HINI UWASI-BIADRCIMOWA ya-sfadoci MAFIYO 14 - Hini Uwasi-u-Biadrcimowa 1929

¹ Hina lrqv Halade inv nakutah-fapvti ugimv nodrga ini ya-lrcimo-fulici Jesiseli,

² macimi, Jrne yrmv inv Fvfvhqi-ulalhi-wanv; unskv inv nili na-palici uci; macimi ini waci yolumv wrsi-kvki pakvtafe-yrlici weyrgi, u talvhi nihi ut vlolrkvnhi.

³ Xvga Halade u mahci masanrli Jrneli, macimi u gijepi-lrli, chena giphudewa-nagi u tah bonrli xvga nili Holotivseli uci-hr-li, wewvli Filvbe u janinrli Halade.

⁴ Xvga, Mvtv ini mvyrwvtwi kutaladewa-nagi wvhsi gelv bonvci inv, u tagoli Jrneli.

⁵ Chena iah wesv naiahkv nfrci nili, u kufvhi nihi mahsa-lalici, xvga nihki mrmosigesqatv u ta lvgimr-wrli nili.

⁶ Pvyaqv iah biayrgi Halade u negewi grsagigi, nili u drnah-fvli Halotivse manya-loli ini alaghi, macimi u manwi lapwv-hagoli Halade.

⁷ Heni uci mah-ci-miwa gilagi jeginga-mowa wvhsi melrci nili goqa-nahi-grci inv wih nvtutv.

⁸ Chena inv, u pami nen-grgoli u gali, Meliku utvsi msi-saswi-lrkv-nagi ini wesi Jrne inv Fvfvhqi-ulalhiwanv, isiwa.

⁹ Chena mvci-lapwv inv ugimv; pvyaqv xvga nili u jeginga-mowanv chena nihi wa-wetvbe-makuci tvh wihfanigi uci tapigamu wvhsi ini meli-wagi;

¹⁰ macimi wrwenga, chena u gisgiqat-whrli Jrneli ini gip-hudewa-nagi.

¹¹ Chena wesi inv biadota msi-saswi-lrkv-nagi, macimi melofu inv iqafv : macimi inv u biadr-wrli ini u gali.

¹² Chena inv u kvgahgimrfhi biahi, chena nihki u mvmr-wrli nili we-yrnvli, macimi u lakunr-wrli; chena wapfaki nihki macimi u wetv-mvwr-wrli Jesiseli.

¹³ Huwa iah notvgi ini Jesise, ’n’uci srwa ulvgalhu, tvh pv-psqvh-gigi hawv nrnsihkv : chena nihki mahsa-lagiki iah nodrga-wrci yomv, u nakvlr-wrli nili udawanv uci gituh-faki.

¹⁴ Chena biaci wapfa inv, macimi u nawvhi maci mahsa-lalici, chena u gitaminr-qala-mvhi, chena u gegahtv-wvhi ut vhqiluga-milici.

¹⁵ Chena ia hulrqe-figi, nihki kvgahgimrfvki utfr-wrli, Cah’ pvpsqvhgi utvsi, chena ini grsagigi naiahkv pamfaiv; hrmaskvwi nihki mahsa-lagiki, wvhsi manvw’ hr-wrci nili udawa-nafv, macimi tapanvmu-wrci wih-fanewa pasiqi welvwv, u tair-wrli.

¹⁶ Pvyaqv Jesise, Naluhci nihki wih wapfaki; melahku wvh meci-wrci, u talvhi.

¹⁷ Chena nihki, Ni bonrpa utvsi nyrlvnwi pvyaqv wapsqada-wvli, chena ne-swi nvmahfvki, u talr-wrli.

¹⁸ Chena Biatv-wiku nili mrtvsi, isiwa.

