WƖA YƖƖLAA 92 - WƖA TENIŊ

Chɛ-wiesiŋ chɛɛŋ yɩɩlɩŋ.

¹ Ʋ ŋaa wʋzɔŋ nɛ dɩ la dɛnnɛ La TƖƖNA, a yɩɩ yɩɩlaa a zil Wɩa sɩ kɩɩ kʋŋkala,

² a heele bʋl ŋ chono-la sɩ bɩ dɛrɛ wɩaa chʋchʋɔ kala, tɩtaŋɩŋ ma dɩ la bʋl ŋɩɩ ŋ sɩ kɛŋ wʋtɩtɩɩ,

³ a du kɔnɛ a yɩɩ yɩɩlaa arɩ cheŋ a dɛnnɩŋ.

⁴ La TƖƖNA, mɩ tʋɔŋ tɔrɛ wʋduoru-la ŋ sɩ ŋaa nyuŋ nɛ, a tɩŋ ŋ wʋŋaalaa wɩaa, mɩ yɩɩ yɩɩlaa arɩ tʋɔtɔrʋŋ nɛ.

⁵ La TƖƖNA, tɩntɩmɩa-la ŋ sɩ tɩma ŋaa wʋbala nɛ. Ŋ tʋɔbɩɩnaa ma luŋ.

⁶ Nɩchʋʋla bɩ ba wuo jɩŋ, nɩyaarɩŋ bɩ ba bʋbʋɔŋ wuo jɩŋ.

⁷ Nɩbɔmʋŋ jaŋ wuo waa a nagɛ yaŋ, wʋbɔŋ-ŋaaraa jaŋ wuo kuori, ama Wɩa jaŋ cheiba a kaa mʋ wuu.

⁸ Ama ŋ-na La TƖƖNA nɛ jaŋ beŋ la kala a kaa mʋ wuu.

⁹ La TƖƖNA, la jɩma ŋ dʋndɔŋŋɔɔ jaŋ sʋʋ, ŋ dʋndɔŋŋɔɔ jaŋ lɛl, wʋbɔŋ ŋaaraa kala jaŋ pɩsɛ.

¹⁰ Ŋ leŋe mɩ kɛŋ doluŋ a nagɛ baga nɛ-bele nɛ, a pɛ mɩ lɛ mɩ tʋɔŋ tɔrɛ.

¹¹ Mɩ sɩɩŋ na Wɩa sɩ yuo dii mɩ dʋndɔŋŋɔɔ nɛ, mɩ dɩgɩlaa ma nɩɩ mɩ dʋndɔŋ-bisiŋ nii-ŋmobo.

¹² Tʋɔpʋl tɩŋŋaa jaŋ jigi, a nagɛ abɛ tɩɩsɩŋ, ba jaŋ waa a nagɛ kuolo sɩ hɛ Lɛbanɔŋ lɛ.

¹³ Ba nagɛ tɩɩsɩŋ ba sɩ chɔnsɔ La Tɩɩna dɩa lɛ nɛ, ba jaŋ jigi la Wɩa dɩɩ-balɩŋ lɛ.

¹⁴ Ba jaŋ hɩɛsɛ, aŋ ha nɩnɛŋ. Ba jaŋ kɛŋ yarɩfɩɛlaa dɩ ba pɩpaarɩŋ zɔŋ.

¹⁵ Ŋɩɩ daga arɩ La TƖƖNA kɛŋ wʋtɩtɩɩ, a ŋɩŋaa wɩaa ba bʋa lɛ. Ʋ nɛ mɩ dɩ-duoŋ, ʋ nagɛ bʋŋ nɛ mɩ teeŋ, ʋ bɩ bɔŋ mʋa ma.