WƖA YƖƖLAA 94 - WƖA TENIŊ

Wɩa nɛ ŋaa dʋnɩa kala sarɩya diire

¹ La Tɩɩna, ŋ nɛ Wɩa sɩ yie dɔgɩsɛ nɩalɩŋ wʋŋaalaa sɩ bɩ zɔŋ. Dagɛba ŋɩɩ ŋ baanɩŋ sɩ naga, aŋ dɔgɩsɛba.

² Ŋ nɛ ŋaa dʋnɩa kala sarɩya diire, sii ŋaa wɩɩ, a joŋ sɩɩ-duo tɩŋŋaa wʋŋaalaa chɩmɩŋ tiŋ ba lɛ.

³ La Tɩɩna, ɛɛ nɛ nɩbɔmʋŋ tʋɔŋ jaŋ tɔrɛ, ɛɛ nɛ nɩbɔmʋŋ jaŋ jʋɔsa diene magɛ?

⁴ Wʋbɔŋ ŋaara-la kala ka bigisi ba tɩtɩa lɛ nɛ, a bʋbʋl babiibal wɩaa.

⁵ La Tɩɩna, baa bʋrɩgɛ ŋ nɩaa nɛ, ba nyagɛba bil nɛ.

⁶ Ba kpʋ yo-haalaa arɩ nʋhʋɔraa nɛ, a kpʋ biisinsiŋ ma,

⁷ aŋ bʋl, “La Tɩɩna bɩ wɩɩ-la la sɩ ŋaa na. Jekɔb Wɩa bɩ wɩɩ-la lɛ jɩŋ.”

⁸ Ma nɩyaara-la sɩ guoli nɩaa tʋɔŋ, má jegili, chɛ bɛɛ nɛ ma jaŋ jɩŋ wɩaa?

⁹ Wɩa nɛ joŋ dɩgɩlaa pɩla, ʋ nɛ pɩla sɩaa ma. Ma saa bɩɩna ʋ bɩ nɩɩ, a bɩ na ma koo?

¹⁰ Wɩa nɛ kɛŋ tinteyee nɩaa tʋra kɩkɩɩ, ma bɩɩna ʋ bɩ nɩaa wuo dɔgɩsɛ koo? Ʋ nɩɩ dagɛla wʋjɩmɩŋ. Ma bɩɩna ʋ tɩtɩa bɩ wʋjɩmɩŋ kɛnɛ koo?

¹¹ La Tɩɩna jɩŋ nuhuobiine tʋɔbɩɩnaa nɛ. Ʋ jɩma la tʋɔbɩɩnaa kala bɩ bʋbʋɔ kɛnɛ.

¹² La Tɩɩna, nɩalɩŋ kala ŋ sɩ daga a kɛmba tʋraa kɩɩ ŋ wombie-la ŋ sɩ bile dɩ la tuto lɛ, jaŋ kɛŋ tʋɔtɔrʋŋ.

¹³ Ŋ leŋe ba wiesi ba wʋjʋʋlaa lɛ nɛ, a kaa mʋ yi bʋa-la lɛ ŋ sɩ jaŋ lu bʋa dɩ nɩbɔŋŋɔɔ tuu.

¹⁴ La Tɩɩna bɩ jaŋ joŋ harɩŋ yɩa ʋ nɩaa, ʋ bɩ jaŋ vɩa nɩalɩŋ ʋ sɩ lɩɩsa pɩ ʋ tɩtɩa ta.

¹⁵ Sarɩya diire jaŋ bɩra kɛŋ wʋtɩtɩɩ a dii nɩaa sarɩya, nɩalɩŋ kala wʋŋaalaa sɩ tʋʋla jaŋ to ŋɩɩ harɩŋ.

¹⁶ Kʋbɛɛ nɛ jaŋ sii chɩŋ mɩ harɩŋ dɩ la yuo nɩbɔŋŋɔɔ? Kʋbɛɛ nɛ jaŋ chɩna pɛ mɩ lɛ dɩ la yuo wʋbɔŋ ŋaaraa?

¹⁷ La Tɩɩna, dɩ ŋ nɛ fa bɩ mɩ lɛ pɛ, ŋ-la mɩ fa hɛ lɛlɛɛ-jaŋ.

¹⁸ Mɩ sɩ sɩ, “Mɩ sɩɛra nɛ a chɩchɛ mɩ tel,” La Tɩɩna, ŋ chono-la sɩ bɩ dɛrɛ nɛ chagɛmɛ kɩɩ.

¹⁹ Dɩ mɩ tʋɔbɩɩnaa nɛ yʋga dɩ mɩ tʋɔŋ chei, ŋ nɛ yie nyagɛ mɩ bɔyɛ, mɩ tʋɔŋ bɩra tɔrɛ.

²⁰ Ŋ dɩ nɩalɩŋ sɩ bɩ sarɩya ka dii ʋ bʋa lɛ bɩ wɩɩ pɛ. Ba wʋŋaalaa kɛŋ wʋtɩtɩɩ kaa bɩrɩmɛ tulo nɛ.

²¹ Ba vʋʋra sii chɩŋ tʋɔpʋl tɩŋŋaa lɛ nɛ, aa kpʋ nɩalɩŋ sɩ bɩ wɩɩ cheye.

²² Ama La Tɩɩna nɛ ŋaa mɩ dɩɩ-duoŋ, mɩ Wɩa nɛ mɩ yuori, ʋ nɛ mɩ dɩ-duoŋ a nagɛ bʋŋ.

²³ Ʋ jaŋ joŋ ba wʋbɔŋŋɔɔ a gʋra dɔgɩsɛba, a cheiba a tɩŋ ba wʋbɔmɔ-la wɩaa. La Tɩɩna Wɩa jaŋ cheiba.