HINI UWASI-BIADRCIMOWA ya-sfadoci MAFIYO 18 - Hini Uwasi-u-Biadrcimowa 1929

¹ Hina ini yrtafvgi utfr-wrli Jesiseli nihki kvgahgimrfv-ki, Nafvwa chena vliwi mselafi betiga ini wafapvh-kvmigigi ugimrwi-drmqa? isiwaki.

² Chena inv u tah wihku-mrli vpaluhfa-fvli, macimi u lamvtvp-hrli ini alaghi nihi,

³ chena, Tapilo gi tala-pwv nelv, Waciwaphi gelvwv kutaqe-yaqa, macimi ilafi-yaqa brsi vpaluhfafvki, mvtv gelvwv gah wiahisi becfr-pwv ini wafapvh-kvmigigi ugi-mrwi-drmqa, isiwa inv.

⁴ Goqa-nafv-grci waciganvhi wah nvnvhbrci ludr-weiv brsi yrmv vpaluhfafv, yonv inv vliwi mselafi betiga ini wafapvh-kvmigigi ugimrwi-drmqa.

⁵ Chena goqa-nafv wa hutvhpa-nrli yonesi vpaluhfa-fvli ni wefowa-nagi n’utvhpa-naqv nelv :

⁶ wakv goqa-nafv wvhsi utvgikvhsi-nalici wa ipanv-lrli nakuti iuhumv ma-cilo-filici da-dapwah-salici neiv, mkvfo-wani inv wvhsi msi bodhr-kvni sekunvli Irpicimo-fulici u qakvkv-nagi, macimi inv ini wih si gogi-nofu ini ya-spitamigi ini msi-napi.

⁷ Mvci-labwrwani cahi ini ya-lakuqvh-kvmigigi xvga wviv uci pami utvgikvh-sinagi uci ! xvga qelvhi ini yagi wvhsi nili bia-yrki; pvyaqv mvci-labwrwani cahi inv ilani wa-uci srpwi biayrgi ini !

⁸ Chena qahqi gi laci walr gi fici ipanvlaku-ivna wvhsi u-tvgikvhsi-nvni, qvkuku-tvnu ini, macimi geiv uci ini vlikv ipvgi-tvnu : huwasv ini gelv becfr-ivna ini lanvwawewa mvmyrlvkvtu-wivna walr gihgecsi-nvna, notv grjekv pami neswi bonv-mvna ulaci-wvli walr neswi ufitvli ini wv’ ipvgido-daki goqa-lrkvsi skudagi.

⁹ Chena qahqi ini gi sgesaqi ipanvlaku-ivna wvhsi utvgikvhsi-nvni, qvqvta-nvnu ini, chena geiv uci ini vlikv ipvgi-tvnu : huwasv ini geiv becfr-ivna ini lanvwawewa gilagi nakuti usgesaqi, notv grjekv neswi pami bonv-mvna usgesaku ini wv ipvgido-daki vhqi-nvmowi skudagi.

¹⁰ Wrpvtv-muku wvhsi bur gelvwv segala-maqa nakuti iuhkumv ma-cilofi-ciki : xvga gi tala-pwv nelv, nihki ut ancvle-mwvhi betiga wafapvh-kvmigigi svpkvhi mosvtvwi u talrpvtv-mrkuhi u talrbawa n’Uhfv ya-pitv wafapvh-kvmigigi.

¹² Nahiwa ki tasi taha-pwv gelvwv? qahqi wiyafv ilani bonrta tabawa magefhi, macimi nakuti nihi pigali, hv mvtv u tvh nvkvlvhi nihi jrkv-gita-jrkv-tfwi, chena nili maqvhgiki hawv, macimi u nvtuna-whrli nili ba-pigalici?

¹³ Chena qahqiga inwi inv mkv-wrli nili, tapilo gi tala-pwv nelv, vlikv usvsi-lapwv nili uci notv nihi jrkv-gita-jrkv-tfwi buryr mahci pigalici.

¹⁴ Yone datapilvhi mvtv ini u tasi tahawa k’Uh-fwv ya-pitv wafapvh-kmigigi, wvhsi nakuti iuhumv macilo-filici vsanalici.

¹⁵ Chena qahqi gi janinv mvci-panvlahga, nhrla, wrpvtasi u bemi-lvwewa nrnsihkv gelvwv pahi : hvhkvwahtv-wahga, gi mahci kvtvwih-kvwv galv gi janinv.

¹⁶ Wakv bur vhkvwahtv-wahga, hrmwasi nakuti walr neswi gawvgi, wvhsi manvwv’ hryec-fagi jrgi kvlvwewa nili uci u donwv neswi walr nfwi dabwawa-nvki.

