YA-SFADOCI MRKV 13 - Hini Uwasi-u-Biadrcimowa 1929

¹ Chena yasi frgici si wapfaci ini mvmrtumawi-kvmiqi uci, nakuti nihi u kvgahgimrfhi, Ga-gahgimiwa, wrpvtvnu, cah lvkuqa ya-tuwrci sekunvki macimi wegiwr-pvli cah lvkuqa yaki ! u tagoli.

² Macimi Hv gi namanv yolumv mvgi wegiwr-pvli? mvtv wa cikunofu u-tvsi nakuti sekunv usgici kutvkvli, wvh bur svhgigi ipvgilo-futv u talrli Jesise.

³ Chena yasi lamvtvpici wahsatagi ini Vlifiwi maqvhgigi ya-lvhfvm-fagi ini mvmrtumawi-kvmiqi, Betvli chena Jamseli chena Jr-neli macimi Andloli u gemi nvtuhdr-kuhi,

⁴ Wetvmvwi-nrga drniwa lrqv yolumv wiahi wa vhdawv? chena nahiwa wa hinwi ini giginolowa ina nvwitu jrivhki yolumv wiahi wah macdrqvtu? u takuhi.

⁵ Macimi Jesise ut vlami ilvhi, Gcitvwr-feku wvhsi bur ilani bemi walal-wrqa.

⁶ Maci wah biaki ni wefowa-nagi, Neiv inv, wa hiwvki; macimi maci wah bemi walr-wvhi.

⁷ Chena ina nodrga-yaqa nochadewa-nv macimi nochadewanv lrcimowanv, tagi batfvgi-taha-yaqa : yolumv wiahi qelvhi brbiaci wah biamikv-tu; pvyaqv ini jaiahqewa mvtv ga-wvgi.

⁸ Xvga nakudwa-lanv si lanvwa wah pvfaqicfvtv-wrli nakudwa-lanv si lanvwali, macimi ugimrwewa u pipahtanv ugimrwewa; wa vhdawv ’n’tvsi vsisgi-nomasgrwanv cvjapi tvsi; wa vhdawv ’n’tvsi sasqrlvwawvh-kvmigiki : yoloni wiahi uwa waci vlamvh-kvmigigi ini vhqi-lrsvmvmowa.

⁹ Pvyaqv geyrwrgi mvmaku gcitvwrfewa : xvga tapuwawanv nihki gah si pvgfanaku-wrki; chena betiga msi-kvmiku ga p’pvgtahugo-pwv; macimi ya-lvhfvme-wrci kvpanvleki chena mvgi ugimrki gah nepwi-pwv xvga neiv uci, wvhsi nihki u dabwami-wrci.

¹⁰ Chena ini uwa-si-biadrcimowa brbiaci nhihtv wah nvnvhimo-foki jrivhki nihki tfwa-lanv si lanvwaki.

¹¹ Chena tapuwawa-nagi si walal-wrqa nihki, macimi masanal-wrqa, tagi kih negrni wesrfe-pwv wv hiu-yaqa : wakv goqa-nahi-grci gah melago-pwv ina ini yrtafvgi, yone kvlvwiku gelvwv; xvga mvtv ini gelvwv ga-kvlvwicki, inv Ufapi Ucvjrlvhqv wakv.

¹² Chena ujaninrnv nabowa-nagi wah si pvgfa-nrli ujaninr-nrli, chena inv ufimv ut vpaluhfa-mvli; chena vpaluh-fvki wah pvfaqic-fvtvwr-wvhi u gahgirm-wvhi, macimi wvhsi nfaqilici wa ipa-nvlr-wvhi nihi.

¹³ Chena gah segalamakufe-maku-wrki gelvwv jrivhki ilaneki xvga ni wefowa uci : pvyaqv inv nvhekv iahqi wesigi-ta-hatv, henv inv wah wrpvnas-hofu.

¹⁴ Pvyaqv ina nawaqa gelvwv inv Ivsegrci si seqvh-kvmigife-wanv pami nepvwi wvh tvh bur si Ivweci (inv la-lrbrtutvkv welrni wih nanuhsa), hena uwa welrni nihki Cudiagi ya-picki nili maqvh-giki wih lasimoki :

¹⁵ chena inv ini vkucikvmi wegiwv ya-pitv we-lrni tagi wih Irsiwa, walr tagi wih becfa, wvhsi luhfv-doci wiahi ya-drci wegiwv uci :

¹⁶ chena welrni inv ini Ir gtikv ya-pitv tagi patagi udrnrgi wih si nrta u godemi.

¹⁷ Wakv mvci-labwrwa-neki cahi nihki la-lrmudr-kucki vpaluh-fvli chena nihki na-nonhi-wacki nala grsagiki !

