WƖA YƖƖLAA 81 - WƖA TENIŊ

Yɩɩl-la Asaf sɩ yɩɩ pɩ gɔgʋ-hɩaŋ.

¹ Má yɩɩ yɩɩlaa arɩ tʋɔtɔrʋŋ a pɩ Wɩa sɩ leŋe la kɛŋ doluŋ. Má ŋaa goŋ a dɛnnɛ Jekɔb Wɩa.

² Má yɩɩ yɩɩla-la a chɩgɩsɛ chɩnchɩgɩsɩŋ, a du chenni-la sɩ sɩma arɩ kɔnɛba a hɛ.

³ Má ŋmʋʋ nyile a suomi chɛŋ-falɩŋ arɩ bʋa-la lɛ chɛnɛ sɩ gullo dɛrɛ la gbiele tapʋlʋŋ.

⁴ Wɩɩŋ deeŋ ŋaa wombii nɛ ba bil Iziral lɛ dɩ baa to a ŋaa wɩɩ Jekɔb Wɩa sɩ sɩ dɩ ba tuto,

⁵ bʋa-la lɛ Wɩa sɩ mʋ yuo laaba, a kɛmba lɩɩ Ijipiti tinteeŋ lɛ. Ʋ bil nii-la a pɩ Josɛf doho nɩaa nɛ dɩ ba tuto. Nɩmɛ nɛ la nɩɩ yikoro-la la sɩ bɩ jɩŋ.

⁶ Yikoro-la bʋla, “Mɩ dʋɔrɛ chʋgʋ-yuŋii-la sɩ daŋ ma vaasɩŋ lɛ nɛ. Ma nɩsɩŋ bɩra tuo sime-la lɛ.

⁷ Hɛɛŋ sɩ jʋʋma, ma yɩrɛmɛ, mɩ hɛ duoŋ-bɩlɩmbaanaa tʋɔŋ nɛ, aŋ nɩɩ a laama ta. Mɛrɩba lɩɩrɩ-la leriŋ, mɩ magɩsɛma.

⁸ Mɩ nɩaa Iziral tɩmma, má nɩɩ, mɩɩ chɛ dɩ mɩ chagɩlɛma nɛ, mɩ cho dɩ ma jegile nɩɩ mɩ teeŋ nɛ.

⁹ Ʋ bɩ maga dɩ ma kpaarɛ vene kala. Ʋ bɩ maga dɩ ma kpirimi vene sɩpaaŋ.

¹⁰ Mɩ nɛ ma TƖƖNA Wɩa, mɩ nɛ kɛmma kaa lɩɩ Ijipiti tinteeŋ lɛ. Má faasa suri niiŋ dɩ mɩ pɩma kʋdiilee.

¹¹ Ama mɩ nɩaa Iziral tɩŋŋaa bɩ chɛ dɩ ba jegile nɩɩ mɩ teeŋ, ba bɩ chɛ dɩ ba joŋ ba tɩtɩa pɩmɛ.

¹² Ŋɩɩ nɛ tɩɩ mɩ lemba ta ba ŋɩŋaa ba nyu-duo wɩaa, a tuto ba tʋɔbɩɩnaa harɩŋ.

¹³ Dɩ mɩ nɩaa nɛ jaŋ jegile nɩɩ mɩ teeŋ, dɩ ma Iziral tɩŋŋaa nɛ ŋaa wɩɩ-la mɩ sɩ bʋla,

¹⁴ mɩ-na ma Tɩɩna jaŋ guu yuo dii ma dʋndɔŋŋɔɔ, mɩ jaŋ chei ma dʋndɔmɔ-la arɩ mɩ doluŋ.

¹⁵ Nɩalɩŋ kala sɩ bɛrɛ mɩ-na ma Tɩɩna jaŋ kʋ gbieni mɩ sɩpaaŋ, ba hɛɛŋ bɩ jaŋ dɛrɛ.

¹⁶ Ama ma-na Iziral tɩŋŋaa, mɩ jaŋ dɩɛsɛma arɩ kʋdii-zɔŋŋɔɔ, a leŋ dɩ ma dii bʋ-bʋa tʋʋŋ a vɔgɛ.”