HINI UWASI-BIADRCIMOWA ya-sfadoci MAFIYO 5 - Hini Uwasi-u-Biadrcimowa 1929

¹ Chena yasi nawrci nihi mahsalalici, inv wapfa ini maqvhgigi si kuqicsinwv : chena ina inv iah mahtvh-gapici, u kvgahgimrfhi utfakuhi :

² chena u tvwanv u doni macimi u kvgahgimvhi nihi,

³ Gisrdalamakufeki nihki ga-tamrsilapwvsgrcki : xvga welvwv ini wafapvh-kvmigigi ugimrwi-drmqa.

⁴ Gisrdalamakufeki nihki ma-mvwacki : xvga wah manwi-tahasgofoki nihki.

⁵ Gisrdalamakufeki nihki nvnvhbrci-lafvki; xvga wah lrpi u we-lrmeki ini yalakuqvh-kvmigigi.

⁶ Gisrdalamakufeki nihki ma-mvmadalamucki macimi kvhkvlrmucki ini tapvsvwelafewa : xvga wah dabalamoki nihki.

⁷ Gisrdalamakufeki nihki ga-taminrqalamaficki : xvga wah kvtv-wihgrnrwv gitaminrqalamafewa.

⁸ Gisrdalamakufeki nihki fa-fvyrgi-tahacki : xvga wah nawrwrli Mvnadoli nihki.

⁹ Gisrdalamakufeki nihki grmrnelafewa wa-usdocki : xvga Mvnatu u qifhi wa hrlofoki nihki.

¹⁰ Gisrdalamakufeki nihki mviahci nrnuhgrchofucki xvga tapvsv-welafewa uci : welvwv xvga ini wafapvh-kvmigigi ugimrwi-drmqa.

¹¹ Ki gisrdalamakufipwv gelvwv ina ilaneki vhtalalwrqa, chena nrnuh-grchalwrqa, macimi jrivhki yagi majrfigi si nrnhrci-malwrqa nelv uci.

¹² Usvsilabwrku, macimi vnhiwawi uwasi-labwrku : xvga msrwi ini ki taphufewanwv betiga wafapvh-kvmigigi : yone xvga yasi nihki nrnuhgrchrwrci nihi mrmosigesqalici ya-pilici wihsi-bur gelvwv vpiyaaa.

¹³ Hini vsisgi-drmqa si napipami ini geyrwv : pvyaqv qahqi mahci wvndota yapuqvgi ini napipami, drniwa wa huci psgipata ini? hini mvtv-wiafagisi ina uci, wakv wvhsi luhfa-pvgidodagi inwi macimi kvgalgodagi lrmagi u ficiwv ilaneki.

¹⁴ Geyrwv ini wvivhfayrgi ini yalakuqvh-kvmigigi si. Udawa wahsatagi maqvhgefigi vhdawi mvtv ivh kvtvwi gigidota.

¹⁵ Mvtv nuhgi ilaneki u fr-fvgfwrwrli netvwrkvnvli macimi lrmagi ini pusilegi udr si bonrwrli nili, wa-kv usgici yr-tvh nepvwilici; macimi u netvwrlakuwrli nili jrivhki ini wegiwr-pagi ya-picki.

¹⁶ Datapilvhi yone si welrni ki wvhfayrmwv netvwayaqa yalvhfvmewrci ilaneki; wvhsi manvwvhi nihki namuwrci k’ uwasi pakvtafewanwv, macimi wvhfrci-makufihaqa k’ Uhfwv wafapvh-kvmigigi ya-pitv.

¹⁷ Yasi biriv nelv wvhsi mvcilutvmv ini kutaladewa walr nihki mrmosigesqacki tagi si tahaku : mvtv wvhsi mvcilvweiv n’ uci bir, wvhsi uqrwilvweiv wakv.

¹⁸ Xvga tapilo gi talapwv nelv, Brluhi manqvtwi macimi vsisgi-drmqa wa hvsanu, mvtv nakuti gcimrlacihi walr nakuti-paqa wa hini kutaladewa-nagi uci wiahisi vsanwi, brluhi jrivhki wiahi wah mahciludota.

