WƖA YƖƖLAA 83 - WƖA TENIŊ

Yɩɩl-la Asaf sɩ yɩa.

¹ Wɩa, sɩ́ ŋ niiŋ tɔrʋ, Wɩa, sɩ́ chɩm hɔŋ a bɩ wɩɩ ka ŋaa.

² Ŋ dʋndɔŋŋɔɔ hoso nɛ. Nɩalɩŋ sɩ bɛrɩŋ kɛŋ sɩɩ-duoŋ a lɩɩ ŋ harɩŋ.

³ Ba lʋara vʋʋra sii chɩŋ ŋ nɩaa lɛ nɛ, ba vʋʋrɛ nɩalɩŋ ŋ sɩ cho wɩaa nɛ, a sii chɩŋ ba lɛ.

⁴ Ba sɩ, “Má kɔ, má leŋ dɩ la chei ba tintee-la, dɩ Iziral tɩŋŋaa yɩrɩŋ bɩra sɩ́ yɩrʋ.”

⁵ Ba niiŋ ŋaa kʋbala nɛ ba vʋʋrɛ. Ba pɛ dɔŋɔ lɛ nɛ dɩ ba ŋaa wɩɩ-la ba sɩ vʋʋra a tɩgɛ ŋ lɛ.

⁶ Ba nɩalɩŋ nɛ ŋ-la: Ɛdɔm tɩŋŋaa, Ɩsɩmɛl tɩŋŋaa, Mʋab tɩŋŋaa arɩ Hagi tɩŋŋaa,

⁷ Gɛbal tɩŋŋaa, Amɔŋ tɩŋŋaa, Amalɛk tɩŋŋaa Fɩlɩsɩtɩa tɩŋŋaa arɩ Taaya tɩŋŋaa.

⁸ Asiiria tɩŋŋaa ma pɛ ba lɛ nɛ. Ba nɛ Lɔt doho nɩaa nɩduoruŋ.

⁹ Joŋ wɩɩ-la ŋ sɩ ŋaa Midiaŋ tɩŋŋaa lɛ, a ŋaa ba lɛ, wɩɩ-la ŋ fa sɩ joŋo ŋaa Sɩsɛra arɩ Jabɩŋ sɩ ŋaa laalɩyuori-hɩasɩŋ lɛ, Kɩsɔŋ fuo-la lɛ.

¹⁰ Ŋ fa kpʋba Ɛndɔ lɛ nɛ, ba pɩŋ nɩmɛ pʋa.

¹¹ Joŋ wɩɩ-la ŋ sɩ ŋaa Ɔrɛb arɩ Zɛɛb lɛ a ŋaa ba nɩbalaa lɛ. Leŋ dɩ ba sɩpaalaaraa kala wɩɩŋ nagɛ Zɛba arɩ Zalɩmʋna.

¹² Ba kala sɩ, “Má leŋ la yuo laa Wɩa tintee-la, dɩ ʋ ŋaa la kʋŋ.”

¹³ Wɩa, ŋmooba pɩsɛ dɩ ba nagɛ kʋŋkɔlʋŋ, a nagɛ mɩɩ-jɔrʋŋ peliŋ sɩ paa viiri.

¹⁴ Ŋ jɩŋ nyiniŋ sɩ yie joŋ duuŋ koo peeliŋ nyuŋ a kɔlɩmɛ ŋɩɩ,

¹⁵ ŋɩɩ wɩaa kiriba arɩ ŋ pel-lɩmɩŋ ŋɩɩ dɩ ba fá, leŋ dɩ ŋ duoŋ-peliŋ fawʋllʋŋ kɛmba.

¹⁶ La Tɩɩna, leŋ dɩ hɩɩsɩŋ diiba, dɩ ba mɩɩra kɔ ŋ teeŋ a dɛnnɩŋ.

¹⁷ Leŋ dɩ hɩɩsɩŋ diiba deeŋ deeŋ dɩ ba wɩaa kala vʋgʋmɛ. Leŋ dɩ ba sʋʋ arɩ hɩɩsɩŋ.

¹⁸ Leŋ dɩ ba jɩŋ arɩ ŋ dʋndʋŋa nɛ La Tɩɩna Wɩa sɩ kɩɩ kʋŋkala a hɛ nɩmɛ a bibeŋ dʋnɩa kala.