YA-SFADOCI JRNE 3 - Hini Uwasi-u-Biadrcimowa 1929

¹ Huwa ilani ntvsi vpiwv nihki Palaseki uci, Nakvdemvse si-nofu, dabalamrtv nihi Josvhi :

² hinv ivskv udfrli nili tapahgi biawv, macimi Labrye, ni wrkudrpa yasi Mvnatu uci birivni gelv gagahgimiwatv; xvga mvtv wiyafv ivh kvtvwi yolumv giginolo-wanv si lvwi yrsi lvweivni, waciwaphi Mvnadoli weje-makuta, u talrli.

³ Jesise rpvfsa macimi, Tapilo, tapilo, gi tala nelv, Waci-waphi wiyafv mvivgi usgi-lanvwawita, mvtv inv u tvh kvtvwi nama ini ugimrwi-drmkumi Mvnatu, u talrli.

⁴ Nahiwa wihsi kvtvwi usgi-lanvwawi ilani ina pvsidofiwita? hv wih kvtvwi mvwi-nesana becfvtvmv-wrli u Irmvdrkv-nilici u gali macimi wi husgi-lanvwawi? u talrli Nakvdemvse.

⁵ Rpvfsa Jesise, Tapilo, tapilo, gi tala nelv, Waciwaphi wiyafv napi macimi nili Ucvjrlvh-qvli uci usgilanvwawita, mvtv inv u tvh kvtvwi becfvtv ini ugim-rwi-drmkumi Mvnatu.

⁶ Hinv wa-usgi-lanvwawitv ini wivufi uci wivufiwi; chena inv wa-usgi-lanvwawitv nili Ucvjrlvhqvli uci ucvjrlvhkuwi.

⁷ Tagi qvqahdrni-tahalu, Qelv’ husgi-lanvwawiku yasi ilalv.

⁸ Hini mahsigikvgi bodrcigaiv goqa tvsi yasi tahayrgi, macimi gelv gi notv yasilwagi ntvsi, pvyaqv mvtv gi wrkutv wa-moyrgi ini, macimi yahayrgi ini; yone yagi jrgi wiyafv wa-usgi-lanvwawitv nili Ucvjrlvhqvli uci, u talrli.

⁹ Nakvdemvse rpvfsa macimi, Nahiwa wihsi kvtvwi inu yolumv wiahi? u talrli.

¹⁰ Jesise rpvfsa macimi, Hv gelv nili u kvgahgimrmvli Is weiv, macimi mvtv gi nanuhdrnv yolumv wiahi?

¹¹ Tapilo, tapilo, gi tala nelv, Ni kvlvwipa ini wvyrkutvmrga, chena ni pvh-nemapa dab-wawa ini mviahci namayrga; macimi gelvwv mvtv ki utvhpanr-nrwv ni dabwawananv.

¹² Qahqi wetvmolvku vsisgi si wiahi macimi mvtv ki dapwahdr-nrwv, nahiwa gah si gelvwv dapwahdr-nrwv wetvmolvku manqvdowi si wiahi?

¹³ Chena mvtv wiyafv manqvtugi mah’ lrfiwa, i-nv wakv mankvtugi waci lrsiwatv, data-pilvhi nili u Qihfvli ilani, yapitv mankvtugi.

¹⁴ Chena yasi Mosise nemvtwhrci nili mvnadoli ini Ir belasgi, yone datapilvhi qelvhi inv u Qihfvli ilani si nemvdhofuci;

¹⁵ wvhsi waciganvhi goqa-nafv-grci dapwahsa manvwvhi bonvgi u weyrwilici goqa-lrqvsi lanvwawewa.

¹⁶ Xvga yone u tasi vhqalatv Mvnatu ini yalakuqvh-kvmigigi, waciganvhi meliwa u nakudo-srkvnvli u Qihfvli, wvhsi goqa-nafv-grci dapwahtv-wrta nili bur iqinaci, wakv bonvgi goqa-lrqvsi la-nvwawewa.

¹⁷ Xvga Mvnatu mvtv u tah wrwenaskvwrli nili Uqihhmrli ini yalakuqvh-kvmigigi wvhsi wiah-lvhkuwrtv-malici ini yalakuqvh-kvmigigi; wakv wi hini yalakuqvh-kvmigigi wrpvnasdodagi srpwi nili.

