HINI UWASI-BIADRCIMOWA ya-sfadoci MAFIYO 24 - Hini Uwasi-u-Biadrcimowa 1929

¹ Chena luhfa Jesise ini mvmrtumawi-kvmiqi uci, macimi ya-hrci hawv; chena u kvgahgimrfhi utfa-kuhi wvhsi wrpvtv-lakuci nili wegiwr-pvli ini mvmrtumawi-kvmiqi uci.

² Pvyaqv rpvfsa macimi, Hv mvtv ki nama-nrwv vlv-yomv jrivhki wiahi? tapilo gi tala-pwv nelv, Mvtv utvsi wa skunofu nakuti vpiwv s-ekunv usgici kutvkvli, wvh’ bur panano-futv, u talvhi nihi.

³ Chena yasi lamvtv-piei wahsatagi ini Vlifiwi mahqvgigi, u gemi utfa-kuhi nihi kvgahgmrfhi, Wetvmvwi-nrga, drniwa Irqv ina wa vdawv yolumv wiahi? chena nahiwa wah si giginolowa-niwi gi birwa, macimi ini jaiah-qrga ini ya-lakuqvh-kvmigigi? u takuhi.

⁴ Chena rpvfsa Jesise macimi, Gcitvwr-feku wvhsi bur ilani bemi-walal-wrqa.

⁵ Xvga maci wah biaki ni wefowa-nagi, neiv inv Klvisde, wa hiwvki; macimi maci wah bemi-walr-wvhi.

⁶ Chena gelvwv gah nodr-gapwv nochade-wanv macimi ya-lrtudo-daki nochadewanv; gcitvwr-piku wvhsi bur gelvwv patfvgifi-yaqa : xvga yolumv wiahi qelvhi brbiaci wah biami-kvtu; pvyaqv ini jaiahqewa mvtv gawvgi.

⁷ Xvga nakudwa-lanv si lanvwa wah pvfaqic-fvtv-wrli nakudwa-lanv si lanvwali, macimi ugimrwewa u ppahtanv ugimrwewa; chena ’n’tvsi wa vdawv sas-qrlvwawa-niki, macimi vsisgi-nomasgrwanv cvjapi tvsi.

⁸ Pvyaqv yolumv wiahi nileni waci vlamvh-kvmigigi vhqi-lrsvmvmowa.

⁹ Hina uwa gesanrci-nvmowa-nagi gah si pvgfa-naku-wrki nihki, macimi gah nfaku-wrki : chena gah segalama-kufe-maku-wrki nihki jrivhki dfwa-lanv si lanvwaki xvga ni wefowa uci.

¹⁰ Macimi ina uwa maci wa hutvgi-kvhsi-noki, chena pasiqi wah mas-druha-deki, macimi wah segala-deki.

¹¹ Chena maci myrsi mrmosi-gesqacki wah pvfaqeki, macimi wah bemi-walr-wvhi maci.

¹² Chena xvga wvnrta-fewa wa sqeiv, ini ut vhqa-ladewa-nwv maci wa tigi-negi-nili.

¹³ Pvyaqv inv nvhekv ini yaqi wesigi-fitv, henv inv wah wrpvnas-hofu.

¹⁴ Chena yomv uwasi-biadrcimowa ini ugimrwi-drmqa uci wah nvnvhimi-wapi ini malsga ya-lakuqvh-kvmigigi wvhsi u dabwawani-wrci nihki jrivhki dfwa-lanv si lanvwaki; chena ina uwa wah biaiv ini jaiahqewa.

¹⁵ Hina waciganvhi gelvwv nama-yaqa ini lvsegrci-wafewa uci seqvh-kvmigifewa, yr-tudo-dagi srpwi Danivl’ inv mrmosiges-qatv, pvh nepvwi ini wafabirgi tvsi (welrni inv la-lrbrtu-tvkv nanuh-sata), hina uwa welrni nihki Cudiagi ya-picki nili maqvhgiki la-si mu-wrta :

¹⁷ welrni inv ini vkucikvmi ya-pitv bur lrsiwata wvhsi luhfv-doci nili wiahi betiga ya-daki ya-drci wegiwv :

¹⁸ macimi welrni inv ini lr gitikv ya-pitv bur patagi si nrtaga u godemi.

