WƖA YƖƖLAA 89 - WƖA TENIŊ

Yɩɩl-la Ɛtaŋ, Ɛzɩra tɩɩna-la sɩ yɩa.

¹ La Tɩɩna, mɩ jaŋ yɩɩ yɩɩlaa a tɩgɛ ŋ chono-la sɩ bɩ dɛrɛ lɛ, a kaa mʋ wuu. Mɩ jaŋ heele bʋl ŋ wʋtɩtɩɩ-la wɩaa, dɩ nɩalɩŋ ma ba ha sɩ jaŋ lʋl sii nɩɩ.

² Mɩ jaŋ leŋ dɩ ba jɩŋ arɩ ŋ chono-la chaasa chɩŋ nɛ a kaa mʋ wuu. Ŋ wʋtɩtɩɩ ma chɩŋ kpaŋkpaŋ a nagɛ wɩa-nyuŋ.

³ Ŋ bʋla, “Mɩ bil niiŋ nɛ mɩ dɩ nɩɩ-la mɩ sɩ lɩɩsa pɛgɛ, mɩ ŋmɩɛsa pɩ mɩ tɩntɩnna Devit nɛ a bʋl,

⁴ ‘Ŋ doho nɩaa nɛ jaŋ didii kuoruŋ a kaa mʋ wuu, nɩalɩŋ ma ba ha sɩ jaŋ lʋl tʋɔŋ, dɩ ma kuoruŋ chɩŋ kpaŋkpaŋ.’ ”

⁵ La TƖƖNA, wɩa-nyuŋ kɩaa yɩɩ yɩɩlaa a mʋ tɩgɛ wʋkpuŋkperisi-la ŋ sɩ ŋaa lɛ nɛ. Wɩa tɩndaaraa ma dɛnnɩŋ a tɩgɛ ŋ wʋtɩtɩɩ lɛ.

⁶ Kʋŋkala tuo wɩa-nyuŋ sɩ jaŋ wuo kɛŋ ʋ tɩtɩa magɩsɛ La Tɩɩna. Ŋ tɩndaara-la kʋŋkala tuo a magɛ ŋ-na La Tɩɩna.

⁷ Ŋ tɩndaaraa kala tʋɔŋ, ŋ-na Wɩa nɛ ba chaasaa fá woruŋ. Kɩalɩŋ kala sɩ golluŋ ka fáŋ nɛ, ŋ nɛ kɩɩ ba kala.

⁸ La Tɩɩna Wɩa doluŋ kala Tɩɩna, kʋbɛɛ nɛ magɩŋ? La TƖƖNA, ŋ nɛ kɛŋ doluŋ arɩ wʋtɩtɩɩ.

⁹ Ŋ nɩɩ beŋ mʋgʋ-balɩŋ, dɩ ʋ lɩɩ pel-duoŋ nɛ sie, ŋ yie ŋaa ʋ sigili nɛ.

¹⁰ Ŋ nɛ kɛŋ mʋgʋ-balɩŋ tʋɔŋ baŋgarɛ-la ba sɩɩ yɩrɛ Rahab keri muno muno a nagɛ kʋa ba sɩ kpʋa, aŋ kɛŋ ŋ naduo-la ŋmoo ŋ dʋndɔŋŋɔɔ pɩsɛ.

¹¹ Ŋ nɛ tɩɩ wɩa-nyuŋ arɩ tinteeŋ kala. Ŋ nɛ ŋaa dʋnɩa arɩ kɩalɩŋ kala sɩ hɛ ʋ lɛ.

¹² Ŋ nɛ ŋaa wɩɩpɔsʋŋ nagʋa dɩɩrɩŋ arɩ wɩɩpɔsʋŋ nadiiŋ dɩɩrɩŋ. Peel-la ba sɩɩ yɩrɛ Tabɔ arɩ peel-la ba sɩɩ yɩrɛ Hɛmɔŋ, ba tʋɔŋ tɔrɔ nɛ ba yɩɩ yɩɩlaa a dɩdɛnnɩŋ.

¹³ Ŋ kɛŋ doluŋ nɛ woruŋ, ŋ dol-la saa yʋga ma, ʋ bɩ magɩa kɛnɛ.

¹⁴ Tʋɔpʋla arɩ tɛŋɛ nɛ ŋaa ŋ kuoruŋ gentine, ŋ chono-la sɩ bɩ dɛrɛ arɩ wʋtɩtɩɩ ma nɛ laa ŋ sɩpaaŋ.

¹⁵ La Tɩɩna, nɩalɩŋ sɩ yɩɩ yɩɩlaa a dɩdɛnnɩŋ tʋɔŋ jaŋ tɔrɛ, nɩalɩŋ sɩɩ vɛŋ ŋ sɩpaaŋ pʋlʋŋ-la lɛ.

