WƖA YƖƖLAA 86 - WƖA TENIŊ

Devit sʋl Wɩa dɩ ʋ pɛ ʋ lɛ.

¹ Mɩɩ sʋlʋŋ La Tɩɩna, jegile nɩɩ mɩ teeŋ, mɩ ŋaa summu arɩ nʋʋ sɩ bɩ mɩ tɩtɩa lɛ wuo pɛ nɛ.

² Pɔ mɩ mɩɩsɩŋ, a laamɛ ta dɩ mɩ sɩ́ sʋʋ, bɛɛ wɩaa mɩɩ toŋ nɛ. Ŋ nɛ mɩ Wɩa, laa ŋ tɩntɩnna ta. Mɩ laaŋ dii nɛ.

³ La Tɩɩna, fá mɩ nenige, mɩ ŋmoo niiŋ pɩpɩŋ tapʋlɩɩ kala nɛ.

⁴ La Tɩɩna leŋ dɩ mɩ-na ŋ tɩntɩnna tʋɔŋ tɔrɛ, bɛɛ wɩaa mɩ joŋ mɩ tɩtɩa kala hɛ ŋ nɩsɩŋ lɛ nɛ.

⁵ Ŋ wɩaa zɔmɔ, ŋ joŋ wɩaa ma a chɩchɛ nɩaa. La Tɩɩna, ŋ chonuŋ bɩ magɩa kɛnɛ, nɩalɩŋ kala sɩɩ chʋɔlʋŋ teeŋ.

⁶ La Tɩɩna, mɩɩ sʋlʋŋ, jegile nɩɩ mɩ sʋla, jegile nɩɩ mɩ sɩɩ ŋmoo niiŋ dɩ ŋ fá mɩ nenige.

⁷ Dɩ wɩaa nɛ jʋʋmɛ, mɩ yie yɩrɩŋ nɛ, bɛɛ wɩaa ŋ jegilee nɩɩ mɩ sʋla nɛ.

⁸ Vene kala tuo a nagɛ ŋ-na La Tɩɩna. Kʋŋkala tuo a ŋɩŋaa wɩalɩŋ ŋ sɩɩ ŋaa.

⁹ Ŋ nɛ ta tinteyee nɩaa kala, La Tɩɩna, ba jaŋ kʋ kpirimi ŋ sɩpaaŋ a dɛnnɩŋ, ba jaŋ yɩrɛ ŋ yɩrɩ-balɩŋ.

¹⁰ Ŋ dʋndʋŋa nɛ Wɩa a kɛŋ doluŋ, a ŋɩŋaa wʋkpuŋkperisiŋ.

¹¹ La Tɩɩna, dagɛmɛ ŋ wombiiŋ, dɩ mɩ toŋ arɩ wʋtɩtɩɩ. Leŋ dɩ mɩ kɛŋ tʋɔ-bala a fɩfá ŋ-na Wɩa.

¹² Mɩ Tɩɩna Wɩa, mɩ jaŋ dɛnnɩŋ arɩ mɩ tʋɔŋ kala. Mɩ jaŋ yɩrɛ ŋ yɩrɩ-balɩŋ a kaa mʋ wuu.

¹³ Ŋ chomi nɛ kɩŋkɛŋ a chu tɔ mɩ lɛ, a laamɛ ta mɩ bɩ sʋba.

¹⁴ Wɩa, sɩɩ-duo tɩŋŋaa ka yuomi nɛ. Nɩalɩŋ sɩ bɔmɔ kɩŋkɛŋ hɛ dɔŋɔ nɛ aa chɛ dɩ ba lɩɩsɛ mɩ mɩɩsɩŋ, ba bɩŋ kaa tɩtɩŋ.

¹⁵ Ama ŋ-na La Tɩɩna, ŋ nɛ Wɩa sɩ kɛŋ zile a fɩfá nɩaa nenige. Ŋ baanɩŋ bɩ lɩma lɩma ka sii, ŋ kɛŋ chonuŋ arɩ wʋtɩtɩɩ.

¹⁶ La Tɩɩna, daasɛ mɩ teeŋ a fá mɩ nenige, joŋ ŋ doluŋ pɩ mɩ-na ŋ tɩntɩnna. Laa mɩ-na ŋ tɩntɩnna nanʋala ta.

¹⁷ La Tɩɩna, dagɛmɛ ŋ wʋzɔŋŋɔɔ magɩlɩŋ, dɩ mɩ dʋndɔŋŋɔɔ na, dɩ hɩɩsɩŋ kɛmba. Ŋ-na La Tɩɩna nɛ pɛ mɩ lɛ a leŋ mɩ tʋɔŋ pɩŋ dɩ-bala.