HINI UWASI-BIADRCIMOWA ya-sfadoci MAFIYO 13 - Hini Uwasi-u-Biadrcimowa 1929

¹ Hina ini grsagigi ini wegiwr-pagi uci luhfa Jesise, macimi pvkvci ini msi-napi lamvtvpiwv.

² Macimi ntvsi maci mahsalalici u mrwvtusgr-makuhi, waciganv’ hulvga-lagi Ikvmwv macimi lamvtvpiwv; macimi jrivhgi inv mahsalakv ini sqrbiagi nepwi.

³ Chena u kvlo-lvhi nihi maci wiahi pamrtuwawa-nagi, Wrpvmahku, isiwa, Inv ya-vh-cigatv wapfa wvhsi vhcigaci;

⁴ macimi yasi inv vhcigaci, nrlatv mengrnv ini pvkvci-kvnv si panfanu, macimi nihki wisgiluhfvki biaki chena u jrkvdrnrwv nili :

⁵ chena kutvkvli ini tvh sekunvhgiki si panfanu, tvh bur waivhkv vhdagi vsisgi : macimi walanv nili frginu, xvga mvtv waivhkv spihfanwi vsisgi :

⁶ macimi ina inv gesagi-gesfwv iah biatvhkufvgi, svhta nili; chena xvga mvtv ujapkvhkvtuwi, naputa nili.

⁷ Chena kutvkvli Ir nihi grwesahi si panfanu; macimi nihki grwesaki sqinegeki, chena u napwvsqahdonrwv nili :

⁸ chena kutvkvli ini uwasi vsisgegi si panfanu, macimi neginwi mvwifowa, nrlatv tabawa tfwagfanwi, nrlatv nakudwrsi, nrlatv nfwr-pitvgi.

⁹ Hinv ba-bonvkv utvwvgrwvli, welrni nodrgata.

¹⁰ Chena nihki kvgahgimrfvki biaki, macimi, Gociwa gelv gi kvlolrki nihki pamrtuwawanv? u talrwrli.

¹¹ Chena inv rpvfsa macimi, Gelvwv si meliwapi ini wvhsi wrkutvmaqa nili ini wafapvh-kvmigigi ugimrwi-drmqa uci ma-ivtki, wakv nihki mvtv si meliwapi ini.

¹² Xvga goqa-nafv-grci u bonv, inv wah si meliwapi, macimi inv wah bonv mrlafewa : wakv goqa-nafv-grci mvtv u bonv, wah mvmrqi muhci ini ba-bonvgi inv.

¹³ Waciganvhi nelv pamrtuwawanv ni kvlo-lrki nihki; xvga nagaki mvtv tapinvmoki nihki, chena nodrgaki mvtv tapahsaki nihki, mvtv nuhgi nanuhsaki nihki.

¹⁴ Macimi nihki si uqihfadota ini u mosigesqawa Visviv, ya-yoyrgi, Nodrgawa ga huci nodrgapwv gelvwv, macimi mvtv gah wiahisi nanuhsapwv; Chena nagawa ga huci nagapwv gelvwv, macimi mvtv gah wiahisi nawiwapwv :

¹⁵ Xvga yrmv lanvwa u tahi vlvlikv si kufaqvnwi, Macimi u tvwvgrwv nodrgawa si saqvnu, Chena u sgesakuwv naiahkv pafvkuqenoki nihki; Belaba nihki u sgesakuwv wi huci nawiwaki, Macimi uci nodrgaki u tvwvgrwv, Macimi uci nanuhsaki u tahiwv, Chena wi kutaqeki nuhgi, Macimi nih gegahrki nihki.

¹⁶ Pvyaqv gelvwv gisrdalamaqvtu ki sgesakuwv, xvga nili tapinvmoiv; macimi ki tvwvgrwv, xvga nili nodrgaiv.

¹⁷ Xvga tapilo gi talapwv nelv, yasi maci mrmosigesqacki macimi tapvsvwi ’laneki mrtvwi na-muwrci nili wiahi gelvwv na-namayaqa, macimi mvtv u namanrwv nili.

¹⁸ Notvmuku gelvwv waciganv’ hini u pamrtuwrfowa inv ya-vhcigatv.

¹⁹ Hina wiyafv iah notvgi ini uci kvlvwewa ini ugimrwi-drmqa, macimi mvtv nanuhsa ini, ina inv uwa biawv mvci-wiyafv, macimi u qv-qvtanvmrgoli ini mviahci vhdodalici u tahigi. Hinv yrmv ya-vhci-gagi ini pvkvci-kvnv.

²⁰ Chena inv ya-vhcigagi tvh nili sekunvgiki, hinv yrmv na-notvkv ini kvlvwewa, macimi walanv uwasi-labwrwi utvh-panv ini;

²¹ gawvgi mvtv u bonv ujapkvhkvtwi weyrgi, pvyaqv wesigi-fi mrlrqvsihi; macimi gesanrci-nvmowa walr nrnuhgrchadewa iah pv-faqeyrlici xvga ini kvlvwewa uci, walanv utvgikvh-sinwv inv.