¹⁹ Macimi u tapi-mvhi nihi Mahsa-lalici wvhsi lamtv-pilici svhgigi usgici nili mskuta-qvlu; chena u tah mvmanv nili nyrlvnwi wapsqada-wvli, macimi nihi neswi nvmafhi, chena spamagi pami lrpi manqvtugi, gisrtafi, chena u pusku-nrnv macimi u tah melvhi nihi kvgahgimrfhi nili wapsqada-wvli, chena nihki kvgah-mrfvki uci nihi mahsa-lalici.

²⁰ Chena wihfa-neki jrivhki, macimi dabho-loki : chena nihki u mrwvtunr-nrwv sa-sqvdo-dagi nili ba-xgahgrki uci, matvhfwi-gita-neswi sosoni-wvli uqihfanu.

²¹ Macimi nihki wa-wihfani-cki nvwitu nyrlvna matvhfana-tabawa ila-neki, tabrna iqaki chena vpaluhfvki.

²² Chena walanv u wihqihkv-wvhi nihi kvgahgimrfhi wvhsi ini ulvga-lagi lkv-malici, chena wvhsi ini vsuwa grmagi si negr-nelici, brluhi wi hrmaskv-wvhi nihi mahsa-lalici.

²³ Macimi iah mahci rmaskv-wrci nihi mahsa-lalici ini maqvhgigi si kuqic-sinwv nrn-sihkv wvhsi mvmrtu-maci : chena nrnsihkv ’’n’tvsi vpiwv ia hulr-qefigi.

²⁴ Wakv ini ulvgasi uwa ini lrutaqa ini msi-napi biat-hvnwi, u qelvhsi-lapwvhaku-nrwv nili babokvki; xvga u nvxgr-nr-wv ini mahsigikvgi.

²⁵ Chena ini mvwi-nyawana gcitvwrfewa ini tapahgi utfvhi, pami gituhfa usgi-tapia ini msi-napi.

²⁶ Macimi nihki kvgahgimrfvki iah nawr-wrci pami gituhfali usgi-tapia ini msi-napi, patfvgi-tahaki nihki, Inv jepv, iwvki; macimi wiv-kvhotv-moki xvga grwilv-waki.

²⁷ Pvyaqv walanv Jesise u talvhi, Uwasi-labwrku; nelv inv; tagi kih grwilvwa-pwv isiwa.

²⁸ Macimi Betv ud rpvftv-wrli, Dabalamiwatv, gelr-wivna inv, birlu isilu wvhsi bialu-dolv usgi-tapia ini napigi isiwa.

²⁹ Macimi inv Birlu, u talrli. Chena Betv lrsiwa ini ulvga-lagi uci, macimi ini usgi-tapia napigi pamfa, macimi u bialutv-wrli Jesiseli.

³⁰ Pvyaqv iah namagi ini mahsigikvgi, grwilvwa; macimi vlami gogi, wivkvho-tvmwv, Dabalamiwatv, wrpvnas-hilu, isiwa.

³¹ Macimi walanv Jesise mrsi jegi-lacaskv u tah fogi-nrli, chena,

⁰ gelv cv-gi dapwah-safv, nahiwa g’uci rnwahsa? u talrli.

³² Chena nihki spamagi ini ulvga-lagi ia hr-wrci, nvgaskv ini mahsigikvgi.

³³ Chena nihki ulvga-lagi ya-picki usvsilvwahr-wrli nili, Dabwawa, inv u Qihfvli Mvnatu gelv, isiwaki.

³⁴ Chena iah mahci kvbr-wrci nihki, ini vsisgegi si biaki Ginasuladewi-drmqa.

³⁵ Chena nihki ’n’tvsi uci ’laneki iah wr-kumr-wrci nili, mafhega si wrwengaki ini gryrugi drmqa, chena u biatvwr-wrli jrivhki ya-qiluga-lici;

³⁶ macimi u kvtuwvmr-wrli wvhsi manvwvhga kvtasgi pahsanv-mvwr-wrci ini tv npaniqr-dalici u betanikv : chena ya-tfwi pahsanvmu-wrci mafafiho-foki.