HINI UWASI-BIADRCIMOWA ya-sfadoci MAFIYO 8 - Hini Uwasi-u-Biadrcimowa 1929

¹ Chena ina ia huci biaci brlvcsigi ini maqvhgigi, maci mahsalagiki u nakvlrwrli.

² Chena wrpvmahku, ntvsi u bialudrgoli wasgilhvga-magilici macimi usvsilvwa-hagoli, Dabalamiwatv, qahqi si tahaivna, gah kvtvwi fvfvyrghi gelv, iwvli.

³ Chena mrsi jegingalwv u laci, macimi u tah pahsanrli, Hene yasi tahaiv; fvfvyrghofulu, iwv. Macimi walanv ini u sgilhvga-magewa fvfvyrgidodali.

⁴ Macimi, Wrpvtvnu tagi wetvmvwi ilani; wakv nhrla, wrpvtasi geiv inv mkvtaukulvia, macimi pvgfanvnu ini meliwawa da-pigamuci Mosise, wvhsi uci dabwawaniwrci nihki, u talrli Jesise.

⁵ Chena ina ia huttvgi Gabrnivme, ntvsi u bialudrgoli kvpdenvli, u nvnvbrci-magoli,

⁶ Dabalamiwatv, nit vlolrkv saxinwv ini wegiwrpagi vhqiluga ini nanagifewa, mvmyanrni vhqinvmwv, u tagoli.

⁷ Macimi, Nah bir chena nah gegahv, u talrli.

⁸ Chena inv kvpdenv rpvfsa macimi, Dabalamiwatv, mvtv ni dabelafi wvhsi gelv becfrivni sebrci nit vpvhqawa : wakv ini kvlvwewa pa’ hiulu, macimi nit vlolrkv wah gegahofu.

⁹ Xvga nahfrpi nelv wewvsi ilani simakufewa, ni bonrki svmrkvnvki : chena Nhrla, ni talv yrmv nakuti, macimi inv nhawv; chena kutvkv, Birlu, macimi inv biawv; chena nit vlolrkv, Yomv silvwelu, macimi inv ini silvwi, isiwa.

¹⁰ Chena Jesise iah notvgi ini, mvivci-taha, macimi, Tapilo gi talapwv nelv, mvtv ni ma’ mkv yone si mahsrgi dapwahsawa, mvtv, mvtv Irqv Ir Iswelv, u talvhi nihi na-nakvlakuci.

¹¹ Chena gi talapwv nelv, maci ini wa-tvhkufvgi wa huci biaki macimi ini yapvgsimugi, chena wah wetvbe-mrwrli Aplahameli, chena Visigeli, chena Jakvbeli, betiga ini wafapvh-kvmigigi ugimrwi-drmqa :

¹² wakv nihki ini ugimrwi-drmqa uci uqihfimrki wah si luhfa-pvgilofoki ini frgici ba-pagijrgi : ntvsi wa vhdawi ini wihfvqawa, macimi ini ya-tvlwagi wepitvli.

¹³ Macimi, Nhrla ya-hrivni; yasi mahci dapwahsaivni, yone ini ipanvlofulu, u talrli nili kvpdenvli Jesise. Macimi inv vlolrkv gegahofu ini yrtafvgi.

¹⁴ Chena ina ya-drlici Betvli wegiwv betiga ya-birci Jesise, u nawrli Betv wewvli u gali bami saxinalici vhqilugali wapigisi-fowa.

¹⁵ Macimi u tah pahsi-lajanrli, macimi inv u nvkvlaku ini wapigisifowa; chena unskv, macimi u mesrmvwrli nili.

¹⁶ Chena ina walrqefigi ya-biayrgi, nihki u biatvwrwrli maci la-kusgrkucki wvninahfihi : macimi inv kvlvwewa uci luhfa-pvgilvhi nihi ilafewanhi, macimi u gegahvhi jrivhki ya-vhqilugalici :

¹⁷ wvhsi manvwv’ hini uqrufagi ga-kvlvwigi srpwi Visviv inv mrmosiges-qatv, Welv u mvmanv ki kvtunawananv, macimi wewvsi ki tasi lugawananv, iupi.

