ZƐKARƖYA 12 - WƖA TENIŊ

Wɩa jaŋ laa Jerusalɛm nɩaa ta

¹ Wɩɩ-la La TƖƖNA sɩ bʋla tɩgɛ Iziral lɛ nɛ ŋ-la. La TƖƖNA sɩ ŋaa wɩa-nyuŋ a leŋ ʋ jɛrɛ, a ŋaa dʋnɩa gentine, a mɛ nuhuobiine a joŋ dɩma hɛ ʋ lɛ, wɩɩ-la ʋ sɩ bʋla nɛ ŋ-la:

² “Mɩ jaŋ leŋ dɩ Jerusalɛm nagɛ nyʋnyʋala girep nɛnɛɛ sɩnɩŋ sɩ hɛ ʋ tʋɔŋ. Tinteye-la sɩ kpagʋ jaŋ nyʋa a bugi a gɩgɛrɛ. Nɩaa jaŋ kʋ golli Juda arɩ Jerusalɛm chu dɩ ba yuo.

³ Tapʋlɩɩ-la, dʋnɩa tinteyee kala sɩ jaŋ kʋ hɛ dɔŋɔ a chɩŋ ʋ lɛ, mɩ jaŋ leŋ dɩ Jerusalɛm nagɛ bʋŋ sɩ bɩ jigisi a pɩ tinteye-la kala. Nɩalɩŋ kala sɩɩ nɛrɩgɛ dɩ ba jigisu jaŋ pɩrɛ ba tɩtɩa.

⁴ Tapʋlɩɩ-la, mɩ jaŋ joŋ fawʋllʋŋ kɩŋkɛŋ a hɛ jɔɔ kala lɛ, a leŋ dɩ ba jɩjɩllaa ma nyɩnyaasɛ. Mɩ-na ma TƖƖNA nɛ bʋla. Mɩ jaŋ chaasa pɔ Juda nɩaa woruŋ, ama mɩ jaŋ leŋ dɩ tinteyee nɩaa janɩŋ kala nyʋlɩmɛ.

⁵ Ŋɩɩ nɛ Juda sɩpaalaaraa jaŋ bʋl ba tʋɔŋ lɛ, ‘Jerusalɛm nɩaa kɛŋ doluŋ, bɛɛ wɩaa La TƖƖNA doluŋ kala Tɩɩna nɛ ba Wɩa.’

⁶ Tapʋlɩɩ-la, mɩ jaŋ leŋ dɩ Juda sɩpaalaaraa nagɛ pupoiŋ sɩ chɔ dandʋla arɩ nyiniŋ lɛ, a nagɛ nyiŋgeliŋ sɩɩ sii sekelee. Ba jaŋ dii nadiiŋ arɩ nagʋa nɩalɩŋ kala sɩ golliba. Ama wɩɩkala bɩ jaŋ ŋaa Jerusalɛm nɩaa-na lɛ.

⁷ Mɩ-na ma TƖƖNA jaŋ laa sɩpaaŋ laa Juda nɩaa ta, dɩ yɩrɩ-la Devit doho nɩaa arɩ Jerusalɛm nɩaa sɩ jaŋ laa, sɩ́ Juda nɩaa kʋa kɩɩ.

⁸ Tapʋlɩɩ-la, mɩ-na ma TƖƖNA jaŋ chu tɔ nɩalɩŋ sɩ hɛ Jerusalɛm lɛ, dɩ ba tʋɔŋ nɩɩ-la sɩ paala pʋgʋsɛ kɛŋ doluŋ a nagɛ kuoro Devit, dɩ Devit doho nɩaa ma nagɛ mɩ-na Wɩa, a nagɛ mɩ-na ba TƖƖNA tɩndaarʋ-la sɩ laa ba sɩpaaŋ.

⁹ Tapʋlɩɩ-la, mɩ jaŋ chei tinteye-la kala sɩɩ yuo Jerusalɛm.

Ba yel nɩɩ-la ba sɩ tɔbɔ lɛ

¹⁰ Mɩ jaŋ joŋ mɩ Dɩma hɛ Devit doho nɩaa arɩ Jerusalɛm nɩaa lɛ, dɩ ba fɩfá nɩaa nenige aŋ chʋchʋɔlɛmɛ. Ba jaŋ bibeŋ mɩ-na nɩɩ-la ba sɩ tɔbɔ, a yel mɩ lɛ a nagɛ nɩa sɩɩ yel ʋ bii-bala lɛ. Ba tʋɔŋ jaŋ faasa chei a nagɛ nɩa tʋɔŋ sɩ cheye ʋ bii-bumbuŋ sʋʋŋ lɛ.

¹¹ Tapʋlɩɩ-la, yele jaŋ chaasa yʋgɛ Jerusalɛm lɛ a nagɛ ba sɩɩ yel Hadad Rimoŋ sɩ hɛ Megido tintee-taala lɛ.

¹² Tintee-la nɩaa jaŋ yel, dɩa na-kala nɩaa jaŋ yel, baalaa jaŋ yel ba dʋndʋŋ, dɩ haalaa ma yel ba dʋndʋŋ: Devit doho nɩaa arɩ ba haalaa, Netaŋ doho nɩaa arɩ ba haalaa,

¹³ Levi doho nɩaa arɩ ba haalaa, Sɩmɛɩ doho nɩaa arɩ ba haalaa,

¹⁴ a pɛ do-kaana-la dɩa dɩa nɩaa arɩ ba haalaa lɛ.”