HINI UWASI-BIADRCIMOWA ya-sfadoci MAFIYO 3 - Hini Uwasi-u-Biadrcimowa 1929

¹ Chena yolona grsagiki biawv Jrne inv Fvfvhqi-ulalhiwanv, pami nvnvhimiwa ini belasgi Cudia,

² Mvtveni si tahaku gelvwv; xvga ini wafapvh-kvmigigi ugimrwi-drmqa uwa mrlrqvhi, pami iwv.

³ Yonv yrmv xvga yr-cimatv srpwi inv Visviv mrmosigesqatv, Hini u kvlvwih-simowa wiyafv bami tvlvhotvgi ini belasgi, Macfadoku ini u myawi inv Dabalamiwatv, Tapilvhi sdoku u myawanafv, iwv.

⁴ Huwa Jrne gamvlewi wihfviv u betanikvni, chena masqvhdagi gitvpifowa grwvci u sahgigi; macimi pvqvci amowi-malrsi u wihfane-wani.

⁵ Hina uwa luhfvlati Culosalame nili hawv, macimi jrivhgi Cudia, chena ini jrivhgi gryrugi-drmqa ini Jrtane;

⁶ macimi nihki u fvfvhqi-ulalhakuwrli nili ini Jrtanewi febegi, pami tabrcimoki u mvjesilvwewanwv.

⁷ Pvyaqv ina inv iah nawrci maci nihi Palasi-hi chena Satusihi bami bialutvmrkuci u fvfvhqi-ulalhiwawa, Nafvwa git vlanakuwv, gelvwv lawrki udosrkvnvki, wvhsi usitvmaqa ini vhqi-gidawa wrsv biayrgi? u talrli.

⁸ Biadoku waciganvhi mvwifowa nvhekv mvtveni si tahawa yaiqalamakugi :

⁹ chena tagi si tahaku betiga geyrwv wvhsi, Ni bonrpa Aplahame ni uhfipa, iuyaqa : xvga gi talapwv nelv, yasi inv Mvnatu dabelafici wvhsi iuhumv sekunhi uci unsgrnvmv-wrci Aplahameli vpalufhi.

¹⁰ Chena datapilv’ hini uwa taghrkv sagfanwi tv hini ujapkvhkvtuwigi nili mtaku : jrgi mtaqi waciganvhi waci bur negigi uwasi mvwifowa kvuhota, macimi ini skudagi ipvgidota.

¹¹ Svpkvhi nelv gi fvfvhqi-ulalhalapwv napigi mvtveni si tahawa-nagi si : wakv inv vhkuwi ba-birtv nelv vlikv mselafi notv nelv, inv u mvhgifanv ni nodqelafi wvhsi pvh-nemaiv nelv : hinv gah fvfvhqi-ulalhakuwv nili Ufapi Ucvjrlvhqvli macimi skudagi :

¹² u wawafhowa inv u lacigi vhdawi, macimi inv wah tvdakvqi fvfvyrgilutv u pvwvsqhrwi tapvkuf anowa; chena inv wah si mrwvtunv u kvwvskumi ini u kvwvsqigr-nagi, wakv nili wih-seqviv yrlwi-vhdahodagi skuta wah si jrkv-tafrnv inv.

¹³ Hina uwa Jesise Galale umwv Jrtanegi Jrneli si biawv, wvhsi fvfvhqi-ulalhakuci nili.

¹⁴ Pvyaqv Jrne wih mahci nvgi-nrli waghi, Nit vgrwrfi wvhsi gelv fvfvhqi-ulalhivni, macimi gelv hv gi bialutvwi? isiwa.

¹⁵ Pvyaqv rpvfsa Jesise, Welrni lalatv-nu ini inugi : xvga vlvini ki talafipa gelvwa wvhsi uqrufadoivqa jrivhgi tapvsvwelafewa, u talrli. Hina uwa inv welrni u ta lala-mrli nili.

¹⁶ Macimi Jesise, ina iah fvfvhqi-ulalhofuci, walanv ini napigi uci musqifa : chena scih, nili manqvtu tvwanvmrqi inv, macimi inv u nawrli nili u Cvjrlvhkumvli Mvnatu bami Irsiufalici brsi myrsi-pvwefv, macimi usgici weiv si biali;

¹⁷ chena scih, nili manqvtu uci nodrqvtwi kvlvwih-simowa, Ylvyrmv yavhqalamvkv ni Qihfv, weyrgi ni manwilapwv, iyoiv.