HINI UWASI-BIADRCIMOWA ya-sfadoci MAFIYO 9 - Hini Uwasi-u-Biadrcimowa 1929

¹ Macimi inv ulvga-lagi Ikvmwv, chena grmagi hawv, nahvlwrkv ut udawa-nagi si biawv.

² Macimi wrpvmahku, u biatvwrwrli nihki ilaneli vhqilugali ini nanagifewa, saxinoli tfvnagi : macimi u namvwvhi u dapwahsawa-nilici, Uqihfimv, uwasi-labwrlu; gi mvjelafewanv pvgfa-ladota, utalrli Jesise nili ya-vhqilugalici ini nanagifewa.

³ Chena wrpvmahku, nr-nakuti nihki yr-ivwigacki, Pvhdrmu yrmv ilani, iwvki weyrwrgi.

⁴ Macimi Jesise u wrkutvmvwvhi u tasi tahawa-nilici, Gociwa majrfigi ki tasi tahapwv iwv.

⁵ Xvga drniwa ini vlikv wa-cihi, wvhsi, Gi mvjelafewanv pvgfa-ladota; walr tuga, Unsgrlu, macimi pamfalu, iugi?

⁶ Wakv wvhsi gelvwv manvwvhi wrkutvmaqa yasi inv u Qihfvli ilani bonvgi simakufewa usgi-drmqa wvhsi pvgfa-latvgi mvjelafewanv (hina uwa nili ya-qilu-galici ini nanagifewa), Unsgrlu, macimi mvmahq gi tfvni, chena nhrla wegiwv ya-drivni, u talrli nili.

⁷ Chena inv unskv, macimi wapfa ya-drci wegiwv hawv.

⁸ Pvyaqv nihki mahsa-lagiki iah namu-wrci ini, grwilv-waki, macimi u wvhfrci-makuwhr-wrli Mvnadoli, mviahci melrtv simakufewa ilanihi.

⁹ Chena yasi ini uci pamfaci Jesise, u nawrli ilaneli, Ma-fiyo yr-lofoli, bamvhga-pilici yr-tvh mrwvtuno-dagi taphi-gawa : macimi Nakvsilu, u talrli. Macimi inv pvfaqi chena u nakv-lrli.

¹⁰ Chena ini biaiv wvhsi pamfa-yrgi, yasi lamvtv-pici tvh wihfanigi betiga ini wegiwv, wrpvmahku, maci mrwvtu-nigah-feki chena majela-ficki biaki chena u wetvbemr-wrli Jesiseli macimi u kvgahgimrfhi.

¹¹ Chena iah nihki Palaseki namu-wrci ini, Gociwa u wihpu-mvhi ki kvgahgimiwa-mwv nihi mrwvtu-nigah-fihi chena majelafilici? u talr-wvhi u kvgahgimrfhi.

¹² Pvyaqv iah notvgi ini, Nihki wr-sikvtu-wicki mvtv ut vgrwrlr-wrli nr-nvtvuci-galici, nihki wakv ya-qilu-gacki, iwv.

¹³ Pvyaqv nhrkuna macimi wrkuta-fiku ya-yoyrgi yonfv, Skvtv ni ta la-latv gitaminrqa-ladewa, macimi mvtv vpanvwawa : xvga mvtv ni bir wvhsi nvtu-mvki nihki mayrwela-ficki, majela-ficki wakv.

¹⁴ Hina uwa utfr-wrli nihki Jrne u kvgahgimrfhi, Gociwa gi-tvwilvhi nelvwa chena nihki Palaseki ni fvfvhqi ucigapa, wakv gi kvgahgimrfvki mvtv ucigaki? iwvki.

¹⁵ Chena Jesise, Hv wih kvtvwi nihki ini uci uqihfi-mrki mvivgi-nhrkvna-iqawikv mvwaki, lrqvsi ya-bemaku-wrci nili mvivgi-nhrkv-nvli? pvyaqv nili grsagiki wah biaiv, ina nili mvivgi-nhrkv-nvli wah mvmr-qeki, macimi ina uwa wah fvfvhqi ucigaki, u talvhi nihi.

¹⁶ Chena mvtv ilani u drsi bonv mrlaghi usgi-mutv gahtv betanikv-nagi; xvga wv hini si uhqih-fagi mv-mr-gaiv ini betanikv uci, macimi vlikv si la-lgah-grgi macdota.

¹⁷ Mvtv nuhgi ilaneki u drsi bonr-nrwv mvivgi wveni gahtv wvenewi-bodr-lr-wvhi : belaba nihki wiahsi-wrki puhgicas-grki, macimi ini wveni fegahkv, chena nihki wiahsi-wrki myrla-feki : wakv u drsi bonr-nrwv nihki mvivgi wveni was-gilici wvenewi-bodrlr-wvhi, macimi nayeswi gifusgr-deiv.