²² Chena inv ya-vhcigagi alagenv nihi grwesahi, hinv yrmv na-notvkv ini kvlvwewa; macimi ini utvmafewa ini ya-lakuqvh-kvmigigi uci, chena ini pvwrwanv uci wvnimafewa napwvsqayrli ini kvlvwewa, macimi mvtv mvwifowa-niwi inv.

²³ Chena inv ya-vhcigagi ini uwasi vsisgegi, hinv yrmv na-notvkv ini kvlvwewa, macimi nanuhsa ini; yonv tapilo u negtu mvwifowa, macimi u biatu, nrlatv tabawa tfwag-fanwi, nrlatv nakudwrsi, nrlatv nfwr-pitvgi.

²⁴ Kutvgi nuhgi pamrtuwawa u tah pvgfanvmvwvhi ya-lvhfvmelici nihi, Hini wafapvh-kvmigigi ugimrwi-drmqa brsi ilani ya-dotv uwasi menkv u gitigr-nagi si tvqa-lama-qvtwi :

²⁵ pvyaqv ia-haiahi nabr-lici ilanihi, u mvda-ladewa-nvli biali u tidr-goli nahfrpi myrsi-wvsku alagenv ini kvwvsqi, chena wapfali.

²⁶ Pv-yaqv iah frgi-pvgigi ini macimi nepagi, hina uwa nvuqvtu nili myr-si-wvsku nahfrpi.

²⁷ Chena nihi ut vlolrkvnhi biahi inv da-ba-latvkv wegiwv, Yalaniwivni, hv mvtv uwasi menkv gi titu gi gitigr-nagi? uwa drniwa ucifaiv nili myrsi-wvsku? u takuhi.

²⁸ Macimi, Mvda-ladewanv yasi lvweci yomv, u talvhi. Chena Hv ni na hrpa uwa wvhsi macimi mrwvtunv-mrga nili? u takuhi nihi vlolrkvnhi.

²⁹ Pvyaqv, Mvtv, u talvhi; Belaba gah weci puqvh-ganvnrwv ini kvwvsqi, yasi mrwvtunv-maqa nili myrsi-wvsku.

³⁰ Welrni nayeswi wi sqineginu nakudwasi brlu’ hini kvwvsqhrwaga : macimi ini Irqr-niga ini kvwvsqhrwa, Mrwvtunv-muku nhihtv nili myrsi-wvsku, macimi vfipi-doku nili wvhsi fvgfv-maqa : wakv ini kvwvsqi ni kvwv-sqigr-nagi si mrwvtunv-muku, na hilrki nihki ga-kvwvsqhr-wacki, u talvhi.

³¹ Nuhgi kutvgi pamrtuwawa u tah pvgfanvmv-wvhi ya-lvhfv-melici nihi, Hini wafapvh-kvmigigi ugimrwi-drmqa brsi nakuti-paqa mvstvdewi menkv inwi, ma-mvmagi ilani, macimi u titu u gitigr-nagi :

³² heni svpkvhi gici-utvhpi lakuqv’ jrivhki mengrnv; pvya-qv iah kvtamo-yrgi ini, vliwi inwi notv nili mamagi-nvsku, macimi mtakuniwi, waciganvhi nihki wisgiluh-fvki ini manvtwi uci bia-ki macimi nili si Iwvhsi-noki ba-pga-ivkuki, iwv.

³³ Nuhgi kutvgi pamrtuwawa u kvlo-lvhi nihi; Hini wafapvh-kvmigigi ugimrwi-drmqa brsi ini unvlascikv ma-mvmagi iqawv inwi, macimi u gigitu nfwi tapvcikv-nagi lughrnv, brlu’ hini jrivhgi unata, iwv.

³⁴ Jrivhki yolumv wiahi Jesise u kvlo-lvhi pamrtuwawa-nagi nihi mahsa-lalici; macimi frgici pamrtuwawa mvtv wiahi u kvlo-lvhi nihi :

³⁵ wvhsi manvwv’ hini uqihfagi ya-iugi srpwi inv rar-mosigesqatv, Pamrtuwawanv nah si tvwanv ni doni; Na hrtutv wiahi gigifoiv ina uskvh-gahfanwi ini ya-laku-qvh-kvmigigi uci.

³⁶ Hina uwa u nvkvlvhi nihi mahsa-lalici, macimi ini wegiwv si becfa : chena u kvgahgimrfhi utfakuhi, macimi, Tapinrqi-wetv-mvwi-nrga ini pamrtuwawa nili si ini lr gitikv myrsi-wvsku, u ta-kuhi.

³⁷ Macimi rpvfsa, chena, Inv ya-vhdotv ini uwasi menkv u Qihfvli ilani inv;

³⁸ chena ini gitikv ya-lakuqvh-kvmigigi ini; chena ini uwasi menkv, iuhgoni nihki ini ugimrwi-drmqa uci uqih-fimrki; chena nili myrsi-wvsku niheni u qifhi inv mvci-wiyafv;

³⁹ chena inv mvda-ladewanv ya-vhdotv nili mvci-mvnatu inv : chena ini kvwvsqhrwa ini ya-qrgi ini ya-lakuqvh-kvmigigi; chena nihki ga-kvwvsqhr-wacki ancvleki nihki, iwv.

