YA-SFADOCI MRKV 12 - Hini Uwasi-u-Biadrcimowa 1929

¹ Chena ut vlami kvlo-lvhi pamrtuwawanv. Hilani u tutu mfv-lomi-gtikv, macimi u wvghv gryrukv ini, chena wrlga wrsrlvqi wvhtv vhdagi wvenewi-fegija-picikv, chena upvtanv mkvhqikv, macimi u tvuhvhi gtigawi-lanihi ini, chena pvivgilv drmqa hawv.

² Chena tvh qanv ini Irqrmgi u ta laskvmv-wvhi vlolrgr-fvli nihi gtigawi-lanihi, wvhsi manvwvhga nihi gtigawi-lanihi uci utfakuci nili mv-wifowanv ini mfvlomi-gtikv uci.

³ Macimi nihki u masanr-wrli nili, chena u pipvgtawhr-wrli, chena ud rmaskvwr-wrli sasibrfeli.

⁴ Chena nuhgi u ta laskvmv-wvhi nihi kutvkvli vlolrgr-fvli; macimi nihki u mvmyrlvghr-wrii nili ini welagi, chena u wrpvlrci-panvlr-wrli.

⁵ Chena u ta laskvwrli nuhgi kutvkvli; macimi nili u nfr-wrli nihki : macimi maci kutvkhi; u pami pipvgtawhr-wvhi nrlatv, chena u nfr-wvhi nrlatv.

⁶ Hinv gawvgi vhsi nakuti u bonrli, ivh-qalamaku-filici uqihfimrli : nileni u ta laskvmv-wvhi nihi jaiahqi, Wa hutvga-lamrwrli ni qihfvli, iwvpi.

⁷ Pvyaqv nahga gtigawi-laneki ideki alagenv welvwv, Hinv-yrmv Ivyrpi-tabalaci-gatv; welrni nfrdrku, macimi ini lrpi-tabalaci-gawa ga hu welrmipa.

⁸ Macimi u masanr-wrli nili, chena u nfr-wrli, chena ini mfvlomigtigr-nagi uci luhfa-pvgilr-wrli.

⁹ Nahiwa waciganhi wah si Ivwi inv dabalatvkv ini mfvlomi-gtikv? wah biawv inv macimi wah mvcilutv-wvhi nihi gtigawi-lanihi, chena kutvkhi wah melvhi ini mfvlomi-gtikv.

¹⁰ Hv mvtv ki mah’ Irbrtudr-nrwv vlv-yomv datapilvhi tapilo awigrdagi : Nili sekunvli ya-lvwinvwrwrci nihki wrgigrcki, Hinv ivskv machofu u wesiwi ini bojrgi;

¹¹ Yrmv inv Dabalamiwatv uciwi, Macimi inv inv vnhiwawi-nrkufi ki sgesakunrgi?

¹² Chena nvtunahi-gaki nihki wvhsi masanr-wrci; macimi u kufr-wvhi nihi mahsa-lalici; xvga nihki mosi-tahaki yasi inv gilagi-mrci nihi ini pamrtuwawa-nagi : chena wapfaki nihki macimi u nvkvlr-wrli nili.

¹³ Chena u ta laskvwr-wrli nihki nr-nakuti nihi Palasihi chena nihi uci Haladefhi, wvhsi nihi manvwvhga pathvna-kuci u kvlvwewa-nagi.

¹⁴ Chena iah birwrci nihki, Ga-gahgimiwa, ni wrku-drpa gelv gi mvyrwelafi, macimi mvtv wiah’ gi ta lalamv wiyafv; xvga mvtv wiah’ gi ta laladrnv nili weyrwv ilaneki, wakv dabwawa uci gi kvgahgimiwa ini u myawi Mvnatu : Hv mvyrw-vtwi ini kutaladewa-nagi wvhsi melo-fuci daxewi muni Sesv, walr tuga mvtv? u takuhi.

