ZƐKARƖYA 11 - WƖA TENIŊ

¹ Lɛbanɔŋ, kɛŋ ŋ borusuŋ suri dɩ nyiniŋ wuo dii ŋ kuolu tɩɩsɩŋ.

² Bʋtʋma, ŋmoo niiŋ, bɛɛ wɩaa kuoluŋ tele nɛ. Ba chei tɩɩsɩ-la sɩ kɛŋ yɩrɩŋ nɛ. Basaŋ chɛrɩ tɩɩsɩŋ, má ŋmoo niiŋ, ba keri duu-la sɩ faasa lugi tɩɩsɩŋ kala lo nɛ.

³ Má jegile nɩɩ pie-daaraa sɩɩ ŋmoo niiŋ, ba chei ba pʋsʋŋ dɩ-diilee nɛ. Má jegile nɩɩ naachigee sɩɩ huosu, ba chei Jɔdaŋ duu-la tʋɔŋ ba sɩɩ pɩŋ nɛ.

Pie-daaraa balɩa

⁴ Wɩɩ-la mɩ TƖƖNA Wɩa sɩ bʋla pɩmɛ nɛ ŋ-la: “Daa piese-la ba sɩ magɩla dɩ ba kpʋ.

⁵ Nɩalɩŋ sɩ yɔɔba kpʋba nɛ aŋ mʋ, ka ba bɩ ba dɔgʋsɔ. Nɩalɩŋ sɩ yallɛba sɩ, ‘Má dɛnnɛ La TƖƖNA, la ŋaa kɩa tɩmma nɛ.’ Ba dɩ-daaraa tɩtɩa bɩ ba nenige fá.

⁶ Mɩ ma bɩra bɩ jaŋ fá tintee-la nɩaa nenige, mɩ-na ma TƖƖNA nɛ bʋla. Mɩ jaŋ joŋ nʋʋkala hɛ ʋ dɔŋɔ tɩɩna arɩ ʋ kuoro nɩsɩŋ lɛ. Nɩaa deemba jaŋ chei tintee-la, ka mɩ bɩ jaŋ laa nɩalɩŋ ta ba nɩsɩŋ lɛ.”

⁷ Ŋɩɩ nɛ mɩ daa piese-la ba sɩ magɩla dɩ ba kpʋ, a wasa nyaŋ piese-la ba sɩ nyaga bil. Ŋɩɩ nɛ mɩ joŋ dantɩgɩsɩŋ balɩa a hɛ dɔŋɔ yɩrɩŋ Chonuŋ, dɔŋɔ ma Nii-maga, aŋ dɩdaa piese-la.

⁸ Mɩ kiri pie-daaraa batori chɛŋ bala tʋɔŋ. Piese-la bɛrɛmɛ, mɩ lɔl ba wɩaa

⁹ aŋ bʋl, “Mɩ bɩra bɩ jaŋ ŋaa ma dɩdaara. Kɩalɩŋ sɩ jaŋ sʋʋ, ba sʋʋ, kɩalɩŋ ma sɩ jaŋ lɛl, ba lɛl. Kɩalɩŋ ma sɩ ka gʋra didii dɔŋɔ.”

¹⁰ Ŋɩɩ nɛ mɩ joŋ mɩ dantɩga-la mɩ sɩɩ yɩrɛ Chonuŋ a boru, a chei nii-la mɩ sɩ hɛ mɩ dɩ tinteyee nɩaa kala pɛgɛ.

¹¹ Mɩ chei nii-la nɛ tapʋlɩɩ-la. Nɩalɩŋ sɩɩ na hɛɛŋ ba tʋɔŋ fa sɩɩ bemmi jɩma arɩ La TƖƖNA niiŋ wɩaa nɛ.

¹² Ŋɩɩ nɛ mɩ bʋla pɩ nɩalɩŋ, “Dɩ ma nɛ bene dɩ ʋ bʋa lɛ nɛ, má pɩmɛ mɩ time, ama dɩ ma nɛ bene dɩ ʋ bʋa lɛ dee, má kɛŋ.” Ŋɩɩ nɛ ba timmi warɩpʋla mara arɩ fii.

¹³ Ŋɩɩ nɛ La TƖƖNA bʋla pɩmɛ, “Joŋ warɩpʋla-la hɛ mɩ dɩɩ-bal-la dʋa tʋɔŋ. Ŋɩɩ nɛ mɩ joŋ warɩpʋla mara arɩ fii-la, yal-zɔŋ-la ba sɩ bene dɩ ʋ magɛmɛ a hɛ La TƖƖNA dɩɩ-bala-la dʋa tʋɔŋ.

¹⁴ Ŋɩɩ nɛ mɩ bori mɩ dantɩgɛ lɩa-la ma mɩ sɩɩ yɩrɛ Nii-maga, a chei naambiri-la fa sɩ hɛ Juda arɩ Iziral pɛgɛ.”

¹⁵ Ŋɩɩ nɛ La TƖƖNA bʋla pɩmɛ, “Bɩra ŋaa wɩaa a nagɛ pie-daara. Ama bʋa deeŋ-na lɛ, ŋaa wɩaa a nagɛ pie-daarɩ tɔɔ.

¹⁶ Mɩ jaŋ lɩɩsɛ pie-daara tintee-la lɛ, ʋ bɩ jaŋ chɩl piese-la sɩ lɛlɛ wɩaa, koo a bee chɛ pie-biisiŋ koo a vaarɛ kɩalɩŋ sɩ pɩra koo a pɩ kɩalɩŋ ma sɩ dolie kʋdiilee. Ama ʋ jaŋ chaŋ piese-la sɩ zɔmɔ nammɩa, a fogi ba naachɛŋŋɛɛ.

¹⁷ Wɩɩŋ puu pie-daarɩ-tɔɔ-la sɩ vɩa piese-la ta. Ba jaŋ joŋ tokobiiŋ ta ʋ nɩsɩŋ lɛ, a tɔɔ ʋ nadiiŋ sɩɩŋ. A leŋ dɩ ʋ nɩsɩŋ sʋʋ, dɩ ʋ nadiiŋ sɩɩŋ ma nyʋlɩmɛ.”