¹⁹ Waciganvhi goqa-nafv-grci wah puskunv nakuti yolumv gcimacqrfiki tapigamowanv macimi yone wah si kvgahgimrci ilanihi, gcimrcilofi wa hrlofu betiga ini wafapvh-kvmigigi ugimrwi-drmqa : wakv goqa-nafv-grci wah silvwi macimi wah kvgahgimiwa nili, hinv mahselafi wa hrlofu betiga ini wafapvh-kvmigigi ugimrwi-drmqa.

²⁰ Xvga gi talapwv nelv, waciwaphi vntvwaqa ki tapvsvwelafewanwv yanwilici ini u tapvsvwelafewanwv nihki yrivwigacki macimi Palaseki, mvtv gelvwv gah wiahisi becfrpwv ini wafapvh-kvmigigi ugimrwi-drmqa.

²¹ Ki mahci nodrgapwv gelvwv yasi ini ilofuwrci nihki sahkvmikv, Tagi ga nsiwa; macimi goqanafvgrci wa nsiwa wa huci nvnvskvci ilafi ini mahtvkuwrfowa :

²² wakv gi talapwv nelv, jrgi wiyafv wa-wivkuwah-tvwrtv u janinrli, wah nvnvskvci ilafi ini mahtvhkuwrfowa; chena goqanafvgrci, Maivla, wa hilrli u janinrli, wah nvnvskvci ilafi ini tapuwawa; chena goqanafvgrci, Wvnihsvkv gelv, wa hiwv, wah nvnvshkci ilafi ini vqinvmowi skuta.

²³ Qahqi gelv waciganvhi pvgfanigaivna gi daphadewa ini botafvmrcikv-nagi, macimi ntvsi mkvwalatvmvna yasi gi janinv bema-lamahgi,

²⁴ ntvsi nvkvtvnu gi daphadewa yalvh-fvmeyrgi ini botafvmrcikv, macimi nhrla, uwalrgomi nhihtv gi janinv, uwa ina chena birlu chena pvgfanigalu gi daphadewa.

²⁵ Huwalrcimo-mi gi mvdaladewanv wawatapi, iahaiahi gelv wejemvci ini wvyaci; belaba inv mvdaladewanv nili dapvsvwvhkuniwali gah si bonaqv, macimi inv dapvsvwvhkuniwa nili wiahsi-makufewanvli gah si bonaqv, macimi giphudewa-nagi ga ipvgilagopi.

²⁶ Tapilo gi tala nelv, Mvtv gah wiahisi ini-uci luhfv gelv, brlu’ hini jaiahqi msqvkqa gah mahci taphiga.

²⁷ Ki mahci nodrgapwv gelvwv yasi ini iugi, Tagi gah mvcilvwi wrpvsiphigawa :

²⁸ wakv gi talapwv nelv, yasi jrgi wiyafv yalrpvmrtv eqali wvhsi wabalamrci naiahkv mvcilvwihtvwrci nili wrpvsiphigawa u tahigi.

²⁹ Chena qahqi gi mvyru-skesaqi wvhsi utvgikvhsinvni ipanvlakuivna, qvqvtanvnu ini, macimi geiv uci vlikv iqvgitvnu ini : xvga ini mkvhfowani gelv si wvhsi nakudwalanv geiv iqi ilafeyrgi, macimi mvtv malsga geiv ipvgidota vhqi nvmowa-nagi.

³⁰ Chena qahqi gi mvyrwengi wvhsi utvgikvhsinvni ipanvlakuivna, qvkkutvnu ini, macimi geiv uci vlikv ipvgitvnu ini : xvga ini mkvhfowani gelv si wvhsi nakuclwalanv geiv iqi ilafeyrgi, macimi mvtv malsga geiv nhaiv vhqi nvmowa-nagi.