¹⁸ Huwa ina Jesise iah nawrci maci mahsalalici gryrukv welv, meliwa tapigamowa wvhsi ini vsuwa grmagi hrgi.

¹⁹ Chena ntvsi biawv yr-ivwigatv, macimi, Ga-gahgimiwa, gah nakvlala goqa-lrqv-grci yahrivni, u tagoli.

²⁰ Macimi Jesise, Nihki wrkucahfeki u bonrnrwv wrsrlvku, chena nihki ini manqvtwi uci wisgiluhfvki u bonrnrwv ufihfvnv; wakv inv u Qihfvli ilani mvtv u bonv wvhtvh sagfadoci wesi, u talrli.

²¹ Chena kutvkv nuhgi nihki uci kvgahgimrfvki Dabalamiwatv, welrni la-lamilu wvhsi nhihtv nhriv macimi lakunvgi n’ uhfv, u talrli.

²² Pvyaqv Jesise, Nakvsilu; macimi nvkvsi nihki napagiki wvhsi lakunrwrci nahvlwrkv u nabowanwrli, u talrli nili.

²³ Chena ina ulvga-lagi ia Ikvgi, kvgahgimrfhi u nakvola-kuhi.

²⁴ Macimi wrpvtvmuku, ntvsi pvfaqeiv msrwi mahsigikvgi ini msinapigi, waciganv’ hini ulvgasi patvkhoiv nili ba-bokvki : pvyaqv inv nabawv.

²⁵ Chena nihki u bialutvwr-wrli, macimi ut vmvcihrwrli nili, Wrpvnashiwalu, Dabalamiwatv; nit iqelafipa, iwvki.

²⁶ Macimi, Gociwa ki wesrlabwrpwv, Oh cvgi clapwah-safvki gelvwy? u talvhi. Hina uwa unskv, macimi u gilhvmrtv ini mahsigikvgi chena ini msi-napi; macimi ntvsi msi-grmah-kvwvnwi.

²⁷ Macimi nihki ilaneki mvivci-tahaki, Nahiwa si ilani yrmv, yasi weginrqi nili mahsigikvki macimi ini msi-napi pafadrkuci? iwvki.

²⁸ Chena ina ini vsuwa grmagi iah si birci bec-drmqa ini ut vsisgemwv nihki Gatalenvki, u nvxgrkuhi ntvsi neswi la-kusgrkucki wvninahfihi, nili nabowrlvku uci biaci luhfahi, vnhiwawi wivkuwahi, waciganvhi mvtv ini wvyaci si kvtvwi pamfa ilani.

²⁹ Macimi wrpvmahku, wivkvhotvmoki nihki, Nahiwa ni bonrpa wv ipanvlalrga, gelv u Qihfvli Mvnatu? hv utvhfv gitv wvhsi mvmyanrnhi-yrga wihsibur ini bialrqrmgi? iwvki.

³⁰ Huwa ntvsi paluwihi nihi uci vpiwv maci nakudwalakv kusku bami wihfanici.

³¹ Chena u gcihkvwrwrli nili nihki wvninahfeki, Qahqi gelv luhfa-pvgisi-yrga, inv na-kudwalakv kusku laskvwi-nrga, iwvki.

³² Macimi inv, Nhrkuna, u talvhi nihi. Macimi nihki biaci luhfaki, chena nihi kuskuhi si becfaki : macimi wrpvmahku, inv malsga na-kudwala-kv kusku ini sah-brmahgigi si brlvciptu laku-whvsga ini msi-napigi, macimi iqinvmwv ini napigi.

³³ Chena nihki ya-svmrcki nihi usimoki, macimi wapfaki ini udawa-nagi haki, macimi rcimoki jrgi wiahi, chena ini ya-sinvmalici nihi la-kusgrkulici wvninahfihi.

³⁴ Ma-cimi wrpvmahku, jrivhgi inv udawa biaci luhfa u nvxgrgoli Jesise : macimi ina nihki iah nawrwrci nili, u gcihkvwrwrli wvhsi ya-iqihsinuwrci uci srwalici.