¹⁶ Baa jʋɔsɛ ŋ yɩrɩŋ lɛ nɛ aa dɛnnɩŋ tapʋlɩɩ kala, ŋ tʋɔpʋl wʋŋaalaa nɛ laa yɩrɩŋ pɩpɩba.

¹⁷ Ŋ nɛ ŋaa ba tʋla arɩ ba doluŋ. Ŋ chonuŋ nɛ leŋe la wasa kɛŋ doluŋ woruŋ.

¹⁸ La Tɩɩna, ŋ nɛ lɩɩsɛ nɩɩ-la sɩ jaŋ pɔla, a pɩla. Ŋ-na Iziral tɩŋŋaa Wɩa sɩ bɩ disiniŋ kɛnɛ, ŋ nɛ lɩɩsɛ la kuoro pɩla.

¹⁹ Faafaa-la ŋ sɩ bʋl wɩaa arɩ duosoo tʋɔŋ a pɩ nɩalɩŋ sɩ laaŋ dii, ŋ bʋla, “Mɩ joŋ doluŋ pɩ laalɩyuori-duo nɛ. Mɩ lɩɩsɛ bapʋɔsɩ-bie nɛ mɩ nɩaa tʋɔŋ ʋ laa yɩrɩŋ.

²⁰ Mɩ lɩɩsɛ mɩ tɩntɩnna Devit nɛ, a joŋ Wɩɩsʋllɩ nʋʋŋ tɩsʋ, ʋ dii kuoruŋ.

²¹ Mɩ jaŋ chɩŋ ʋ harɩŋ bʋa na-kala, a pɛ ʋ lɛ dɩ ʋ kɛŋ doluŋ.

²² Ʋ dʋndɔŋ kala bɩ jaŋ wuo yuo diiu. Nɩbɔŋ ma kala bɩ jaŋ wuo nyagʋ bil.

²³ Mɩ jaŋ bʋrɩgɛ ʋ dʋndɔŋŋɔɔ ʋ sɩpaaŋ, a kpʋ nɩalɩŋ kala sɩ bɛrʋ.

²⁴ Mɩ wʋtɩtɩɩ arɩ mɩ chono-la sɩ bɩ dɛrɛ jaŋ hɛ ʋ teeŋ. Mɩ jaŋ leŋ dɩ ʋ kɛŋ doluŋ mɩ yɩrɩŋ lɛ.

²⁵ Mɩ jaŋ leŋ dɩ ʋ bibeŋ tinteye-la ma kala sɩ hɛ mʋgʋ-balaa arɩ fuonuŋ cholo.

²⁶ Ʋ jaŋ yɩrɛmɛ a bʋl, ‘Ŋ nɛ mɩ Nyɩmma, mɩ Wɩa, mɩ dɩ-duoŋ arɩ mɩ Laataara.’

²⁷ Mɩ jaŋ lɩɩsʋ dɩ ʋ ŋaa mɩ hambolibii bumbuŋ. Ʋ nɛ jaŋ laa yɩrɩŋ a kɩɩ kuorusu-la kala sɩ hɛ dʋnɩa lɛ.

²⁸ Mɩ jaŋ chou a kaa mʋ wuu. Nii-la sɩ hɛ mɩ dɩ ʋ pɛgɛ bɩ jaŋ kɔ dɩ ʋ birige.

²⁹ Ʋ kuoruŋ jaŋ chɩŋ kpaŋkpaŋ a kaa mʋ wuu, a nagɛ wɩa-nyuŋ sɩ chɩŋ ŋɩɩ. Bʋa na-kala lɛ, ʋ doho nʋʋ nɛ jaŋ dii kuoruŋ.

³⁰ Ama dɩ Devit doho nɩaa nɛ bɩ mɩ wombie-la mɩ sɩ bile ka to, a bɩ mɩ wʋbʋlaa kaa tɩtɩŋ,

³¹ dɩ ba nɛ bɩ wɩalɩŋ mɩ sɩ sɩ ba tuto ka to, a vɩa dɩ ba to wɩalɩŋ mɩ sɩ daga dɩ ba tuto,

³² mɩ jaŋ dɔgɩsɛba a tɩŋ ba wʋbɔŋŋɔɔ wɩaa, ba jaŋ na hɛɛŋ a tɩŋ ba wʋbɔŋŋɔɔ wɩaa.

³³ Ama mɩ bɩ jaŋ leŋ dɩ chono-la mɩ sɩ kɛnɛ arɩ Devit dɛrɛ. Mɩ bɩ jaŋ leŋ dɩ nii-la mɩ sɩ hɛ pʋ birigi.

