WƖA YƖƖLAA 85 - WƖA TENIŊ

Yɩɩl-la Kora biiriŋ sɩ yɩɩ sʋl Wɩa pɩ Iziral tɩŋŋaa.

¹ La Tɩɩna, ŋ pɛ ŋ tinteeŋ nɩaa lɛ nɛ woruŋ, a leŋ wɩaa vɛŋ woruŋ a pɩ Jekɔb doho nɩaa.

² Ŋ joŋ ŋ nɩaa wʋbɔŋŋɔɔ chɛba nɛ a gbaa tɔ ba wʋbɔŋŋɔɔ kala.

³ Ŋ fa sɩ faasa na baaŋ-la ba nyuŋ, ŋ joŋo ta nɛ.

⁴ Wɩa, la Laataara, kɛnla mɩɩra kɔ dɩa. Mɩɩ sʋlʋŋ, sɩ́ leŋe dɩ ŋ tʋɔŋ chei la nyuŋ.

⁵ Ŋ jaŋ na baanɩŋ la nyuŋ deeŋ deeŋ? Ŋ jaŋ leŋ dɩ ŋ baanɩŋ daagɛ nɩalɩŋ ma ba ha sɩ jaŋ lʋl?

⁶ Ŋ bɩ jaŋ pɩla mɩɩ-falɩŋ a leŋ dɩ ŋ nɩaa tʋɔŋ tɔrɛ ŋ nyuŋ?

⁷ La Tɩɩna, dagɛla ŋ chono-la sɩ bɩ dɛrɛ, aŋ laala ta.

⁸ Mɩ jaŋ jegile nɩɩ wɩalɩŋ La Tɩɩna Wɩa sɩ jaŋ bʋl. Ʋ sɩ ʋ jaŋ leŋ dɩ nɩalɩŋ sɩ laaʋ dii hɔŋ arɩ fɩɛlɩŋ, dɩ la nɛ bɩra bɩ nɩyaarɩ wɩaa ka ŋaa.

⁹ Ʋ ŋaa siri nɛ dɩ ʋ laa nɩalɩŋ sɩɩ fáʋ a ta, dɩ ŋɩɩ leŋ dɩ ʋ tʋla wuo hɛ la tinteeŋ lɛ.

¹⁰ Chonuŋ arɩ wʋtɩtɩɩ jaŋ cheŋ dɔŋɔ, dɩ tʋɔpʋla arɩ yarɩ-fɩɛlɩŋ ma guori dɔŋɔ.

¹¹ Wʋtɩtɩɩ jaŋ yʋgɛ tinteeŋ lɛ, ka dɩ tʋɔpʋla hɛ wɩa-jaŋ a chugili.

¹² La Tɩɩna jaŋ ŋaa wʋzɔŋŋɔɔ pɩla dɩ la tinteeŋ kʋpɛrɛɛ wasɛ woruŋ.

¹³ Tʋɔpʋl wʋŋaalaa nɛ jaŋ laa La Tɩɩna sɩpaaŋ, a wasɛ wombiiŋ pʋ.