ZƐKARƖYA 14 - WƖA TENIŊ

La TƖƖNA jaŋ kʋ beŋ dʋnɩa

¹ La TƖƖNA tapʋlʋŋ ka kɔ nɛ, ba jaŋ paa ma dʋa a kaa kpaa ma sɩɩŋ lɛ.

² Mɩ jaŋ kɛŋ tinteyee nɩaa kala kʋ hɛ dɔŋɔ dɩ ba yuo Jerusalɛm. Ba jaŋ yuo laa tabal-la, a paa ba dɩɩsɩŋ kɩaa, aŋ gurigi ba haalaa. Tabal-la nɩaa kpaa magɛ dɔŋɔ jaŋ mʋ yoŋ-baga, ama nɩkaanaa jaŋ ka tabal-la lɛ.

³ Ŋɩɩ nɛ La TƖƖNA jaŋ lɩɩ yuo tinteye-la, a nagɛ ʋ fa sɩ yuo laalɩŋ ŋɩɩ.

⁴ Bʋa-la lɛ, ʋ naasɩŋ jaŋ chɩŋ Olif tɩɩsɩŋ Peel-la nyuŋ, Jerusalɛm wɩɩpɔsʋŋ dɩɩrɩŋ, ka dɩ Olif tɩɩsɩŋ Peel-la kpaa balɩa, a chɩŋ wɩɩpɔsʋŋ a kaa mʋ wɩɩjʋʋlʋŋ, a leŋ dɩ lɩɩ-libi-bal pɩŋ ba pɛgɛ, dɩ peel-la kpaa magɛ dɔŋɔ hɛ wɩɩpɔsʋŋ nagʋa, dɩ kpaa magɛ dɔŋɔ ma hɛ wɩɩpɔsʋŋ nadiiŋ.

⁵ Ma jaŋ fá to lɩɩ-libe-la, bɛɛ wɩaa ʋ jaŋ kɛŋ ŋɩɩ mʋ yi lee-la ba sɩɩ yɩrɛ Azɛl. Ma jaŋ fá a nagɛ ma sɩ fá lɩɩ tinteeŋ sɩ zigile lɛ ŋɩɩ Juda kuoro Uzia kuoruŋ bʋa lɛ. Mɩ TƖƖNA Wɩa jaŋ kɔ, ʋ dɩ ʋ tɩndaaraa kala.

⁶ Tapʋlɩɩ-la, pʋlʋmʋŋ jaŋ tuo, waarɩŋ koo bʋrʋŋ ma jaŋ tuo.

⁷ Tapʋlɩɩ-la jaŋ ŋaa tapʋl-dabaŋ, ʋ bɩ jaŋ kɛŋ wɩɩhɛyɛ koo tɩtaŋɩŋ, dɩ wɩa nɛ jʋa ma, leriŋ ha jaŋ pʋllɛ. La TƖƖNA dʋndʋŋa nɛ jɩŋ tapʋlɩɩ-la.

⁸ Tapʋlɩɩ-la, lɩɩŋ sɩɩ pa mɩɩsɩŋ jaŋ pɛllɛ lɩɩ Jerusalɛm lɛ, kpaa magɛ dɔŋɔ jaŋ pɛllɛ mʋ wɩɩpɔsʋŋ dɩɩrɩŋ mʋgʋ-balɩŋ, dɩ kpaa magɛ dɔŋɔ ma pɛllɛ mʋ wɩɩjʋʋlʋŋ dɩɩrɩŋ mʋgʋ-balɩŋ, yibiiniŋ arɩ tafaaŋ kala.

⁹ La TƖƖNA jaŋ ŋaa dʋnɩa kala kuoro. Tapʋlɩɩ-la, La TƖƖNA dʋndʋŋa nɛ jaŋ hɛ nɩmɛ, ʋ yɩrɩŋ dʋndʋŋa nɛ ba jaŋ yɩyɩrɛ.

¹⁰ Tintee-la kala, a chɩŋ Geba lɛ a kaa mʋ Rimoŋ sɩ hɛ Jerusalɛm wɩɩpɔsʋŋ nadiiŋ dɩɩrɩŋ, jaŋ mɩɩra nagɛ lee-la ba sɩɩ yɩrɛ Araba. Ama Jerusalɛm jaŋ sii je a chɩŋ ʋ dɩchɩnɩŋ, a lɩɩ Bɛnjamɩŋ Boi-baalɩŋ a kaa mʋ Boi-baal Bumbuŋ leriŋ, a kaa mʋ Je-gʋnʋŋ Boi-baalɩŋ lɛ, a bɩra chɩŋ Hananɛl dɩɩ-leŋii-la lɛ a kaa mʋ kuoro girep nɛnɛɛ sɩnɩŋ dɩ-chagɩŋ.

