HINI UWASI-BIADRCIMOWA ya-sfadoci MAFIYO 7 - Hini Uwasi-u-Biadrcimowa 1929

¹ Tagi wiahi Ivhkuwrsiwaku, wvh si bur gelvwv wiahi Ivhkuwrfuyaqa.

² Xvga wiahi Ivhkuwrsiwawa waci wiahi Ivhkuwrsiwayaqa ga hutvh kuwrfupwv gelvwv : macimi ini tapvcikv dapvcigayaqa, ini gah tapvlagopwv gelvwv.

³ Chena gociwa gi talrpvtv ini pafanowa gi janinv yavhdalici u sgesakugi, wakv mvtv gi mamaginalatv ini bamvkufagi nahvlwrkv gi sgesakugi yavhdagi?

⁴ Walr nahiwa gah si ilv gi janinv, Cah gah luhfa pvgitvmola ini pafanowa gi sgesaqi uci; macimi scih, ini bamvkufagi vhdawi nahvlwrkv gi sgesakugi?

⁵ Gelv naluhci-lvwiwahfi, nhihtv luhfa pvgitvnu ini bamvkufagi nahvlwrkv gi sgesakugi uci; hina chena gah tapinrqi nama gelv wvhsi luhfa pvgitvmvni ini pafanowa gi janinv u sgesaqi uci.

⁶ Melahku tagi ini wafabirgi nihki wihseki, tagi nuhgi yalvhfvmewrci nihki kusgoki ipvgilahku ki megahfamwrki, belaba nihki u kvgalkvwrwvhi nihi Irmagi u fitwv, macimi kugeki chena ki lalkvmakuwrki gelvwv.

⁷ Nvtutvmrgaku, macimi ini gah melagopwv; nvtunahigaku, macimi ga mkvhfupwv; tuwvthigaku, macimi ini gah tvwanvmr-gopwv :

⁸ xvga jrgi wayafv na-tutvmrgatv utafi; macimi inv na-tunahigatv mkvhfu; chena inv da-tuwvthigatv wah tvwanvmrqi ini.

⁹ Walr nafvwa ilani vpiwv ntvsi gelvwv, inv, qahqi u qihfvli wah nvtutvmrgoli wapsqadagi, hv sekunvli wah melrli nili;

¹⁰ walr qahqi inv nvmahfvli wah nvtumrli, hv mvnadoli wah melrli nili?

¹¹ Qahqi waciganvhi, waghi ki mvjelafipwv, wrkutvmaqa wvhsi melaqa uwasi wiahi kit vpaluhfamwrki, drniwa si vlikv k’ Uhfwv wafapvh-kvmigigi yapitv wah si melvhi uwasi wiahi nihi na-nvtutvmrkuci?

¹² Jrivhki wiahi waciganvhi goqanahigrci skvtv nih silvwihdrku-nrki ilaneki yasi tahayaqa, datapilvhi yone silvwihtv-wahku nahfrpi gelvwv : xvga yomv ini kutaladewa chena nihki mrmosigesqacki.

¹³ Uci becfrku gelvwv ini macqr-lvkvdofigi sqrta : xvga mfrlvkvtwi ini sqrta, macimi mfrbiaiv ini myawi, ya-sfagi iqinvmowanagi, chena maci nihki ntvsi waci becfrcki.

¹⁴ Xvga mrcqrlvkvdofi ini sqrta, macimi wesaiv ini myawi, ya-sfagi lanvwawewa-nagi, chena lrkufwihi nihki ma-mkvgiki ini.

¹⁵ Mvhgani m y r s i mrmosigesqacki, ba-bialudolwrqa magefiwi betanikv-nagi, pvyaqv pkvmawi mwhawvki Irmagi nihki.

¹⁶ Hu mvwifowanwv ga huci gelvwv wrkumrwrki nihki. Hv ilaneki grwesahi utvtanrnrwv mfvlomi, walr gicimi hvhfvwigrnvskuhi?

¹⁷ Datapilvhi yone jrgi uwasi mtaqi uci neginwi uwasi mvwifowa; wakv ini wvskvlgi mtaqi uci neginwi mvjrfi mvwifowa.

¹⁸ Huwasi mtaqi uci rlwi neginwi majrfigi mvwifowa, mvtv nuhgi wvskvlgi mtaqi uci kvtvwi neginwi uwasi mvwifowa.

¹⁹ Jrgi mtaqi buryr uci negigi uwasi mywifowa kvuhota, macimi ini skudagi ipvgidota.

²⁰ Waciganvhi u mvwi-fowanwv ga huci gelvwv wrkumrwrki nihki.

²¹ Mvtv jrgi wiyafv, Dabalamiwatv, Dabalamiwatv, ya-sitv wah becfa ini wafapvh-kvmigigi ugimrwi-drmqa; hinv wakv yasi lvwetv ini u tasi tahawa n’ Uhfv yapitv wafapvh-kvmigigi.

²² Maci, Dabalamiwatv, Dabalamiwatv, hv mvtv gi wefowa uci ni mosigesqr-cimupa, chena gi wefowa uci ni luhfa pvgilrpa wvninahfeki, macimi gi wefowa ni uci lvwepa maci mvgeci pakvtaf ewanv? na higoki ina grsagigi.

²³ Macimi ina uwa, Mvtv gi wrkumalapwv gelvmv : nelv uci srwaku, gelvwv ba-kvtanvgiki wvnrtafewa, nah si tabrci-muhdrwrki nihki.

²⁴ Jrgi wiyafv waciganvhi na-notvkv yolumv ni kvlvwewanv nelv, macimi u tasi lvwihdrnv nili, wah si tvqalamakufi laburwi ilani, mviacidotv yadrci wegiwv usgici nili sekunvli :

²⁵ chena ini gamuwrgi lrsiwah-fanwi, chena nili yrmikvmiki biaiv, chena nili mahsigikvki bodrcigaiv, macimi pgitahfanu ini wegiwr-pagi; macimi ini mvtv rgicifaiv : xvga ini usgici nili sekunvli Ivhgah-fanwi.

²⁶ Chena jrgi wiyafv na-notvkv yolumv ni kvlvwewanv nelv, macimi mvtv nili silvwi, wah si tvqalamakufi wvnihsvkv ilani, mviacidotv yadrci wegiwv usgici ini lakvwi :

²⁷ chena ini gamuwrgi lrsiwah-fanwi, chena nili yrmikvmigi biaiv, chena nili mahsigikvki bodrcigaiv, macimi pgitahfanu ini wegiwr-pagi; macimi rgicfaiv ini : macimi msrwi ini rgicfrwa ntvsi.

²⁸ Chena ini biamikvtwi, ina Jesise iah mahci lutvgi yolumv kvlvwewanv, nihki mahsalagiki u qvqahdrna - ladrnrwv u kvgahgimiwawa :

²⁹ xvga inv u tasi kvgahgimvhi nihi brsi nakuti bami bonvkv wiahsimakufewa, chena mvtv brsi ud awigamwvhi.