WƖA YƖƖLAA 9 - WƖA TENIŊ

Yɩɩl-la Devit sɩ yɩɩ pɩ gɔgʋ-hɩaŋ.

¹ Mɩ jaŋ dɛnnɩŋ La Tɩɩna arɩ mɩ tʋɔŋ kala. Mɩ jaŋ bʋl wʋkpuŋkperisi-la kala ŋ sɩ ŋaa.

² Wɩa sɩ kɩɩ kʋŋkala, mɩ jaŋ yɩɩ yɩɩlaa arɩ tʋɔtɔrʋŋ a tɩŋ ŋ wɩaa. Mɩ jaŋ yɩɩ yɩɩlaa a dɛnnɩŋ.

³ Mɩ dʋndɔŋŋɔɔ sɩ chemiŋ, ba mɩɩra fá nɛ a tele sʋʋ.

⁴ Ŋ hɔŋ ŋ kuoru kpasa lɛ nɛ a dii sarɩya arɩ wʋtɩtɩɩ, a dagɛ arɩ mɩ kɩaa sɩma nɛ.

⁵ Ŋ kpɩa tinteyee lɛ nɛ, a kpʋ nɩbɔŋŋɔɔ, a leŋ ba yɩrɩŋ dɩsɛ a kaa mʋ wuu.

⁶ Ŋ chei la dʋndɔŋŋɔɔ nɛ a kaa mʋ wuu. Ŋ yigi ba tabalaa lo nɛ, nʋʋ bɩra bɩ jaŋ liisi ba wɩaa.

⁷ La Tɩɩna nɛ kuoro a kaa mʋ wuu. Ʋ hɔŋ ʋ kuoru kpasa nyuŋ nɛ a kɛŋ ʋ tɩtɩa hɛ dɔŋɔ dɩ ʋ dii sarɩya.

⁸ Ʋʋ dii dʋnɩa nɩaa sarɩya arɩ tʋɔpʋla nɛ, aa beŋ tinteyee nɩaa arɩ wʋtɩtɩɩ.

⁹ La Tɩɩna nɛ nɩalɩŋ wɩaa sɩ nyaga bil yie fá mʋ yuori, ʋ nɛ dɩ-duo-la nɩaa sɩ yie fá mʋ dɩ wɩaa nɛ jʋʋba.

¹⁰ Nɩalɩŋ sɩ jɩmɩŋ joŋ ba yɩɛlaa hɛ ŋ lɛ nɛ. Ŋ bɩ nɩalɩŋ sɩ kɔ ŋ teeŋ kire tɩta.

¹¹ Má yɩɩ yɩɩlaa a dɛnnɛ La Tɩɩna, ʋ hɔŋ kuoru kpasa nyuŋ nɛ Zaayɔŋ lɛ a bibeŋ ʋ nɩaa. Má bʋl wɩalɩŋ kala ʋ sɩ ŋaa a pɩ tinteyee nɩaa.

¹² Nɩalɩŋ sɩ ŋaa wɩaa chei, ŋ jaŋ dɔgɩsɛba. Ŋ bɩ jaŋ yʋ, koo a vɩa dɩ ŋ jegile nɩɩ nɩalɩŋ sɩɩ na hɛɛŋ yele.

¹³ La Tɩɩna, na ŋɩɩ mɩ dʋndɔŋŋɔɔ sɩɩ dɔgɩsɛmɛ. Mɩɩ sʋlʋŋ, fá mɩ nenige aŋ lɩɩsɛmɛ sʋʋŋ bʋa lɛ,

¹⁴ dɩ mɩ wuo chɩŋ Jerusalɛm boi-baalaa niiŋ a yɩɩ yɩɩlaa dɛnnɩŋ. Mɩ tʋɔŋ jaŋ tɔrɛ nɩmɛ a tɩŋ ŋ sɩ laamɛ ta wɩaa.

¹⁵ Tinteye-la nɩaa sɩ bɩ Wɩa jɩŋ foro tuu buotuonu-la ba tɩtɩa sɩ luo nɛ. Bɛrɩsɩ-la ba sɩ bɛrɛ gʋra kɛsɛ ba tɩtɩa nɛ.

¹⁶ La Tɩɩna wʋtɩtɩɩ lɛ nɛ ŋ jaŋ to a jɩmʋ. Wʋbɔmɔ-la nɩbɔŋŋɔɔ sɩ ŋaa nagɛ bɛrɛ nɛ a gʋra kɛsɛba.

¹⁷ Nɩbɔŋŋɔɔ jaŋ sʋʋ a mʋ lɛlɛɛ-jaŋ, tinteye-la nɩaa kala sɩ yʋ Wɩa wɩaa.

¹⁸ Ama ʋ bɩ jaŋ yʋ nɩalɩŋ sɩ bɩ ba tɩtɩa lɛ wuo pɛ wɩaa, koo a leŋ dɩ summoo yɩɛlaa ŋaa pɛɩ.

¹⁹ La Tɩɩna, sii a ŋaa wɩɩ, sɩ́ leŋe dɩ tinteye-la sɩ bɩŋ jɩŋ yuo dii. Leŋ dɩ ba chɩŋ ŋ sɩpaaŋ dɩ ŋ dii ba sarɩya.

²⁰ Leŋ dɩ fawʋllʋŋ faasa kɛmba, leŋ ba jɩŋ arɩ ba ŋaa nuhuobiine nɛ, ba jaŋ sʋʋ.