⁴⁰ Yasi waciganvhi mrwvtuno-daki nili myrsi-wvsku macimi fvgfo-daki skudagi; yone wa higi ina jaiahqvh-kvmigiga.

⁴¹ Hinv u Qihfvli ilani wah wrwenvhi uta an-cvle-mhi, macimi nihki ini u gimrwi-drmqa-mi wa huci mrwvtwi luh-fanr-nrwv jrivhki wiahi waci pami utvgikvh-sinagi, macimi nihi ma-jrfigi yasi Ivwelici,

⁴² chena ini wah si becfa pvgilr-wvhi nihi gasidagi skuta : ’n’ tvsi wah pami wihfvqa-wani macimi ini wah tvlwawah-fanu wepitvli.

⁴³ Hina uwa nihki ma-yrwela-ficki wah wvhfafv-moki brsi inv gesagi gesfwv betiga ini u gimrwewa-nilici u Fwrli. Hinv ba-bonvkv utvwvgr-wvli, welrni nodrgata.

⁴⁴ Hini wafapvh-kvmigigi ugimrwi-drmqa brsi pvwrwa inwi gi-gidota ini gitigr-nagi; ma-mkvgi ilani, macimi u gigitu; chena wapfa via uwasi-labwrwani macimi inv u myaga jrivhgi ba-bonvgi, macimi u tapanv ini gitikv.

⁴⁵ Nuhgi, ini wafapvh-kvmigigi ugimrwi-drmqa brsi ilani inwi wrdgetv u pami nvtuna-whvhi uwasi megafhi :

⁴⁶ macimi u mahci mkv-wrli nakuti megafvli gasuwa-lamaku-filici, wapfa inv macimi u myaga jrivhgi ba-bonvgi, macimi u tapanrli nili.

⁴⁷ Nuhgi, ini wafapvh-kvmigigi ugimrwi-drmqa brsi rqvsqhrkv inwi, ya-ipvgido-dagi ini msi-napigi, macimi mrwvtuni-gaiv jrgi ya-talici :

⁴⁸ ini ia uqihfagi, nihki utvhpanr-nrwv sqrbia-gesi; macimi nihki lamvtvbeki, chena u tah mrwvtunr-wvhi nihi wa-lafilici nili bonvhfu-cikvnv, wakv nihi ma-tafe-filici u pvgilr-wvhi.

⁴⁹ Yone wa higi ini ina jaiahqvh-kvmigiga : nihki ancvleki wah biaki, macimi wah pginr-wvhi nihi ma-jela-filici alagenv uci nihi ma-yrwela-filici,

⁵⁰ chena ni wah si becfa pvgilr-wvhi ni-hi gasidagi skuta : ’n’ tvsi wah pami wihfvqa-wani macimi ini wah tvlwawah-fanu wepitvli.

⁵¹ Hv ki nanuhsa-pwv gelvwv jrivhki yolumv wiahi? Hvnkv, u talr-wrli nihki.

⁵² Chena, Waciganvhi jrgi yr-ivwigatv mviahci kvgahgimrfiho-futv ini wafapvh-kvmigigi ugimrwi-drmqa isi brsi ilani ilafi da-balatvkv wegiwv, inv u biaci luhfvtu u pvwrwa uci wiahi usginwi macimi gahtv, u talvhi nihi.

⁵³ Chena ni biamikvtwi, iah mahci lutvgi Jesise yolumv pa-mrtuwawanv, ’n’uci wapfa.

⁵⁴ Chena welv ut vsisge-magi si pami biawv u kvgahgi-mvhi nihi betiga u msi-kvmikum-wrki, waciganvhi nihki cihsi-tahaki, chena, Drniwa uci bonv yrmv ilani yomv laburwa macimi yolumv mv-geci pakvtaf ewanv? iwvki.

⁵⁵ Hv mvtv yrmv inv utqi-pakvtafewi-lani u qihfvli? hv mvtv u gali Male yrlofoli? chena u janinvhi, Jamseli, chena Joseli, chena Svimvneli, chena Jotvseli?

⁵⁶ macimi ut iqamhi, hv mvtv jrivhki nihki weci gelvwa? Drniwa uwa uci bonrnv yrmv ilani jrivhki yolumv wiahi?

⁵⁷ Macimi u gisfaku-wrli nili. Pvyaqv Jesise, Mrmosigesqatv mvtv bur vhdali utvga-lamakufewa, waciwaphi nahvlwrkv ut vsisge-magi, macimi ya-drci wegiwv; u talvhi.

⁵⁸ Chena svpkvhi mvtv maci si Ivwi mvgeci pa-kvtafewanv ’n’tvsi xvga mvtv dapwahsawa-nihi.