ZƐKARƖYA 10 - WƖA TENIŊ

La TƖƖNA jaŋ pɔ Juda nɩaa

¹ Má sʋl La TƖƖNA dɩ ʋ leŋ dɩ duonuŋ nɩɩ pɩma yibiiniŋ. La TƖƖNA nɛ yie leŋ duoŋ-bɩlɩmbaanaa tɔ. Ʋ nɛ yie leŋ duonuŋ nɩɩ pɩ nɩaa, nʋʋkala kʋduuloo wasɛ.

² Tɔŋŋɔɔ ka nyɩsɛ nɩaa nɛ, vʋgʋraa ma nɩna wʋnyɩɛrɩ wɩaa a nagɛ duosoo tʋɔŋ. Ba yie bʋl duosoo wɩaa sɩ ŋaa wʋnyɩɛrɩŋ nɛ. Ba yie nyagɛ nɩaa bɔyɛ pɛɩ nɛ. Ŋɩɩ leŋ nɩalɩŋ bɩbaarɛ a nagɛ piesee, ba nyagɛba bil a tɩŋ ba sɩ bɩ sɩpaalaara kɛnɛ wɩaa.

³ La TƖƖNA sɩ, “Mɩ baanɩŋ sii sɩpaalaara-la nyuŋ nɛ, mɩ jaŋ dɔgɩsɛ sɩpaalaara-la, bɛɛ wɩaa mɩ-na ma TƖƖNA doluŋ Tɩɩna jaŋ pɔ mɩ nɩaa, Juda nɩaa, a leŋ dɩ ba nagɛ jaaba sɩɩ tʋɔrʋ laalɩŋ lɛ.

⁴ Juda lɛ nɛ je-gʋnʋŋ tiebiiŋ jaŋ lɩɩ, ʋ lɛ nɛ lɛbɩŋ daapɛsɩŋ jaŋ lɩɩ, ʋ lɛ nɛ laalɩŋ toŋ jaŋ lɩɩ, ʋ lɛ nɛ sɩpaalaarʋ kala jaŋ lɩɩ.

⁵ Ba kala jaŋ ŋaa nɩduoru, a nʋɔsɛ ba dʋndɔŋŋɔɔ ŋmʋrɛ womporuŋ vʋchɔɔŋ lɛ. Mɩ-na ba TƖƖNA sɩ hɛ ba teeŋ wɩaa, ba jaŋ yuo dii ba dʋndɔŋŋɔɔ ja-jɩllaa.

⁶ Mɩ jaŋ leŋ dɩ Juda nɩaa kɛŋ doluŋ aŋ laa Josɛf doho nɩaa ta. Mɩ jaŋ fá ba nenige a kɛmba mɩɩra kɔ dɩa. Ba jaŋ nagɛ nɩa mɩ fa sɩ bɩ vɩa ta, bɛɛ wɩaa, mɩ nɛ ba TƖƖNA Wɩa, mɩ jaŋ laa ba sʋla.

⁷ Efirem nɩaa jaŋ mɩɩra nagɛ nɩduoruŋ dɩ ba tʋɔŋ tɔrɛ a nagɛ nɩa sɩ nyʋa girep nɛnɛɛ sɩnɩŋ. Ba biiriŋ jaŋ na ŋɩɩ dɩ ba tʋɔŋ tɔrɛ, dɩ ba jʋjʋɔsɛ mɩ-na ba TƖƖNA teeŋ.

⁸ Mɩ jaŋ fʋʋla yɩrɛba a kɛmba kʋ hɛ dɔŋɔ. Wʋtɩtɩɩ, mɩ jaŋ laaba ta, ba jaŋ bɩra yʋgɛ arɩ ba fa sɩ yʋga ŋɩɩ.

⁹ Mɩ kɛmba pɩsa hɛ nɩaa dɔnsʋŋ tʋɔŋ ma nɛ, ama ba ha jaŋ liisi mɩ wɩaa tintee-bolie-la lɛ. Ba dɩ ba biiriŋ kala jaŋ kɛŋ mɩɩsɩŋ, a mɩɩra kɔ.

¹⁰ Mɩ jaŋ kɛmba mɩɩra lɩɩ Ijipiti tinteeŋ kɔ, a kɛmba lɩɩ Asiiria tinteeŋ ma kɔ. Mɩ jaŋ kɛmba kɔ Gɩlɩad arɩ Lɛbanɔŋ tinteyee dɩ ba paala su lee-la kala, dɩ leriŋ bɩra tuo.

¹¹ Ba jaŋ to wʋwalɩmaa mʋgʋ-balɩŋ tʋɔŋ, a ŋmoo mʋgʋ-bal-la lɩɩ-peliŋ kala bil, dɩ Naayɩl fuo-la tʋɔŋ kala hɩl. Asiiria babii-ballɩŋ kala jaŋ tuu tinteeŋ, dɩ Ijipiti ma doluŋ kala dɛrɛ.

¹² Mɩ-na ma TƖƖNA jaŋ leŋ dɩ ba kɛŋ doluŋ, a vɩvɛŋ mɩ yɩrɩŋ lɛ. Mɩ-na ma TƖƖNA nɛ bʋla.”