WƖA YƖƖLAA 98 - WƖA TENIŊ

Wɩa nɛ dʋnɩa kuoro

¹ Má yɩɩ yɩɩl-falɩŋ pɩ La Tɩɩna, bɛɛ wɩaa ʋ ŋaa wʋkpuŋkperisiŋ nɛ. Ʋ naduo-la sɩ bɩ disiniŋ kɛnɛ nɛ ʋ kaa yuo dii ʋ dʋndɔŋŋɔɔ.

² La Tɩɩna leŋe nɩaa jɩŋ arɩ ʋ kɛŋ doluŋ dɩ ʋ laa nɩaa ta nɛ. Ʋ leŋe tinteyee nɩaa jɩŋ ʋ tʋɔpʋla lɛ nɛ.

³ Ʋ liise yi ʋ chono-la arɩ wʋtɩtɩɩ-la ʋ sɩ kɛnɛ Iziral tɩŋŋaa lɛ nɛ. Dʋnɩa nɩaa kala na ŋɩɩ la Wɩa sɩ laa nɩaa tɩta nɛ.

⁴ Dʋnɩa nɩaa kala, má yɩɩ yɩɩlaa arɩ tʋɔtɔrʋŋ, a ŋaa goŋ a pɩ La Tɩɩna. Má yɩɩ yɩɩlaa a gbieli.

⁵ Má du cheŋ a yɩɩ yɩɩlaa hɛ a pɩ La Tɩɩna, má du cheŋ a yɩɩ yɩɩlaa hɛ.

⁶ Má ŋmʋʋ nyilliŋ a ŋaa goŋ arɩ tʋɔtɔrʋŋ a pɩ La Tɩɩna sɩ ŋaa la kuoro.

⁷ Leŋ dɩ mʋgʋ-balaa arɩ kɩalɩŋ kala sɩ hɛ ba lɛ, dɩ ba ŋɩŋaa goŋ, dɩ dʋnɩa arɩ kɩalɩŋ kala sɩ hɛ ʋ lɛ ma ŋɩŋaa goŋ.

⁸ Má leŋ dɩ fuonuŋ porisi nɩsaa, dɩ dundolluŋ ma kala yɩɩ yɩɩlaa hɛ dɔŋɔ arɩ tʋɔtɔrʋŋ.

⁹ Leŋ dɩ ba yɩɩ yɩɩlaa La Tɩɩna sɩpaaŋ, bɛɛ wɩaa ʋ kɔ dɩ ʋ dii dʋnɩa nɩaa sarɩya nɛ. Ʋ jaŋ dii dʋnɩa nɩaa sarɩya arɩ tʋɔpʋla arɩ wʋtɩtɩɩ.