³⁴ Mɩ bɩ jaŋ chei nii-la mɩ sɩ bile mɩ dɩ ʋ pɛgɛ, koo a lɩɩ wɩalɩŋ mɩ sɩ bʋla harɩŋ.

³⁵ Mɩ chaasa ŋmɩɛsɛ bala nɛ mɩ yɩrɩ zɔmʋŋ lɛ a pɩ Devit, mɩ bɩ jaŋ nyɩɛ wɩaa pʋ.

³⁶ Ʋ doho nɩaa nɛ jaŋ didii kuoruŋ bʋa na-kala. Mɩ sɩpaaŋ, ʋ kuoruŋ jaŋ chɩŋ a kaa mʋ wuu a nagɛ wɩɩpɔsʋŋ sɩ chɩŋ ŋɩɩ.

³⁷ Ʋ jaŋ chɩŋ kpaŋkpaŋ a kaa mʋ wuu, a nagɛ chɛnɛ sɩ ŋaa mɩ magɩlɩŋ a chɩŋ wɩa-nyuŋ ŋɩɩ.”

³⁸ Ama ŋ vɩa kuoru-la nɛ a kɛnʋ gbesi, ŋ na baanɩŋ nɩɩ-la ŋ sɩ lɩɩsa nyuŋ nɛ.

³⁹ Ŋ chei nii-la ŋ sɩ bile ŋ dɩ ŋ tɩntɩnna pɛgɛ nɛ, aŋ suri ʋ kuoru nyunchuulo ta tinteeŋ ʋ birisi.

⁴⁰ Ŋ ŋmoo jebie-la ba sɩ saa kɛrɛ ʋ tabalɩŋ a lo nɛ, a leŋ ʋ dɩɩ-duoruŋ kala pɩŋ jikpeeŋ.

⁴¹ Nʋʋ na-kala sɩ kʋʋ bal pɩpaa ʋ kɩaa. Ʋ mɩɩra bɩrɩmɛ mɔmɩɩ nɛ a pɩ ʋ pɛ-jʋʋraa kala.

⁴² Ŋ leŋe ʋ dʋndɔŋŋɔɔ yuo diiu nɛ, ŋ leŋe ʋ dʋndɔŋŋɔɔ kala jʋɔsɛ ʋ nyuŋ nɛ.

⁴³ Ŋ kɛŋ kuoro tokobiiŋ niiŋ bɩrɩmɛ nɛ, aŋ leŋ ba yuo diiu laalɩŋ lɛ.

⁴⁴ Ŋ kɛŋ ʋ kuoru dantɩga laa ʋ nɩsɩŋ lɛ nɛ, aŋ kɛŋ ʋ kuoru kpasa ma bɩrɩma chu.

⁴⁵ Ŋ leŋe ʋ guu hɩɛsɛ nɛ, ŋ joŋ hɩɩsɩŋ gɛrɩŋ laalʋ.

⁴⁶ La TƖƖNA, ɛɛ nɛ ŋ jaŋ faa a diene magɛ? Ŋŋ chɛ dɩ ŋ kɛŋ ŋ tɩtɩa faa deeŋ deeŋ nɛɛ? Ɛɛ nɛ ŋ baanɩŋ jaŋ sii nagɛ nyiniŋ a diene magɛ?

⁴⁷ Liise yi mɩ mɩɩsɩŋ sɩ bɩ duomi lɛ, ŋ ŋaa nuhuobiinee kala dɩ ba sʋsʋʋ nɛ.

⁴⁸ Kʋbɛɛ nɛ hɛ nɩmɛ a bɩ jaŋ sʋʋ, koo a laa ʋ tɩtɩa sʋʋŋ bʋa lɛ?

⁴⁹ La Tɩɩna, nɩɩ nɛ ŋ faafaa kala chono-la sɩ bɩ dɛrɛ hɛ, kʋ-la ŋ sɩ kɛŋ wʋtɩtɩɩ a ŋmɩɛsa pɩ Devit?

⁵⁰ Liise yi ŋɩɩ ba sɩ sieri ŋ tɩntɩnna lɛ, ŋɩɩ tinteye-la kala nɩaa sɩ tʋʋsɛmɛ.

⁵¹ La Tɩɩna, mɩ nɛ nɩɩ-la ŋ sɩ lɩɩsa, ama ŋ dʋndɔŋŋɔɔ kire to mɩ harɩŋ nɛ a mʋmɔmmɛ lee-kala mɩ sɩ yie mʋ.

⁵² Má dɛnnɛ La Tɩɩna a kaa mʋ wuu. Amɩɩ, Amɩɩ.