¹⁸ Macimi mvmrtumaku cahi gelvwv wvhsi bur ini vhdagi qanv ini babogi.

¹⁹ Xvga nala grsagiki wa vhdawi gesanrci-nvmowa, yagi ‘ntvsi mvtv-lrqv mah’ vhdawi ini yagi ina vlamvh-kvmikvtwi ini mahda-lamiwawa uci, mviahda-latvgi Mvnatu brlu’ hinugi, macimi mvtv gidani wa ’dawi.

²⁰ Chena waciwaphi inv Dabalamiwatv naiahkv ujaginvga nili grsagiki, hiahgi mvtv wivufi ivh mahci wrpvnas-dota; wakv xvga inv uci ma-mvyruho-futv, ma-mvmrci inv, inv ujaginrnv nili grsagiki.

²¹ Chena ina uwa qahqi wiyafv ilani Sci, vlv-yrmv inv Klvisde; walr, Sci, ’nitvsi; ga hikuwv, tagi dapawahtv-muku ini :

²² xvga wah pvfaqeki ’n’tvsi myrsi Klvis-deki chena myrsi mrmosigesqacki, macimi wah wrpvtasi-waki gigi no-lo wan v chena lvkuqahdrni-wiahi, wvhsi manvwvh’ bemi wasiwa-wrci nihki, qahqi kvtvwiga, nili mayruho-fulici.

²³ Pvyaqv gcitvwr-feku gelvwv : wrpvtv-muku, naiahkv gi mahci wetvmola-pwv jrivhki wiahi grsv.

²⁴ Ina nala grsagiki, vhkuwihi ini gesanrci-nvmowa, inv gesagi-gesfwv wah papagic-hofu, macimi inv tapahgi-gesfwv mvtv wah meliwa u wvhfa-yrmi,

²⁵ chena nihki vlrqvki wah pami manqvtwi uci pansinoki, macimi nili wrsikvki betiga ya-daki nili manqvtu wah nrnomanota.

²⁶ Macimi ina uwa nihki wah nawr-wrli nili u Qihfvli ilani pami biali brfqvhgegi gilagi msrwi wrsikvgi macimi wvhfrci-makufewa.

²⁷ Chena uwa inv wah wrwe-nvhi nihi ancvlihi, macimi wah mrwvtwi mrwvtu-nrli u mvyrwafe-mvli nili nyawi mahsi-gikvki uci, ini wihkuci laghi ini vsisgi-drmqa uci brlu’ hini wihkuci laghi ini manqvtwi.

²⁸ Huwa inv gicimesv uci wrkutafiku u pamrtuwawa : hina inv u pgaivh-kufewa uwa ia’ kukusqr-figi, macimi pvskvh-qaiv u msis-gamv, ki wrkudr-nrwv gelvwv yasi mrlrqr-mvdo-figi ini ba-lrwigi;

²⁹ yone datapilvhi nahfrpi gelvwv, ina nama-yaqa yolumv wiahi pami biami-kvtu, wrkutv-muku yasi uwa inv mrlrqr-mafici, datapilvhi nvhekv nili sqrda-wvli.

³⁰ Tapilo gi tala-pwv nelv, Yrmv inugi sqewanv mvtv wa hvsanwv, brlu’ jrivhki yolumv wiahi wah macdrqvtu.

³¹ Manqvtwi macimi vsisgi-drmqa wa hvsanu : wakv ni kvlvwewanv mvtv wa hvsanu.

³² Pvyaqv ina ini grsagigi walr ini yrtafvgi mvtv wiyafv u wrkutv, mvtv weginrqi nihki ancvleki betiga wafapvh-kvmigigi, mvtv nuhgi inv Uqihfimv, inv Ufimv wakv.

³³ Gcitvwr-feku gelvwv, gcitvwr-piku macimi mvmrtumaku : xvga mvtv ki wrkudr-nrwv ina ini Irqv.

³⁴ Brsi ina ilani inwi ini, pam’ rmi kutvgi vsisgegi, u pami mahci nvkvtv ya-drci wegiwv, macimi u mahci melvhi simakufewa ut vlolrkvnhi, mosv nakuti u pakv-tafewa, nahfrpi u tapimrli nili sqrta-gahcitvwvh-dolici wvhsi gcitvwr-pilici.

³⁵ Gcitvwr-piku waciganvhi : xvga mvtv ki wrkudr-nrwv gelvwv ina inv dabalatvkv ini wegiwv wvh birci, qahqi tuga ulrqefiga, walr lrwi tapahgiga, walr nrbaiv kvlhotvga, walr ini kulvh-whrpvga;

³⁶ belabaga gikvmoci pami birta gi mgr-kuwv inv bami nabr-yaqa.

³⁷ Chena ya-lalvku gelvwv ni talrki nelv jrivhki, Gcitvwr-piku.