¹⁸ Iaha-iahi kvlo-lrci nihi yomv wiahi, wrpvmahku, biawv ’ntvsi ya-lrpvmatv, macimi usvsilvwa-hrli nili, Ni drnahfv datapilvhi uwa iqelafi : pvyaqv birlu chena usgici inv gah si bonv gi laci, macimi inv wah lanvwawi, isiwa.

¹⁹ Chena pvfaqi Jesise, chena u na-kvlrli nili, macimi u kvgahgimrfhi gilagi.

²⁰ Chena wrpvmahku, iqawv, ba-bonvkv mskuwi-lugawa matvhfwi gikvtu gita-neswi, biawv udr-nrgi nili, chena u tah pahsanvmv-wrli ini tv npaniqr-dagi u betanikv-nilici :

²¹ xvga iwv betiga weiv, Muhci kvtasgi pahsanvmv-wvga u betanikv, nah mafafiha-gopi.

²² Pvyaqv Jesise pami kugewv macimi u pami nawvli nili, Udvnfimv, uwasi-labwrlu; gi dapwah-sawa naiahkv gi mafafihaku, u talrli. Macimi inv iqawv mafafi-hofu ina uci yrtafvgi.

²³ Chena iah birci Jesise betiga ini wegiwv ya-drci ya-lrpvmo-futv, macmi u nawvhi nihi bapi-qalici, chena nihi ya-fus-grlici pami tv-tvwrn-gahi,

²⁴ Meli-waku datvwrgi : xvga mvtviu napwv inv iqafv, nabawv wakv isiwa. Macimi u wrpvla-lamr-wrli nihki.

²⁵ Pvyaqv nihki ya-fus-grcki iah luhfa-lgofu-wrci, becfa, chena u tah fvgi-laja-nrli nili; macimi inv iqafv unskv.

²⁶ Chena yomv wrwena-kufe-wa ntvsi uci wapfaiv mafhega ini vsisgegi haiv.

²⁷ Chena yasi ini uci pamfaci Jesise, neswi kvgabeqawi-lani-hi u nakvla-kuhi, pami wivkv-hotv-muhi, Bonv-mvwi-nrga gitaminrqa-ladewa, gelv u qihfvli Dapide, lvhotv-muhi.

²⁸ Chena betiga ini we-giwv iah birci, utfa-kuhi nihi kagabeqawi-lanihi : macimi Jesise, Hv ki dapwahsa-pwv gelvwv yasi dabela-fiv wvhsi yomv si lvweiv? u ta-lvhi. Hvnkv, Dabalamiwatv, u talr-wrli nihki.

²⁹ Hina uwa u tah pahsanvmv-wvhi u sgesaku-wilici, ya-sfagi ki dapwahsawa-nwv ini ipanvlo-fuku, u talvhi.

³⁰ Macimi tvwano-dali u sgesakuwv. Chena u tapinv-laqi-mvhi Jesise, Wrpvtv-muku wvhsi tagi ilani wrkutvgi ini, iwv.

³¹ Pvyaqv nihki wapfaki, macimi u lfwrtudr-nrwv u wrwe-nakufewa mafhega ini vsisgegi.

³² Chena yasi wapfa-wrci nihki, wrpvmahku, ’n’ tvsi biadrqi gagapi ’laneli la-kusgr-kutv wvninah-feli.

³³ Chena iah luhfa-pv-gilo-fulici nili wvninah-feli, kvlvwi inv gagapi ’lani : macimi nihki mahsala-giki qvqahdrni tahaki, Mvtv lrqv ini yone si namota lr Iswelv, iwvki.

³⁴ Pvyaqv nihki Palaseki, Nili ugimr-osrkvn-wrli nihki wvninah-feki uci kvtvwi luhfa-pvgi-lvhi wvninab-fihi, iwvki.

³⁵ Chena mafhega nili udawanv macimi nili udawanafv brmfa Jesise, pami kvgahgimiwa u msi-kvmikum-wrki, chena pami nvnvhi-miwa ini uwasi-biadrcimowa ini ugimrwi-drmqa uci, macimi pami gega-hiwa jr-ivhgi si kvtunawa macimi jrivhgi si vhqi-lugawa.

³⁶ Pvyaqv iah na-wrci nihi mahsa-lalici, u gitaminrqa-lamvhi nihi, xvga qelvhsi tahaki nihki chena lfwasgrki, brsi magefvki bur pami bonrcki gahcitv-wvhaku-wrci.

³⁷ Hina uwa u talvhi u kvgahgimrfhi, Hini kvwvsqhrwa svpkvhi mrlatwi, pvyaqv nihki bakvtaficki mrtfwihi.

³⁸ Mvmrtumahku waciganvhi inv Dabalatvkv ini kvwvsqhrwa, wvhsi ini laskv-wrci br-pakvta-filici u kvwvsqhrwa-nagi.