini Irqvsi wa-wihfancigagi, bela-baga gikvmoci ’n’tvsi wa vhdawi u tvtvwrngawa-nwv nihki lanvwaki.

³ Chena haiahi Pafanagi vpici ini wegiwv ya-drci Svimvne inv wasgilhvga-magitv, yasi lamvtv-pici tvh wihfanigi, ’n’tvsi biali iqali u pami nemali alabastvwi wihfvkvkgo-fagi lumgowa nah-tvwvtwi nrde lvkuqa gisuwa-lama-qvtwi; macimi inv iqawv u puhgi-nrli nili wihfvkvkgo-fvli, chena welagi u tah feginv-mrgoli ini.

⁴ Pvyaqv nrlatv vbeki ’n’tvsi ba-bonvgiki gisfadewa alagenv welvwv, Drniwa uci yomv wvlaskhudota ini lumgowa?

⁵ Xvga yomv lumgowa manvwvhga naiahkv nfana-tabawa salani vlikv wihsi mahci myagipi, macimi melaqi inv gitamrfv, iwvki. Macimi nihki u pa-gihkvwr-wrli nili iqali.

⁶ Pvyaqv, Welrni, gociwa ki patfvghrwv gelvwv? ni mahci inv pakvtanv-mrqv uwasi pakvtafe-wa neyrgi, iwv Jesise.

⁷ Ki bonr-wrki xvga nihki gitamr-fvki mosvtvwi weci gelvwv, macimi goqa-lrqv-grci si taha-yaqa gelvwv kih kvtvwi uwas’ panvlr-wrki nihki : wakv nelv mvtv mosvtvwi ki boni-pwv.

⁸ Mahci lvwi inv wvh kvtvwi-ilafici; u mahci lumgo-nrli neyr-nvli grsv wvhsi ini pami lakuno-fulici.

⁹ Chena tapilo gi tala-pwv nelv, Goqa-tvsi-grci ini uwasi-biadrcimowa wah nvnvhi-mi-wapi mafhega ini ya-lakuqvh-kvmigigi, hini nahfrpi yrmv iqawv mviahci lvweci wa hrtudota wvhsi u mr-mkvwalamo-fowa-nici.

¹⁰ Chena Jotvse Isgalade, inv nakuti nihki matvhfwi-gita-neswi, wapfa nihi ugimrwi mkvtaukulviahi hawv, wvhsi manvw-vhga nihi si masdru-hrci nili.

¹¹ Chena nihki iah notvmu-wrci ini, uwasi-labwrki, macimi u mahcimr-wrli wvhsi melr-wrci muni. Macimi inv u nvtunahv wvhsi manvwvhi nihi si lrgaci masdru-hrci nili.

¹² Chena ina wasgi grsagigi waci vhdagi buryr unadagi tvkuwhv, ia hvpana-wrci nihki ini pamfrsiwawa, u takuhi u kv-gahgimrfhi, Drniwa tvsi gi tas’ taha wi hr-yrga macimi husi-macfado-yrga wvhsi manvwvhga gelv meci-ivni ini pamfrsiwawa?

¹³ Macimi u wrwenvhi neswi u kvgahgimrfhi, Nhrkuna ini udawa-nagi macimi ’n’tvsi gah nvxgr-kuwv ilani u pami nema vsisgi-wvkkugi napi : nakvlahku;

¹⁴ chena goqa-grci-tvsi inv wah becfa, Inv Ga-gahgimiwa, Drniwa cahi ni nvuhade-wikv, wvh tvh meci-iv ini pamfrsiwawa gilagi ni kvgahgimr-fvki? iwv ilahku inv ini wegiwv uci mastala, u talvhi.

¹⁵ Macimi inv nahvlwrkv gah wrpvtala-kuwv vkuci-puqvnafu msrwi yr-drgi dapfanwi vwocikv macimi macfanwi : chena initvsi husi-macfatvwi-nrga.

¹⁶ Ma-cimi nihki kvgahgimr-fvki wapfaki, chena ini udawa-nagi si bia-ki, macimi u mgrnrwv yasi mahci makuwrci nili : chena u macfa-do-nrwv ini pamfrsiwawa.

¹⁷ Chena ia hulrqe-figi biawv gilagi nihi matvhfwi-gita-neswi.

