HINI UWASI-BIADRCIMOWA ya-sfadoci MAFIYO 28 - Hini Uwasi-u-Biadrcimowa 1929

¹ Huwa galu ini vlwrkvhsi grsagigi, yasi ini vlami wrpvgi wvyaci ini wasgi grsagigi ini balaku-manadowi-gesagigi, biawv Male Magitalenv chena inv kutvkv Male wvhsi namu-wrci ini nabowa.

² Chena wrpvtv-muku, ’n’ tvsi msi nomaskv vsisgi; xvga inv Dabalami-watv ut ancvle-mvli lrsiu-fali manqvtugi uci, chena biawv macimi vlikv u tah kulapa-nrli nili sekunvli, chena usgici nili lamvtv-piwv.

³ Hu tasi nrkufewa brsi bapvgi, macimi u betanikv wvhkv-nvgiv brsi gonv :

⁴ chena xvga u kufr-wrli nili nihki gah-citvwr-picki svpkvhi pvpvas-grki, macimi brsi galv na-pagiki ila-neki ilafeki.

⁵ Chena inv ancvli rpvfsa, Tagi grwilv-waku; xvga ni wrkutv yasi Jesise nvtuna-whaqa, inv mviahci rsitafho-futv.

⁶ Mvtv-lrqv inv utvsi; xvga unskv inv, datapilvhi ya-iuci. Birku, wrpvtv-muku ini tvh saxigi inv Dabalamiwatv.

⁷ Chena nhrkuna wa-watapi, chena wetvmv-wahku u kvgahgimrf-hi, Unskv inv nili na-pa-lici uci; chena sci, Galalegi si negrni gelvwv; ’n’tvsi gah na-wrwv : sci, naiahkv gi wetvmo-lapwv, u talvhi nihi iqahi.

⁸ Chena nihki wawatapi ini nabowrlv-kugi uci wapfaki gilagi grwilv-waki chena msi uwasi-labwrki, macimi mama-qeki wvhsi biatvwr-wrci kv-lvwewa u kvgahgimrfhi inv.

⁹ Chena wrpv-mahku, Jesise u nvxkv-wvhi nihi, Huwasi-lrsvmv-mowa jrivhki cahi, isiwa. Chena biaki nihki macimi u tah foginvmr-kuhi u fitvli, chena u svsilvwaha-kuhi.

¹⁰ Huwa Jesise, Tagi grwilv-waku : nhrkuna wetvmv-wahku ni janinrki wvhsi nihki Galalegi hrwrci, macimi ’n’tvsi nah nvu-goki u talvhi nihi.

¹¹ Huwa ia-haiahi nihki nhr-wrci, wrpv-mahku, nrlatv nihki gahcitvwvh-docki biaki ini udawa-nagi, macimi u wetvmvwr-wvhi nihi ugimrwi mkvtaukulv-iahi jrivhki nili wiahi ba-biami-kvki.

¹² Chena nihki iah mah’ tvbemr-wrci nihi gigi-lanihi, macimi mahci tapuwaki, u melr-wvhi nihki nihi svmrkvnhi maci laghi muni,

¹³ U kvgahgimrfhi biahi tapahgi, macimi u gemi walr-wrli nili ia-haiahi nabr-yrga nelvwa, iuku.

¹⁴ Macimi qahqi yomv u tvwvgrgi bia-yrlita inv kvpanvli, nelvwa nah kulapgr-mrpa inv, gah pvgfana-lapa patfvgi-tahawa, isiwaki.

¹⁵ Waciganvhi nihki u tvhpanr-nrwv ini muni, macimi nihki yasi kvgahgimofu-wrci si Ivweki : chena yomv iyowa lfwa-nota malsga alagenv nihki Josvki, macimi ivskv ini ya-lfa-yrgi brlu’ hinugi grsagigi.

¹⁶ Wakv nihki matvhfwi-gita-nakuti kvgahgimr-fvki Galalegi haki, ini maqvhgigi tvsi ya-wetvmv-wrci Jesise.

¹⁷ Macimi iah nawr-wrci nihki, u svsilvwahr-wrli nili : pvyaqv nrlatv nvnvwvci-tahaki.

¹⁸ Chena Jesise utfvhi nihi macimi u kvlo-lvhi, Jrivhgi simakufewa ni mahci mela-gopi betiga wafapvh-kvmigigi macimi usgi-drmqa.

¹⁹ Nhrkuna gelvwv waciganvhi, macimi inv uci ushahku kvgahgimr-fvki jrivhki inv u tfwalowanv lanvwa, pami fvfvhqi-ulal-hahku ini u wefowa-nagi inv Ufimv chena inv Uqih-fimv chena Ufapi Ucvjrlvhqv :

²⁰ pami kvgahgi-mahku nihki wvhsi giginvmu-wrci jrivhki wiahi goqa-nahi-grci gi tapima-lapwv : macimi sci, nelv weci gelvwv mosvtvwi, weginrqi brlu’ hini jaiaqvh-kvmigiga ini ya-lakuqvh-kvmigigi.