WƖA YƖƖLAA 97 - WƖA TENIŊ

Wɩa nɛ kɩɩ kuoru kala

¹ La Tɩɩna nɛ kuoro, tinteeŋ nɩaa, má leŋ dɩ ma tʋɔŋ tɔrɛ, dɩ tinteye-la lɩɩŋ sɩ gollo chu ma nɩaa jʋjʋɔsɛ.

² Duoŋ-bɩlɩmbaanɩŋ arɩ birimiŋ lim nɛ gollu. Tʋɔpʋla arɩ wʋtɩtɩɩ nɛ ŋaa ʋ kuoruŋ gentine.

³ Nyiniŋ nɛ laa ʋ sɩpaaŋ a dii ʋ dʋndɔŋŋɔɔ sɛmɛ na-kala.

⁴ Ʋ nyiniŋ lɩgɩsa su dʋnɩa kala nɛ, tinteeŋ nɩaa na a chichel.

⁵ La Tɩɩna sɩpaaŋ, peelee yʋɔla nɛ a nagɛ keliŋ sɩ ŋmɩɛra. Ba ŋmɩɛra nɛ La Tɩɩna sɩ tɩɩ dʋnɩa kala sɩpaaŋ.

⁶ Wɩa-jaŋ kɩaa kala heele bʋl ʋ tʋɔpʋla wɩaa nɛ, tinteyee nɩaa ma kala na ʋ tʋla.

⁷ Hɩɩsɩŋ dii vʋɩ-kpaaraa nɛ, nɩalɩŋ sɩ kɛŋ vʋɩ-pɛɩpɛɩba-la dɩdagɛ ba tɩtɩa, vesiŋ maa kpirimi La Tɩɩna sɩpaaŋ nɛ.

⁸ Zaayɔŋ nɩaa jaŋ nɩɩ a jʋɔsɛ dɩ Juda tabiisiŋ nɩaa ma tʋɔŋ tɔrɛ, a tɩŋ La Tɩɩna sɩ dii nɩaa sarɩya wɩaa.

⁹ La Tɩɩna Wɩa sɩ kɩɩ kʋŋkala, ŋ nɩɩ beŋ dʋnɩa kɩaa kala, ŋ nɛ yʋga kɩɩ vene kala.

¹⁰ La Tɩɩna cho nɩalɩŋ sɩ bɛrɛ wʋbɔŋŋɔɔ nɛ woruŋ, ʋ yie pɔ nɩalɩŋ sɩ laaʋ dii nɛ, a laaba tɩta nɩbɔŋŋɔɔ nɩsɩŋ lɛ.

¹¹ Wɩa pʋlʋmʋŋ chaana hɛ tʋɔpʋl tɩŋŋaa lɛ nɛ, a ŋaa nɩalɩŋ wʋŋaalaa sɩ tʋʋla ma tʋɔŋ tɔrɛ.

¹² Ma nɩalɩŋ sɩ kɛŋ tʋɔpʋla, má leŋ ma tʋɔŋ tɔrɛ La TƖƖNA nyuŋ, má jʋɔsɛ aŋ dɛnnɛ ʋ yɩrɩ zɔmʋŋ.