¹⁸ Chena yasi lamvtvpi-wrci macimi pami wihfani-wrci, Jesise Tapilo gi tala-pwv nelv, Nakuti gelvwv nah masdru-haqv, datapilvhi inv wa-wihpumitv, iwv.

¹⁹ Nihki vlami uqrwafeki mvci-labwrwa macimi mrsv nakuti, Hv nelv inv? u takuhi.

²⁰ Na-kuti inv nihki matvhfwi-gita-neswi, wa-weci inv pamgr-mitv ini ulrkv-nagi.

²¹ Xvga inv u Qihfvli ilani datapilvhi hawv ini ya-lvwigrlo-fuci : pvyaqv mvci-labwrwani cahi inv ilani waci srpwi masdruho-fuci inv u Qihfvli ilani ! uwasrli ini waghi inv ilani bur naiahkv mahci lanvwa-wita u talvhi.

²² Chena yasi wihfani-wrci, u tah mvma tvkuwhv, chena iah mahci gisrci-doci, u puskunv ini, macimi u melvhi nihi, chena Mvmuku : nelv neyrnv yomv, iwv.

²³ Chena u tah mvmrli taphi-kvnvli, chena iah mahci meli-waci niyrwa, u melvhi nihi : macimi jrivhki nihki nili uci manoki.

²⁴ Macimi Ni mskumi yomv ini mahdrcimowa uci, fa-feginvmv-wofuci maci wiyafv.

²⁵ Tapilo gi tala-pwv nelv, mvtv gidani nah mana ini mvwifowa ini tatapvhtaqi uci, brlu’ hina grsagigi manaiv ini wasgigi betiga ini ugimrwi-arkumi Mvnatu, u talvhi.

²⁶ Chena iah mahci nvkvmu-wrci ufapa-kvmowa, luhfaki, ini Vlifiwi maqvhgigi haki.

²⁷ Chena u talvhi Jesise, Jrivhki gelvwv gah gisfago-pwv : xvga mahtvwi-gapi ini, Nah gicitwhv inv gahcitvwv-hrtv magefhi, macimi nihki magefvki mafhega wah si lfwalgo-foki.

²⁸ Pvyaqv mahci unsgr-niga nelv, Galalegi gah si negrnihala-pwv, u talvhi.

²⁹ Pvyaqv Betv, Weginrqi jrivhki wah gisfaqeki, mvtv wakv nelv, u talrli.

³⁰ Tapilo gi tala nelv, yasi irmgi gesagigi, tapilvhi inugi tapahgiga, wihsi-bur nesana kvlhotvgi inv nrbaiv, nfana gah mahci gircimi, u talrli Jesise.

³¹ Pvyaqv inv vnhiwawi we-sikuwa, Qelvhega weci nabo-malv, mvtv gelv gi tvh girci-mala, iwv. Macimi nahfrpi ini ivskv ya-iuwrci nihki jrivhki.

³² Chena uwa nvhekv tvsi biaki Gafsamane ya-sidodagi : che-na Mrtvsi lamvtvpiku gelvwv iahaiahi mvmrtumaiv, u talvhi u kv-gah-gimrfhi.

³³ Macimi ud rmwa-lvhi Betvli chena Jamseli chena Jrneli, macimi ulrmi vlami qvqahdrni-taha, chena vhqi-patfvgi-taha.

³⁴ Macimi Ni mvyrwi-neiv vnhiwawi uqrwafi mvci-labwrwa datapilvhi nabowa-nagi : utvsi vpiku, macimi gcitvwr-piku, u talvhi nihi.

³⁵ Chena via wapfa takvwihi, chena ini vsisgegi si rgicfa, macimi mvmrtuma wvhsi, qahqi kvtvwi ini-iga, ini yr-tafvgi manvwvhga pamfrla-kuci.

³⁶ Macimi, Vpv, Ufimv, jrivhki wiahi kvtvwvtwi geyrgi gelv; neyrgi uci rtani yrmv taphikv : pvyaqv mvtv yasi ta-haiv nelv, yasi tahaivni gelv wakv, iwv.

³⁷ Chena biawv, macimi u mkvwvhi bami nabrlici nihi, macimi Svimvne, hv gi napv? hv mvtv gi kvtvwi gcitvwrpi nakuti yr-tafvgi? u talrli Betvli.