¹¹ Nɩaa jaŋ bɩra hɔŋ nɩmɛ, ba maachie kala bɩra bɩ jaŋ chei lee-la. Jerusalɛm nɩaa jaŋ hɔŋ sɔm.

¹² Nyanyal-bɔŋ-la La TƖƖNA sɩ jaŋ joŋo hɛ tinteyee nɩalɩŋ kala sɩ yuo Jerusalɛm lɛ nɛ ŋ-la: Ba yaraa jaŋ pʋa, ka dɩ ba ha wei. Ba sɩaa jaŋ pʋa hɛ ba sɩɩ-gbanlonnuŋ lɛ. Ba nandelimee ma jaŋ pʋa hɛ ba niiree lɛ.

¹³ Bʋa-la lɛ, La TƖƖNA jaŋ joŋ fawʋllʋŋ kɩŋkɛŋ a hɛ nɩaa lɛ. Nʋʋkala jaŋ kɛŋ ʋ dɔŋɔ yuyuo.

¹⁴ Juda nɩaa ma jaŋ hɛ Jerusalɛm lɛ a yuyuo. Ba jaŋ laa tinteye-la kala sɩ golliba dʋa. Ba jaŋ laa sɛlɩmɛ, hɔpʋla arɩ gɛnnɩŋ a yʋgɛ woruŋ.

¹⁵ Nyanyal-bɔŋ-la dɔŋɔ tɩtɩa jaŋ jʋʋ ba janɩŋ arɩ ba janɩ-la sɩ nagɛ kakusuŋ, bʋntaŋŋaba, kakusuŋ, arɩ pʋsʋ-la kala sɩ hɛ bugo-la lɛ.

¹⁶ Ŋɩɩ nɛ tinteye-la nɩaa sɩ kʋ yuo Jerusalɛm aŋ bɩ sʋba, jaŋ mʋ jɩna na-kala a chʋɔlɛ Kuoro sɩ ŋaa La TƖƖNA doluŋ Tɩɩna, aŋ pɛ gbieli lɛŋŋɛɛ gbiele.

¹⁷ Dɩ dʋnɩa tinteye-la kʋŋkala nɩaa nɛ bɩ Jerusalɛm mʋa a chʋɔlɛ kuoro sɩ ŋaa La TƖƖNA doluŋ kala Tɩɩna, duonuŋ bɩ jaŋ nɩɩ pɩba.

¹⁸ Dɩ Ijipiti tɩŋŋaa nɛ bɩ mʋ pɛ gbieli lɛŋŋɛɛ gbiele-la, duonuŋ bɩ jaŋ nɩɩ pɩba. La TƖƖNA jaŋ joŋ nyanyal-bɔŋ-la ʋ sɩ joŋo hɛ tinteye-la sɩ bɩ mʋ gbieli lɛŋŋɛɛ gbiele-la a hɛ ba lɛ.

¹⁹ Dɔgɩsɩnɔ-la sɩ jaŋ puu Ijipiti tɩŋŋaa arɩ tinteye-la kala sɩ bɩ mʋ gbieli lɛŋŋɛɛ gbiele-la nɛ ŋɩɩ.

²⁰ Bʋa-la lɛ, ba jaŋ ŋmʋnsa hɛ janɩŋ bimbelimee lɛ BA ŊAA LA TƖƖNA KƖAA SƖ BƖ DISINIŊ KƐNƐ NƐ. Pupoye-la ma sɩ hɛ La TƖƖNA dɩa lɛ bɩ jaŋ kɛŋ disiniŋ a nagɛ Wɩɩsʋlʋŋ gbansɩ-la sɩ chɩŋ Wɩɩsʋllɩ koruŋ sɩpaaŋ.

²¹ Pupoi na-kala sɩ hɛ Jerusalɛm arɩ Juda lɛ, jaŋ ŋaa La TƖƖNA doluŋ kala Tɩɩna kɩaa sɩ bɩ disiniŋ kɛnɛ. Nɩalɩŋ kala sɩ jaŋ kɔ dɩ ba kpʋ pʋsʋŋ a ŋaa Wɩɩsʋlʋŋ jaŋ joŋ puposu-la dɔnsʋŋ a kaa chɔ nammɩa. Bʋa-la lɛ, bayala kala bɩ jaŋ hɛ La TƖƖNA doluŋ kala Tɩɩna dɩa lɛ.