¹⁸ Hinv da-dapwahtv-wrtv nili mvtv wiah-lvhkuwrfu : inv buryr dapwahsatv naiahkv mahtvh-kuwrfu, xvga inv mvtv naiahkv u dapwahtv ini u wefowa inv nakudo-srkv u Qihfvli Mvnatu.

¹⁹ Chena vlv-yomv ini lvhkuwrfowa, yasi ini wvivhfayrgi ini yalakuqvh-kvmigigi biayrgi, macimi ilaneki vhqalatv-muwrci grjekv ini bapagijrgi notv ini wvivhfayrgi; xvga u pakvtafewanwv mvjrfi.

²⁰ Xvga jrgi wiyafv majrfigi yasi lvwetv u segalatv ini wvivhfayrgi, macimi mvtv ini wvivh-fayrgi ivh si biawv, belapa u pakvtafewanv wih mvdrtudodali.

²¹ Wakv inv ini dabwawa yasi lvwetv ini wvivhfayrgi si biawv, wvhsi u pakvtafewanv manvwvhi tapinvuqidodaki, yasi nili mahci pakvtanodaki Mvnadogi.

²² Hvhkuwihi ina yolumv wiahi ini Cudiawi drmqagi si biaki Jesise macimi u kvgahgimrf hi; macimi n’tvsi u nvkvhsino-mvhi nihi, chena fvfvhqi-ulalhiwa.

²³ Chena Jrne nahfrpi bami fvfvhqi-ulalhiwaci Ainvnegi mrlrqvhi Salime, xvga ntvsi mama-kvnwi napi : macimi nihki biaki, chena fvfvhqi-ulalhofoki.

²⁴ Xvga mvtv Jrne mah’ becfa-pvgilofu giphudewa-nagi.

²⁵ Waciganvhi ntvsi pvfaqeiv nvtuhdwrdewa ini wvyatvhqa u kvgahgimrfhi Jrne gilagi Josvli yagi ufapi-lvwewa.

²⁶ Chena nihki Jrneli si biaki, macimi, Labrye, inv wa-wetvfomahkv ini vlikv wiyaci Jrtane, mviahci pvh-nemvwvtv dabwawa, wrpvmi, fvfvhqi-ulalhiwa inv ivskv, macimi jrivhki ilaneki nili si biaki, u talrwrli.

²⁷ Hrpvfsa Jrne macimi, Ilani kvtvwi utafi mvtv-wiahi, waciwaphi manqvtugi uci mahci melata ini.

²⁸ Gelvwv nahvlwrkv ki pvh-nemvwipwv dabwawa, Mvtv neiv inv Klvisde, yasi iuiv, wakv yasi nelv negrnaskvwigi inv.

²⁹ Hinv ba-bonrtv nili mvivgi-nhrkvnah-qali mvivgi-nhrkvnv inv : wakv nili wih-grnvli inv mvivgi-nhrkvnv, na-nepvwilici macimi nodrkuci, msi-usvsilabwrli xvga ini mvivgi-nhrkvnv u ta sihsimowa : yone yomv waciganvhi nelv n’usvsilabwrwa uqrwi sdota.

³⁰ Qelv’ hinv wa sqelafi, wakv nelv qelvhi na hujagelafi.

³¹ Hinv spamagi wa-makv sbalamakufi jrivhki : hinv ini vsisgi-drmqa waciwitv ini vsisgi-drmqa uciwi, macimi ini vsisgi-drmqa ud rtutv : inv manqvtugi wa-makv sbalamakufi jrivhki.

³² Hini mviahci inv namagi macimi notvgi, u pvh-nema ini si dabwawa; macimi mvtv ilani utvhpanv-mvwrli u dabwawa-nilick.

³³ Hinv mviahci utvhpanv-mvwrtv u dabwawa-nilici mahci pashvlwa yomv, yasi Mvnatu dabwawici.

³⁴ Xvga inv Mvnatu mviahci wrwenaskvwrci kvlvwi nili Mvnatu u kvlvwewanv : xvga inv mvtv tapvcikv si meliwa nili Ucvjrlvhqvli.

³⁵ Hinv Ufimv ut vhqalamrli nili Uqihfimrli, macimi u laciwilici si meliwa jrivhki wiahi.

³⁶ Hinv da-dapwahsatv nili Uqihfimrli u bonv goqa-lrqvsi lanvwawewa; wakv inv buryr malunah-tvwrtv nili Uqihfimrli mvtv wah nama lanvwawewa, wakv ini u gidawa Mvnatu wa vdali weyrgi.