³⁸ Gcitvwr-piku chena mvmrtumaku, wvhsi bur uttv-maqa myrsi-vsha-dewa : svpkv’ hini ilafewa dapi-tahaiv, pvyaqv ini wivufi magih-kufeiv.

³⁹ Chena nuhgi via wapfa, macimi mvmrtuma, nileni ivskv kvlvwewanv iwv.

⁴⁰ Chena nuhgi biawv, macimi u mkvwvhi nihi bami nabrlici, xvga u sgesakuwv lvkuqa kufaqv-nili nihki; macimi mvtv u wrkudr-nrwv wv hrpvftvwr-wrci nili.

⁴¹ Chena ini mvwi-nfana Irqv biawv, macimi Nabrku uwa, chena mvmaku vlwrkvhsewa : dapi uwa ini; ini yr-tafvgi uwa biaiv; wrpvmahku, inv u Qihfvli ilani nili u laciwv majelaficki si masdru-hofu u talvhi.

⁴² Hunsgrku, wapfa-drku : wrpvmahku, inv wrsv masdru-hitv uwa mrlrqvhi.

⁴³ Macimi walanv, iahaiahi gawvgi kvlvwici, biawv Jotvse, nakuti nihki matvhfwi-gita-neswi, macimi weci mahsa-lalici gisg-hikv-nihi macimi cifhikvnv, nihi ugimrwi mkvtaukulviahi chena nihi yr-ivwigalici chena nihi gigi-lanihi umoki nihki.

⁴⁴ Huwa inv ma-masdru-hrtv nili u mahci melvhi giginolowa nihi, Goqa-nafv-grci nah pvckvmv, henv inv; masanahku, macimi rmwalahku wrpvnrci u talvhi.

⁴⁵ Macimi iah birci walanv udfrli nili, macimi Labrye, iwv; chena u pvckv-mrli.

⁴⁶ Macimi nihki u mvwinvchr-wrli u la-ciwv, chena u masanr-wrli.

⁴⁷ Pvyaqv nakuti nihi mrlrqvhi na-nepvwitv u luhfanv u gisghikv macimi u pigita-whrli nili ut vlo-lrkv-nvli inv mospi-makufewi mkvtaukulvia, chena u gisgahsat-whrli.

⁴⁸ Macimi rpvfsa Jesise, Hv ki biaci luhfr-pwv, brsi ki mvwina-whrwv jekuniwahfi, ki biaci gisghi-kvni-pwv chena cifhi-kvnv wvhsi mvwinvchi-yaqa?

⁴⁹ Tfana wrpvgi nit vpi weci gelvwv ini mvmrtumawi-kvmikugi ni pami kvgahgimiwa, mvtv ki masani-pwv : pv-yaqv wvhsi manvwvh nili tapilo awigrda-wvli uqrufado-daki uci yomv si lvwepi, u talvhi.

⁵⁰ Macimi jrivhki nihki usimoki chena u nvkvlr-wrli.

⁵¹ Chena nr-nakuti mvyrni ’laneli u weci nakvla-goli, u pvh-nemali mvfrni-mutv vkholi, svhsrgidweli : macimi nihki u ma-sanr-wrli nili;

⁵² pvyaqv inv u nvkvcitv ini mvfrni-mutv, macimi usimu svhsrgitwi,

⁵³ Chena nihki nili mospi-makufewi mkvtaukulvyali u tasi walr-wrli Jesiseli : macimi ’n’tvsi u biaci mrwvsgr-makuhi inv nihi jrivhki ugimrwi mkvtaukulviahi chena nihi gigi-lanihi chena nihi yr-ivwigalici.

⁵⁴ Chena Betv naiahkv paluwihi u tah nakv-lrli, tapiloga betiga ini yr-tvh tapuwalici nili mospi-makufewi mkvtaukulvyali; macimi bami wetvbe-mrci nihi wiahsi-makufe-wanhi, chena bami vwvfuci ini tvh dapvhkulagi skuta.

⁵⁵ Huwa nihki u-gimrwi mkvtaukulvyaki chena inv jrivhgi dapuwatv u nvtunahvmvwr-wrli Jesiseli dabwawa wvhsi nabowa-nagi si bonr-wrci; macimi u qelr-nrwv ini.

