ZƐKARƖYA 3 - WƖA TENIŊ

Wɩɩsʋllɩ sɩpaalaaraa nɩhɩaŋ gɛnnɩŋ bɩ disiniŋ kɛnɛ

¹ Ŋɩɩ nɛ Wɩa tɩndaarʋ-la dagɛmɛ Josua sɩ ŋaa Wɩɩsʋllɩ sɩpaalaaraa nɩhɩaŋ dɩ ʋ chɩŋ La TƖƖNA tɩndaarʋ-la sɩpaaŋ, ka Sɩtaanɩ chɩŋ ʋ nadiiŋ dɩ ʋ joŋ cheeriŋ pɩ Josua.

² La TƖƖNA tɩndaarʋ-la bʋla pɩ Sɩtaanɩ, “La TƖƖNA jaŋ kpɩa ŋ lɛ Sɩtaanɩ. La TƖƖNA sɩ lɩɩsɛ Jerusalɛm jaŋ kpɩa ŋ lɛ. Baala deeŋ nagɛ daaŋ fa sɩ hɛ nyiniŋ lɛ ba kaa lɩɩsɛ nɛ.”

³ Josua fa laalɛ gɛnnɩŋ sɩ kɛŋ nyɛsɩŋ nɛ a chɩŋ Wɩa tɩndaarʋ-la sɩpaaŋ.

⁴ Ŋɩɩ nɛ Wɩa tɩndaarʋ-la bʋla pɩ ʋ tɩntɩnnaa, “Má wuri ʋ gɛnnɩ-la.” Ŋɩɩ nɛ aŋ bʋla pɩ Josua ma, “Bee na mɩ laa ŋ wʋbɔŋŋɔɔ ta nɛ, mɩ jaŋ joŋ gɛnnɩŋ sɩ kɛŋ yɩrɩŋ a laalɩŋ.”

⁵ Ŋɩɩ nɛ mɩ ma bʋl, “Leŋ dɩ ba joŋ nyu-bɛlɛ sɩ bɩ disiniŋ kɛnɛ a bɛ ʋ nyuŋ.” Ŋɩɩ nɛ ba joŋ nyu-bɛlɛ sɩ bɩ disiniŋ kɛnɛ a bɛ ʋ nyuŋ, a laalʋ gɛnnɩŋ, ka La TƖƖNA tɩndaarʋ-la chɩŋ ba sɛmɛ.

⁶ La TƖƖNA tɩndaarʋ-la bʋl wɩɩŋ deeŋ a pɩ Josua:

⁷ Wɩɩ-la La TƖƖNA doluŋ kala Tɩɩna sɩ bʋla nɛ ŋ-la: “Dɩ ŋ nɛ jaŋ to mɩ wombiiŋ a ŋɩŋaa wɩalɩŋ mɩ sɩɩ chɛ, ŋɩɩ-na ŋ jaŋ bibeŋ mɩ dɩa arɩ ʋ kaalɩsɩŋ kala. Mɩ jaŋ pɩŋ dɩchɩnɩŋ nɩaa deemba kala sɩ hɛ daha tʋɔŋ.

⁸ Josua, Wɩɩsʋllɩ sɩpaalaaraa nɩhɩaŋ arɩ ŋ tɩntɩnnɩ dɔsʋ-la sɩ hɔŋ ŋ sɩpaaŋ, ma ŋaa magɩl nɛ aa dagɛ wɩalɩŋ maachie sɩ jaŋ kɔ. Má jegile nɩɩ: Mɩ jaŋ kɛŋ mɩ tɩntɩnna ba sɩɩ yɩrɛ Naakeliŋ a kaa kɔ.

⁹ Má beŋ tabɩɩ-la mɩ sɩ joŋo bil Josua sɩpaaŋ, tabɩɩ-bala nɛ aŋ kɛŋ sɩaa balɩpɛ. Mɩ jaŋ tuuri kʋŋ a hɛ ʋ lɛ, aŋ lɩɩsɛ tinteeŋ deeŋ nɩaa wʋbɔŋŋɔɔ ta tapʋl-bala. Mɩ-na ma TƖƖNA doluŋ kala Tɩɩna nɛ bʋla.

¹⁰ Tapʋlɩɩ-la, ma kʋŋkala jaŋ yɩrɛ ʋ dɔŋɔ tɩɩna dɩ ʋ kʋ hɔŋ ʋ girep tɩa arɩ ʋ tutogo bʋbʋɔŋ.”