¹⁷ Chena rlvwi-nvga wvhsi vhkvwahtv-wrci nihi, hrtutvnu ini mvmrtumawi-mrwvdwa-lowa-nagi : chena nahfrpi rlvw-invg wvhsi vhkvwah-tvgi ini mvmr-tumawi-mrwvdwalowa, welrni gah lrgomv geiv brsi inv Nvnvhkvwilani chena inv mrwvtuni-gahfi.

¹⁸ Tapilo gi tala-pwv nelv, Goqa-nahsi wiahi gelvwv ga gijepila-nrwv usgi-drmqa wa gijepita betiga wafapvh-kvmigigi; macimi goqa-nahsi wiahi gah palhr-nrwv usgi-drmqa wa palhota betiga wafapvh-kvmigigi.

¹⁹ Gi tala-pwv nuhgi, qahqi neswi gelvwv wah tvqrci-moki usgi-drmqa wiahi wvh’ nvtutvmu-wrci, ini wa ipanvtv-wrci n’Uhfv ya-pitv wafapvh-kvmigigi.

²⁰ Xvga lrqv tvsi neswi walr nfwi mrwvdwa-loki ni wefowa-nagi, ’n’tvsi nelv alaghi nihki.

²¹ Hina uwa biawv Betv macimi, Dabalamiwatv, drniwa tfana nah mvci-panv-laqa ni janinv, chena nih pvgfalatv-mvwv? hv brluhi neswvhfana? u talrli nili.

²² Mvtv brluhi neswvhfana, gi tala; wakv, Brluhi neswrse-tfana neswvhfana, u talrli Jesise.

²³ Wa-ciganvhi ini wafapvh-kvmigigi ugimrwi-drmqa brsi nr-nakuti ugimv si tvqa-lamaqvtwi, inv wih pami vgitvhfo-mvhi ut vlolrkvnhi.

²⁴ Chena iah mahci vlam’ vgitvh-fuci, nakuti bia-drqi, ma-mosina-hukuci matvhfana-matvhfana tabawa talant-muni.

²⁵ Pvyaqv inv mvtv ini tfwi u bonv wv huci taphi-gaci, tapiga-moli dabalama-kuci wvhsi myagino-fuci, macimi wewvli, chena vpalufhi, chena jrivhgi inv ba-bonvgi, macimi taphigawa wvhsi macdo-dagi.

²⁶ Hinv vlo-lrgrfv waciganvhi svhgigi sfa, chena usvsilvwa-hrli nili, Dabalamiwatv, bonvmv-wilu besi-tahawa, macimi gah taphula jrivhgi, isiwa.

²⁷ Macimi nili dabalama-kuci, bami gitaminrqa-lama-kuci, u pvgfana-goli inv vlolrgrfv, chena u pvgfa-latvmr-goli ini mosi-nahikv.

²⁸ Pvyaqv inv vlolrgrfv luhfa, u mkv-wrli nakuti u weci-vlolrgrfhi, ma-mosina-hukuci tabawa salani : chena u mvwinvc-hrli, macimi u gihgi-tuna-nrli nili, Taphi-galu ma-mosina-higa-ivni, u talrli.

²⁹ Waciganvhi svhgigi sfali nili u weci-vlolrgrfvli macimi u nvnvhbrci-magoli, Bonvmv-wilu besi-tahawa, macimi gah tap-hula, u tagoli.

³⁰ Chena mvtv si taha : brmaci wapfa chena u becfa-pvgi-lrli giphudewa-nagi brluhi taphvma-lita ini mosina-hikv.

³¹ Waciganvhi u weci-vlolrgrfhi iah namalici yasi lvwegi, vnhi-wawi mvci-lapwvhi, chena nihki biaki macimi u wetvmvwr-wrli dabalamaku-wrci jrivhgi yasi lvwegi.

³² Hina uwa inv dabalama-kuci utvhpi-magoli, macimi Gelv wa-nrtafitv vlolrkv, gi pvgfa-latv-mola gelv jrivhgi ini mosina-hikv, xvga gi nvnvhbrci-mi :

³³ hv mvtv nahfrpi gelv naiahkv gih bonv-mvwv gitaminrqa-ladewa gi weci-vlolrkv datapilvhi yasi naiahkv bonv-molv gitaminrqa-ladewa gelv? u talrli.

³⁴ Macimi wivku-wali dabalama-kuci, chena u tah pvgfa-nagoli nihi mr-mvmyanrnhi-walici, brluhi wih taphv ini jrivhgi mosina-hikv.

³⁵ Yone nahfrpi wa ipanvlal-wrqa gelvwv wafapvh-kvmigigi n’Uhfv, bur pvgfa-latvmv-waqa jrgi wiyafv u janinrli ki tahi-wrki uci.