¹⁵ Hv nah meli-wapa, walr tagi nah meli-wapa? Pvyaqv welv, u pami wrkutvmv-wvhi u naluhci-lvwewa-nilici, Gociwa ki kutvh-kuwrsi-pwv? biatv-wiku tanalivs’ wvhsi namaiv ini u talvhi.

¹⁶ Macimi nihki u biado-nrwv ini. Nafvwa u geshowa yomv macimi u Is-pvwigrfowa? u talvhi. Macimi Sesv welv u takuhi.

¹⁷ Patagi melahku Sesv ini wiahi Sesv welv, macimi Mvnatu ini wiahi Mvnatu welv u talvhi. Chena ulrmi u qvqahdrna-lama-kuhi nihi.

¹⁸ Chena ’n’tvsi utfa-kuhi Satusihi, nihki mvtv-lrqv rpafe-wi-unsgrwa yr-iucki; chena u nvtuhdr-kuhi nihi,

¹⁹ Ga-gahgim-iwa, Mosise nit vwigr-kunv, Qahqi ilani u janinrli napalita, macimi udrnrgi nvkvlrta inv wewvli, chena bur nvkvlrta vpaluhfvli, wvhsi u janinrli lrpsi-nalici nili wewvli, macimi upvtanvmv-wrci menkv u janinrli.

²⁰ ’N’tvsi vbeki neswvhfwi ujaninrki : chena inv wasgi uslatvmwv wewvli, macimi nabofi mvtv u nvkvtv menkv;

²¹ chena inv mvwi-neswi Irpsi-nwv nili iqali, macimi napwv, mvtv nvkvtvma menkv udrnrgi; chena inv mvwi-nfwi ini ivskv :

²² macimi inv neswvhfwi mvtv u nvkvtv menk. Jaiahqi nihki jrivhki inv iqawv nahfrpi napwv.

²³ Hini rpafewi-unsgrwa-nagi drnvwa wah wewi-nrli nili nihki? xvga nihki neswvhfwi u mahci bonr-wrli nili wvhsi wewi-wrci u takuhi.

²⁴ Hv mvtv yoni wv uci bemi Ivwe-yaqa, ya bur gelvwv wrkutv-maqa nili tapilo awigrda-wvli, nuhgi ini u wesikvtuwewa Mvnatu? u talvhi Jesise.

²⁵ Xvga ina wa hunsgrki nihki nili na-palici uci, mvtv nihki wah wechadeki, mvtv nuhgi wechadewa-nagi wah si melatipi; wakv brsi ancvleki betiga wafapvh-kvmigigi.

²⁶ Wakv yasi nvmu-wrci nihki na-pagiki, hunsgrno-foki nihki; hv mvtv ki mah’ Ibrtudr-nrwv ini ud awigrda-magi Mosise, ini tv hrtudo-dagi ini Bewvlwi, yasi kvlola-kuci Mvnadoli, Neiv nileni u Mvnado-mvli Aplahame, chena nileni u Mvnado-mvli Visigi, chena nileni u Mvnado-mvli Jakvbe?

²⁷ Mvtv nileni u Mvnado-mvli inv na-pakv, hinv bami lanvwa-witv wakv : ulrmi ki br-bemi Ivwe-pwv gelvwv.

²⁸ Chena nakuti nihki yr-ivwi-gacki biawv, macimi u notv-wvhi nihi pam mrwvtwi nvtuhsahi, macimi wrkutvmwv yasi inv mahci uwasi rpvftv-wrci nihi, u nvtuhtv-wrii, Drniwa tapigamowa ini na-nhihdr-wigi jrivhki? u talrli.

²⁹ Jesise rpvfsa, Hini na-nhihdr-wigi vlv-yomv, Nodrgalu, O Iswelv; Hinv Dabalamalvqa ki Mvnado-manv inv; inv Dabalamiwatv nakutiwi :

³⁰ chena vhqa-lami gelv inv Dabalamiwatv gi Mvnado-mv gilagi jrivhgi gi tahi, chena gilagi jrivhigi gi mvyrwi-geiv, chena gilagi jrivhgi gi mamagini-tahrkv, chena gilagi jrivhgi gi wesikvtuwewa.