³¹ Nahfrpi ini iupi, Goqanafvgrci wah pvivgilv si bonrli wewvli, wah meirli welrni pgahudewi awigrdagi :

³² wakv gi talapwv nelv, yasi jrgi wiyafv ba-pvivgilv si bonrtv wewvli, waciwap’ hini wabaladewa uci, wrpvsiphigawi-iqali shrci nili : macimi goqanafvgrci wah wewinrli nili ina nili pvivgilv si bonofoli mvcilvwi wrpvsiphigawa.

³³ Nuhgi, ki mahci nodrgapwv gelvwv yasi ini ilofuwrci nihki sahkvmikv, Tagi gah nrnhrci jegingamutv geiv, wakv gah pakvtanvmvwv geiv inv Dabalamiwatv gi jeginga-mowanv :

³⁴ wakv gi talapwv nelv, Tagi jeginga-muku; tagi nuhgi ini wafapvh-kvmigigi uci, xvga ini ugimrwi lit vpvbewa Mvnatu;

³⁵ walr tagi ini vsisgi-drmqa uci, xvga ini vhpvlgewanili u fitvli; walr tagi Culosalame wvyaci, xvga ini ut udawa inv msi-Ugimv.

³⁶ Tagi nuhgi gah jegingamu gesi uci, mvtv geiv gi tvh kvtvwi wrpitu walr mkvdautu nakuti welahfi.

³⁷ Wakv welrni, Hvnkv, hvnkv; Mvtv, mvtv; iga ki kvlvwewanwv : macimi goqanahigrci vlikv tfanwi yolumv inv mvci wiyafv uciwi ini.

³⁸ Ki mahci nodrgapwv gelvwv yasi ini iugi, Usgesaqi vsuwa usgesaqi, chena wepici vsuwa wepici :

³⁹ wakv gi talapwv nelv, Tagi pipah-tanahku inv majelafitv : wakv goqanafvgrci gi pgitahuqv gi mvyrwi nuwrgi, kugeqahtvwi inv ini kutvgi nahfrpi.

⁴⁰ Chena qahqi ilani wiyafv kutaladewa-nagi wi hawv weci geiv, macimi gi mvmrqv gi godemi, welrni meli gi pihtvwi-betanikv nahfrpi.

⁴¹ Chena goqanafvgrci gah mvmeloihaqv wvhsi nakuti mveli hrivni, wedami neswi.

⁴² Meli inv na-tutvmvwahkv, macimi tagi geiv inv wv-hvdrmahkv uci pvivgilv si kutaqelu.

⁴³ Ki mahci nodrgapwv gelvwv yasi ini iugi, Ga hvhqalamv geiv gi mr-biacigrlademv, macimi segalami gi mvdaladewanv :

⁴⁴ wakv gi talapwv nelv, Vhqalamahku ki mvdaladewanwrki, macimi mvmrtumvwahku nihki na-nrnuhgrchalwrqa;

⁴⁵ wvhsi manvwv’ hu qihfinal-wrqa k’ Uhfwv wafapvh-kvmigigi ya-pitv : xvga inv u ta shrli u gesagi-gesfomvli wvhsi biatvhkufvmvwrci nili majelafilici macimi nili wa-uwaselafilici, chena u ta sfvtvwrli gamuwrgi nili da-pvsvwafilici macimi nili buryr-tapvsvwafilici.

⁴⁶ Xvga qahqi vhqalamaqa nihki ya-vhqalamalwrqa, nahiwa si taphufewa ki bonrnrwv? hv datapilv’ hini-ivskv silvweki nihki daxewi mrwvtunigahf eki?

⁴⁷ Chena qahqi gelvwv usilvwrlaqa ki janinrwrki pahi, nahiwa k’ uci vlikv ipanvlrwrki notv kutvkvki? hv mvtv datapilv’ hini-ivsky silvweki nihki Nvnvhkvwi-laneki?

⁴⁸ Gah mafafipwv waciganvhi gelvwv, yasi inv mafafici wafapafitv k’ Uhfwv.