WƖA YƖƖLAA 91 - WƖA TENIŊ

Wɩa nɩɩ pɔla

¹ Dɩ Wɩa sɩ kɩɩ kʋŋkala nɛ chu tɔ nʋʋ, tɩɩna jaŋ na wiese Wɩa doluŋ kala Tɩɩna teeŋ.

² Ʋ jaŋ wuo bʋl, “La Tɩɩna, ŋ nɛ mɩ yuori, ŋ nɛ ŋaa mɩ dɩɩ-duoŋ arɩ mɩ Wɩa, mɩ laaŋ dii nɛ.”

³ Ʋ jaŋ lɩɩsɩŋ bɛrɛ lɛ, a lɩɩsɩŋ nyanyal bɔŋŋɔɔ kala sɩɩ kpʋ nɩaa lɛ.

⁴ Ʋ jaŋ chu tɔŋ, dɩ wɩɩ sɩ́ŋ jʋʋ. Ʋ wʋtɩtɩɩ jaŋ nagɛ hɔɔ-taala-la laalɩyuoroo sɩ kaa kɛrɛɛ laa bayuori hɛŋŋɛɛ, koo a nagɛ jebiiŋ ba sɩ saa kɛrɛ taŋ a tɔ hɛ ŋ lɛ.

⁵ Ŋ bɩ jaŋ fɩfá wɩalɩŋ ba sɩɩ ŋaa tɩtaŋɩŋ, koo hɛmɛ-la ba sɩɩ yuo wɩɩhɛyɛ.

⁶ Ŋ bɩ birimiŋ tʋɔŋ nyanyal bɔŋŋɔɔ sɩɩ kpʋ nɩaa, koo wʋlɔrʋnʋ-la sɩɩ chei nɩaa wɩɩhɛɛ siesee ma ka fá.

⁷ Nɩaa jaŋ yi bʋɩ fiiba a tele sʋʋ golluŋ, ama wʋbɔŋ kala bɩ jaŋ ŋaa ŋ-na lɛ.

⁸ Ŋ ta jaŋ kɛŋ sɩɩŋ nɛ a na ŋɩɩ ba sɩɩ dɔgɩsɛ nɩbɔŋŋɔɔ.

⁹ Dɩ ŋ nɛ leŋe Wɩa sɩ kɩɩ kʋŋkala ŋaa ŋ dɩjʋʋlʋŋ, a yuori La Tɩɩna,

¹⁰ ŋɩɩ-na wʋbɔŋ kala bɩ jaŋ ŋaa ŋ lɛ. Wʋlɔrʋ ma kala bɩ jaŋ kʋ kpagɛ ŋ dɩa.

¹¹ Wɩa jaŋ bʋl ŋ wɩaa pɩ ʋ tɩndaaraa, dɩ ba pɔŋ woruŋ lee na-kala ŋ sɩɩ mʋ.

¹² Ba jaŋ joŋuŋ kori dɩ ŋ sɩ́ ŋ naaŋ joŋo ŋmoo tabɩɩŋ.

¹³ Ŋ jaŋ vɩvɛŋ naachigee arɩ dɩŋŋaa tʋɔŋ, a nʋɔsɛ naachigi-duoruŋ arɩ dɩŋŋaa.

¹⁴ Wɩa sɩ, “Nɩalɩŋ kala sɩ chomi, mɩ jaŋ laaba ta, mɩ jaŋ chu tɔ ba lɛ a tɩŋ ba sɩ jɩmmɛ wɩaa.

¹⁵ Dɩ ba nɛ yɩrɛmɛ, mɩ jaŋ sɛɩ. Dɩ ba nɛ jʋʋ wɩɩ ma, mɩ jaŋ hɛ ba teeŋ, a laaba ta a zilba.

¹⁶ Mɩ jaŋ pɩba mɩɩ-duduoŋ, a dagɛba ŋɩɩ mɩ sɩ laa nɩaa tɩta.”