WƖA YƖƖLAA 88 - WƖA TENIŊ

Yɩɩl-la Kora biiriŋ sɩ yɩa.

¹ La TƖƖNA Wɩa mɩ Laataara, tɩtaŋɩŋ arɩ wɩɩhɛyɛ kala nɛ mɩɩ ŋmoo niiŋ ŋ sɩpaaŋ dɩ ŋ pɛ mɩ lɛ.

² Mɩɩ sʋlʋŋ, jegile nɩɩ mɩ sʋla, a nɩɩ mɩ nii-ŋmobo a pɛ mɩ lɛ.

³ Wɩaa jʋʋmɛ nɛ kɩŋkɛŋ, mɩ dɩ sʋʋŋ kpagɛ dɔŋɔ nɛ.

⁴ Mɩ nagɛ nʋʋ ba sɩ dɩɩsa pɛ sʋʋnʋŋ tʋɔŋ nɛ. Mɩ nagɛ nʋʋ sɩ bɩ dol kala kɛnɛ nɛ.

⁵ Mɩ nagɛ nʋʋ ba sɩ vɩa ta sʋʋnʋŋ tʋɔŋ nɛ. Mɩ nagɛ nʋʋ ba sɩ hugo nɛ, nɩɩ-la ŋ sɩ bɩ ʋ wɩaa ka liisi, nɩɩ-la ŋ sɩ kere ta a bɩra bɩ ʋ lɛ ka pɛ.

⁶ Ŋ jommi hɛ buotuo luŋuŋ lɛ nɛ, mɩ hɛ lee-la sɩ chaasa luŋ a kɛŋ birimiŋ.

⁷ Ŋ baanɩŋ sii mɩ nyuŋ a yʋgɛ nɛ, a nagɛ lɩɩ-pel-duoŋ sɩ jommi.

⁸ Ŋ leŋe mɩ nandɔŋ fɩɛmaa vɩamɛ ta nɛ, mɩ ŋaa nɩtɔɔ ba teeŋ. Mɩ gʋrɛ dɩa lɛ nɛ, mɩ bɩ wuo lɩɩ.

⁹ La TƖƖNA, tʋɔ-cheeŋ leŋe mɩ sɩaa bɩra bɩ na woruŋ. Mɩ je mɩ nɩsaa nɛ tapʋlɩɩ kala a sʋsʋlʋŋ.

¹⁰ Ŋ ŋaa wʋkpuŋkperisiŋ a pɩpɩ sʋʋnʋŋ nɛɛ? Sʋʋnʋŋ yie sii dɛnnɩŋ nɛɛ?

¹¹ Ba bɩ ŋ chono-la sɩ bɩ dɛrɛ wɩaa ka bʋl bʋa tʋɔŋ. Ba bɩ ŋ wʋtɩtɩɩ ma wɩaa ka bʋl lee-la nɩaa sɩɩ pʋa.

¹² Birimiŋ tʋɔŋ nʋʋkala bɩ wʋkpuŋkperisi-la ŋ sɩɩ ŋaa ka na. Tintee-la ma nɩaa wɩaa ba sɩ yʋa, bɩ tʋɔpʋl wɩalɩŋ ŋ sɩ ŋaa ka na.

¹³ Ama La TƖƖNA, mɩ-na ŋmoo niiŋ a pɩpɩŋ nɛ dɩ ŋ pɛ mɩ lɛ. Chʋchʋɔŋ mɩ yie sʋlʋŋ nɛ.

¹⁴ La TƖƖNA, bɛɛ nɛ tɩɩ ŋ vɩamɛ ta, a joŋ harɩŋ yɩamɛ?

¹⁵ Mɩ hambiriŋ kala lɛ, mɩ na hɛɛŋ nɛ, a ka mʋa dɩ mɩ sʋba. Ŋ leŋe fawʋllʋŋ kɛmmɛ nɛ, mɩ na hɛɛŋ a bɩra bɩ wɩɩkala wuo ŋaa.

¹⁶ Ŋ baanɩŋ nagɛ lɩɩ-pel-duoŋ nɛ a tɔmɛ, fawʋlɩbɩ wɩalɩŋ ŋ sɩ ŋaa mɩ lɛ cheimi nɛ.

¹⁷ Ba tɔmɛ tapʋlɩɩ kala a nagɛ lɩɩ-pel-duoŋ nɛ, a tɔ mɩ sɛmɛ kala, mɩ tagɩlɛ ba tʋɔŋ.

¹⁸ Ŋ leŋe mɩ nandɔnsʋŋ arɩ mɩ toori dɔsʋŋ vɩamɛ nɛ, ka birimiŋ lɛɛlɛ ŋaa mɩ nandɔŋ-fɩɛmɩŋ.