¹⁹ Wakv mvci-labwrwa-neki cahi nihki la-lrmudr-kucki vpaluh-fvli macimi nihki na-nonhi-wacki nala grsagiki !

²⁰ Chena mvmrtumrku gelvwv wvhsi bur vdagi k’usimowa-nwv qanv ini babogi, walr qanv vlwrkvhsi-gesagigi :

²¹ xvga ina uwa vdawi mahsrgi gesanrci-nvmowa, hini yagi mvtv-lrqv ma’ vdawi ina vlamvh-kvmikvtwi ini ya-lakuqvh-kvmigigi uci brlu’ hinugi, mvtv, nuhgi-mvtv gidani wa vdawi.

²² Chena waciwaphi nala grsagiki mahci naiahkv ujagino-daga, mvtv wivufi iahgi ivh mahci wrpvnas-dota : pvyaqv xvga inv ma-mofutv uci nala grsagiki wa hujagi-nota.

²³ Hina uwa qahqi wiyafv ilani, Ca hvlv-yrmv inv Klvisde, walr, Hutvsi, hilal-wrqa; tagi dapwahtv-muku ini.

²⁴ Xvga ’n’tvsi wah pvfaqeki myrsi Klvisdeki, chena myrsi mrmosigesqacki, macimi wah wrpvtasi-waki mvgi giginolowanv macimi qa-qahdr-niki; wvhsi bemi wasiwa-wrci, kvtvwi-iga, weginrqi nili ma-mo-fulici.

²⁵ Wrpvtv-muku, gi mahci wetvmo-lapwv grsv.

²⁶ Qahqi waciganvhi nihki, Wrpv-mahku, inv ini belasgi vpiwv, ga hiku-wrki; tagi nhrku : Wrpu-mahku, inv nili becigrnv vpiwv; tagi ini dapwahtv-muku.

²⁷ Xvga yasi ini ba-pvgi ini wa-tvhkufvgi u moyrgi, macimi si namo-dagi weginrqi ini ya-pvximugi; yone wa higi ini u birwa inv u Qihfvli ilani.

²⁸ Goqa-tvsi-grci inv na-pakv vpiwv ’n’tvsi wah mrwvtus-grki nihki da-tvhqvki.

²⁹ Pvyaqv walanv vhkuwihi ini gesanrci-nvmowa nala grsagiki uci inv gesagi-gesfwv wah papagic-hofu, macimi inv tapahgi-gesfwv mvtv wah meliwa u wvhfryr-mi, chena nihki vlrqvki manqvtugi wa huci pansi-noki, macimi nili wrsikvki nili manwvtu uci wah nomanota :

³⁰ chena ina uwa manqvtugi wah tapinr-qvtwi ini u giginolowa inv u Qihfvli ilani : chena uwa ina jrivhki lanv-wa u dfwalowanv ini usgi-drmqa uci wah mvwa, macimi nihki wah na-wr-wrli nili u Qihfvli ilani pami biali usgici nili manwvtuwi brfqvhki gilagi wrsikvgi chena mahsrgi wvhfrci-makufewa.

³¹ Chena inv wah wrwe-nvhi ut ancvle-mhi weci mahsi Iwagi papiqv, chena nihki nili nyawi mahsigikvki wa huci mrwvtunr-wvhi u mvmrwa-nhi, nakudwa-lanv ya-qihfagi manqvtwi uci brlu’ hini kutvgi.

³² Huwa uci wrkuta-fiku inv gicimesv u pamrtuwawa : ina u pga-ivhkufewa kukus-qrfi, macimi pvskvh-qaiv u msisga-mv, ki wrkudr-nrwv gelvwv yasi ini ba-lrwigi mrlrqvhigi;

³³ datapilvhi yone nahfrpi gelvwv ina nama-yaqa jrivhki yolumv wiahi, wrkutv-muku yasi inv mrlrqvhi-wici, datapilvhi nvhekv nili sqrdawvli.

