WƖA YƖƖLAA 96 - WƖA TENIŊ

Wɩa nɛ kɩɩ kuoru kala

¹ Má yɩɩ yɩɩl-falɩŋ a pɩ La TƖƖNA, dʋnɩa nɩaa arɩ kʋŋkala, má yɩɩ yɩɩlaa a dɛnnɛ La Tɩɩna.

² Má yɩɩ yɩɩlaa pɩ La Tɩɩna, má dɛnnʋ. Tapʋlɩɩ kala, má heele bʋl ŋɩɩ ʋ sɩ laala ta.

³ Má heele bʋl ʋ ballɩŋ wɩaa arɩ tɩntɩŋ-duoru-la ʋ sɩ tɩma a pɩ tinteyee nɩaa kala.

⁴ La TƖƖNA nɛ yʋga kɩɩ kʋŋkala a magɛ dɩ la faasa dɛnnʋ, ʋ nɛ maga dɩ la fá a kɩɩ vene kala.

⁵ Tintee-wogusu-la nɩaa kala kpaarɛ vesiŋ nɛ, ama La TƖƖNA nɛ ŋaa wɩa-nyuŋ.

⁶ Zɔmʋŋ arɩ ballɩŋ kala hɛ ʋ teeŋ, doluŋ arɩ tʋla su ʋ dɩa kala.

⁷ Má dɛnnɛ La TƖƖNA, tintee-na kala nɩaa, má dɛnnɛ La TƖƖNA a tɩŋ ʋ tʋla arɩ ʋ doluŋ wɩaa.

⁸ Má dɛnnɛ La TƖƖNA yɩrɩ-balɩŋ, má kɛŋ Wɩɩsʋlʋŋ kɩaa kaa kʋ jʋʋ ʋ dɩɩ-balɩŋ.

⁹ Má kpirime chʋɔlɛ La TƖƖNA sɩ bɩ disiniŋ kɛnɛ. Kʋŋ na-kala sɩ hɛ dʋnɩa lɛ, má chichel ʋ sɩpaaŋ.

¹⁰ Má bʋla pɩ tinteyee nɩaa kala, “La Tɩɩna nɛ kuoro. Ʋ nɛ leŋe tinteeŋ chɩŋ nɛ kpaŋkpaŋ, kʋŋkala bɩ jaŋ wuo kɛnʋ jigisi. Ʋ jaŋ dii dʋnɩa nɩaa sarɩya arɩ wʋtɩtɩɩ.”

¹¹ Kɩalɩŋ kala sɩ hɛ wɩa-nyuŋ, má jʋjʋɔsɛ, dɩ kɩalɩŋ ma kala sɩ hɛ tinteeŋ tʋɔŋ tɔrɛ. Mʋgʋ-balɩŋ arɩ kɩalɩŋ kala sɩ hɛ ʋ tʋɔŋ, má ŋaa goŋ,

¹² bagɩsɩŋ arɩ kʋduuloo kala, má jʋjʋɔsɛ. Tɩɩsɩŋ ma kala sɩ hɛ duuŋ lɛ jaŋ yɩɩ yɩɩlaa arɩ tʋɔtɔrʋŋ.

¹³ Ba jaŋ yɩɩ yɩɩlaa a pɩ La Tɩɩna. Ʋ jaŋ kʋ dii dʋnɩa nɩaa kala sarɩya. Ʋ jaŋ dii dʋnɩa nɩaa sarɩya arɩ tʋɔpʋla arɩ wʋtɩtɩɩ.