⁵⁶ Xvga maci myrsi dabwawa u pvhginv-mvwr-wrli, macimi ini u dabwawa-nwv mvtv mrwvtwi nakudwr-cimo-yrli.

⁵⁷ Chena ’n’tvsi nr-nakuti pami pvfaqi, macimi myrsi dabwawa u pvhgi-nvmv-wrli,

⁵⁸ Ni notvwrpa inv, Nah mvci-lutv yomv mvmrtumawi-kvmiqi ulaci-wvli waci macdo-dagi, macimi nfuku na hupvtanv kutvgi buryr ulaci-wvli uci macdo-dagi iwv, iwvli.

⁵⁹ Chena mvtv data-pilvhi yone si mrwvtwi nakudwr-cimo-yrli u dabwawa-nwv.

⁶⁰ Chena inv mospi-makufewi mkvtaukulvia pvfaqi ini alaghi, chena u nvtuhtv-wrli Jesiseli, Hv mvtv wiahi gid rpvfsa? nahiwa ini iuhkumv ki cvhf vwrci-magoki? u talrli.

⁶¹ Pvyaqv ud ryetvtanv u nolawewa, macimi mvtv-wiahi rpvfsa. Nuhgi inv mospi-makufewi mkv-taukulvia u nvtuhtv-wrli, Hv geiv inv Klvisde, nili u Qihfvli inv Gisrciwafinv? u talrli.

⁶² Macimi Jesise, Neiv inv : macimi gah nawrwv gelvwv inv u Qihfvli llani pami lamvtvpita ini u mvyr-wengigi Wrsikvgi, chena pami biaci wedatvga nili brfqvhki manqvtugi uci isiwa.

⁶³ Macimi inv mospi-makufewi mkvtau-kulvia u lalginrnv u betanikvnv, chena Nahiwa gawvgi ga huci skvtv la-lamrpa da-bwawanvki?

⁶⁴ Ki mahci nodr-nrwv ini pvhdrmowa : nahiwa ki tasi taha-pwv? isiwa. Macimi jrivhki nihki u mvtvhkuwrlr-wrli wvhsi nabowa-filici.

⁶⁵ Macimi nrlatv ut vlami fe-faqrlr-wrli, chena u gibeqawhr-wrli, chena u be-pqilacwhr-wrli, chena Mosigesqrci-mulu, u talr-wrli : chena nihki wiahsi-makufewa-nvki utvhpanr-wrii u wetvtwhr-wrli u laciwv.

⁶⁶ Chena yasi Betv sebrci vpici ini tvh-tapuwagi, ’n’tvsi biali nakuti nihi ut iqafamhi inv mospi-makufewi mkvtaukulvia;

⁶⁷ macimi inv u nawrli Betvli bami vwvfulici, u mamaginr-pvmrli, chena Gelv nahfrpi gi weciwi inv Nrsaleni-lani, Jesise, iwvli.

⁶⁸ Pvyaqv gircimu, Mvtv ni wrkutv nuhgi mvtv ni nanuhtv gelv ya-iuivni isiwa : chena luhfa ini tv spvhqigr-nigi hawv; macimi inv nrbaiv kvlhotvmwv.

⁶⁹ Chena nili iqafvli u nvugoli, macimi Yrmv inv nakuti nihki, ut vlami ilvhi inv nihi na-nepvwilici mrlrqvhi.

⁷⁰ Pvyaqv nuhgi gircimu ini. Chena palocihi nuhgi nihki na-nepv-wicki mrlrqvhi, Dabwawa gelv inv nakuti nihki; xvga Galalewi-lani gelv, u takuhi Betv.

⁷¹ Pvyaqv vlami mvci kvlvwi, macimi mvdrmu, Mvtv ni wrkumv yrmv ilani yr-cimaqa, isiwa.

⁷² Ma-cimi walanv ini mvwi-nesana inv nrbaiv kvlhotvmwv. Chena Betv u mkvwa-latv ini kvlvwewa, Wihsi-bur ini nesana kvlhotvgi inv nrbaiv nfana gah gir-cimi, ya-kuci Jesiseli. Macimi iah mamagina-latvgi ini, wihfvqa.