³⁴ Tapilo gi talapwv nelv, yrmv inugi sqewanv mvtv wa hvsanwv, brlu’ jrivhki yolumv wiahi wah mahci ludota.

³⁵ Manqvtwi macimi vsisgi wa hvsanu, wakv ni kvlvwewanv mvtv wa hvsanu.

³⁶ Pvyaqv ina si gr-sagigi macimi yrtafvgi, mvtv wiyafv u wrkutv, mvtv weginrqi nihki ancvleki wafapvh-kvmigigi uci, mvtv-nuhgi inv Uqihfimv, inv wakv Ufimv pahi.

³⁷ Chena brsi nili u gesakv-namv Nuwv yaki, yone wa higi ini u birwa inv u Qihfvli ilani.

³⁸ Xvga brsi ina nala gr-sagiki yaki wihsi bur ini vdagi lakhuqewa nihki pami wihfa-neki macimi pami manoki, pami wechadeki macimi wechadewa-nagi si pami me-latipi, brlu’ hini grsagigi wvhtv hini msi-ulvga-lagi lkvgi Nuwv,

³⁹ Chena nihki mvtv u wrkudr-nrwv brlu’ hini lakhuqewa biaiv, macimi ud rmwalaku-nrwv nihki jrivhki; yone wa higi ini u birwa inv u Qihfvli ilani.

⁴⁰ Hina uwa neswi ilaneki wa hvbeki ini gitigr-nagi; nakuti mvmofu, macimi nakuti cikunofu :

⁴¹ neswi iqaki wah pami tvkwhi-gaki ini bodhrkv-nagi; nakuti mvmofu, macimi nakuti cikunofu.

⁴² Gcitvwr-piku waciganvhi : xvga mvtv ki wrkudr-nrwv si grsagigi tvh birci Dabalamal-wrqa.

⁴³ Pvyaqv wr-kutv-muku vlv-yomv, qahqi inv ini wegiwv uci mastala naiahkv wr-kutvga lrqv wrsv birci inv gr-gimo-takv, naiahkv inv wi gcitvwr-pi, macimi mvtv naiahkv welrni wih la-latv ya-drci wegiwv wvhsi srpwi pugho-dalici.

⁴⁴ Waciganvhi nahfrpi gelvwv mahci-ilafiku; xvga buryr si taha-yaqa yrtafvgi inv u Qihfvli ilani biawv.

⁴⁵ Nafvwa chena inv tapvsvwafi macimi labwrwafi vlolrkv, mviahci tvlwvhfa-kutv dabalamakuci ya-drlici wiahi, wvhsi me-lrci nihi u wihfa-newa-nilici qanrni-lrqv?

⁴⁶ Gisrda-lamakufi cahi inv vlolrkv, inv ina birlita dabalama-kuci wa mgrgoli bami yone si lvweci.

⁴⁷ Tapilo gi talapwv nelv, nili wah tvlwvh-fwrli inv jrivhgi ba-bonvgi.

⁴⁸ Wakv qahqi inv mvci vlolrgrfv, Cah nrgrfi dabalamitv, wa hiwv u tahigi; macimi wa hvlami ppvgita-whvhi u weci-vlolrkv-nhi, chena wah wihpu-mvhi macimi wedr-puwa-mvhi nihi wa-nafulici;

⁵⁰ wah biali inv vlolrkv nili dabala-ma-kuci ina grsagigi mvtv u biada-latv, macimi ina yrtafvgi mvtv u wrkutv,

⁵¹ chena wah giskhu-goli nili, macimi wah si tvqinvmr-goli ini welv nihi naluhci-lvwiwah-fihi : ’n’tvsi wah pami wihfv-qawani macimi in wah tvlwawah-fanu wepitvli.