WƖA YƖƖLAA 99 - WƖA TENIŊ

Wɩa nɛ kɩɩ kuoru kala

¹ La Tɩɩna nɛ kuoro, má leŋ dɩ tinteyee nɩaa kala chel. Ʋ hɔŋ ʋ kuoru kpasa nyuŋ nɛ, kɩalɩŋ sɩ nagɛ Wɩa tɩndaaraa a kɛŋ kɩŋkɛnsɩŋ pɛgɛ, má leŋ dɩ tinteeŋ ma zigili.

² La Tɩɩna nɛ kɛŋ doluŋ a hɛ Zaayɔŋ lɛ. Ʋ nɛ kɩɩ tinteyee nɩaa kala.

³ Nʋʋkala jaŋ dɛnnɛ ʋ yɩrɩ-balɩŋ sɩ kɛŋ fawʋllʋŋ, ʋ bɩ disiniŋ kɛnɛ.

⁴ Kuoro kɛŋ doluŋ, ʋ cho wʋtɩtɩɩ nɛ. Ŋ leŋe wʋtɩtɩɩ chaasa chɩŋ nɛ kpaŋkpaŋ Iziral tinteeŋ kala lɛ, a ŋaa wɩɩ-la sɩ maga arɩ wʋtɩtɩɩ.

⁵ Má leŋ dɩ La Tɩɩna Wɩa yɩrɩŋ sii, a dɛnnʋ ʋ naakparaa bʋbʋɔŋ. Ʋ bɩ disiniŋ kɛnɛ.

⁶ Mosis arɩ Arɔŋ ma fa ŋaa Wɩɩsʋllɩ sɩpaalaaraa nɛ. Samʋɛl ma fa ŋaa nɩalɩŋ sɩ bunso pɩpɩ Wɩa dɔŋɔ nɛ. Ba yie ŋmoo niiŋ pɩ La Tɩɩna, ʋ laa ba sʋla.

⁷ La Tɩɩna to duoŋ-bɩlɩmbaanɩŋ sɩ nagɛ jebiiŋ lɛ nɛ a bʋl wɩaa pɩba. Ba sɛɩ wɩalɩŋ a to wombie-la ʋ sɩ dagɛba.

⁸ La Tɩɩna Wɩa, ŋ laa ŋ nɩaa sʋla nɛ a joŋ ba wʋbɔŋŋɔɔ chɛba, ama ba sɩ kʋ ŋaa wɩaa chei, ŋ dɔgɩsɛba nɛ.

⁹ Má dɛnnɛ La Tɩɩna Wɩa, a chʋɔlʋ ʋ peel-la sɩ bɩ disiniŋ kɛnɛ lɛ. Ʋ nɛ La Tɩɩna Wɩa sɩ bɩ disiniŋ kɛnɛ.