³¹ Hini mvwi-neswi vlv-yomv, Vhqa-lami gelv gi mr-biacigr-lademv brsi geiv. Mvtv-lrqv ku-tvgi tapigamowa vlikv yagi yolumv, u talrli.

³² Macimi Dabwawa, Ga-gahgimiwa, g’uwasi mahtuwa yasi inv nakudefici; chena mvtv-lrqv kutvkv inv pahi, u tagoli nili yr-ivwi-galici :

³³ Macimi wvhsi vhqa-lamo-fuci gilagi jrivhgi ini utahi, chena gilagi jrivhgi ini labwrwa, chena gilagi jrivhgi ini wesikvtuwewa, macimi wvhsi vhqa-lamrci mr-u-biacigr-lademvli brsi weiv, msi vlikv-inwi notv jrivhki mafi fvgfigawi-botafvmr-cikvnv, chena vpanvwawanv u tagoli.

³⁴ Chena iah namagi Jesise yasi gcitvwrfi rpvfsaci, Mvtv paluwi git vpi uci ini Mvnatu u gimrwi-drmkumi u talrli. Macimi mvtv gida-ni ilani ina uci wesv nvtuhtv-wrli wiah’ si nvtuhsawa.

³⁵ Chena rpvfsa Jesise yasi kvgahgimi-waci ini mvmrtuma-wi-kvmikugi, Nahiwa si iwvki nihki yr-ivwi-gacki yasi nili Klvisde li u qihfici Dapide?

³⁶ Dapide nahvlwrkv welv iwv betiga nili Ufapi Ucvjrlvhqvli, Hinv Dabalamiwatv u talrli ni Dabalamiwa-mvli, Lamvtvpilu gelv ni mvyrwen-gigi, Brluh’ ni nashrki gi mvda-ladewa-nvki ini ut pvlgewa gi fitvli.

³⁷ Dapide nahvlwrkv welv Dabalamiwatv u tasi-nrli; nahiwa u tasi u qihfi-nrli nili? iwv. Macimi nihi nahcipah’ lanvwahi u manwi nodr-kuhi.

³⁸ Chena u pami kvgahgimiwawa-nagi, Mvhgani cahi nihki yr-ivwi-gacki, mr-mrtvwi brmfacki ginwi pihtvwi-betanikv-nagi, chena wvhsi bonvmu-wrci usilvwr-ladewanv betiga nili yr-tvh we-wedgeki,

³⁹ chena vliwi yaki vhpvbewanv betiga nili msi-kvmiku, macimi vliwi yaki tvh we-wihfancigaki :

⁴⁰ jr-jrkvtvmv-wrcki ya-dr-lici wegiwr-pvli sekvwi-iqahi, chena naluhci-lvwewa u wv uci usdo-nrwv pihci mvmrtumawanv; iuhgoni wa hutfaku-nrwv vliwi yagi mvtvh-kuwrfowa, iwv.

⁴¹ Chena ya-lvhfvm-fagi ini munikv si lamvtvpi, macimi u ta-lrpvtv yrsi ini munigr-nagi ipvgitvmu-wrci muni nihki mahsa-lagiki : macimi maci ba-pvwrcki ut ipvgidr-nrwv maci laghi.

⁴² Chena ’n’tvsi biawv nakuti gitamv sekvwi-iqa, macimi u becfa pvgidrnv neswi mrcqrfi muni, pvhfi sansi biaiv nili.

⁴³ Chena u tah wih-kumvhi u kvgahgimrfhi, macimi Tapilo gi tala-pwv nelv, Yrmv gita-mv sekvwi-iqa u becfa pvgitv vlikv tfwi notv jrivhki nihki bami ini si becfa pvgitv-giki munigr-nagi :

⁴⁴ xvga jrivhki nihki ut ipvgidr-nrwv ud rmafewa-nwv; wakv inv ut vgrwrfewa u becfa pvgitv jrivhki ba-bonvgi, datapilvhi ini jrivhki waci lanvwa-wici, u talvhi.