WƖA YƖƖLAA 80 - WƖA TENIŊ

Yɩɩl-la Asaf sɩ yɩɩ pɩ gɔgʋ-hɩaŋ.

¹ Nɩɩ-la sɩɩ beŋ Iziral tɩŋŋaa a nagɛ pie-daara sɩɩ beŋ ʋ piesee, jegile nɩɩ la teeŋ. Ŋ nɛ laa Josɛf doho nɩaa sɩpaaŋ a bibemba. Ŋ hɔŋ kɩalɩŋ balɩa sɩ nagɛ Wɩa tɩndaaraa a kɛŋ kɩŋkɛnsɩŋ pɛgɛ nɛ, leŋ dɩ ŋ tʋla chaanɛ Efirem, Bɛnjamɩŋ

² arɩ Manasɛ doho doho nɩaa sɩpaaŋ. Sii arɩ ŋ doluŋ a kʋ laala ta.

³ Wɩa, kɛnla mɩɩra kɔ, a suri ŋ sɩaa pɩla dɩ la na wiese.

⁴ La Tɩɩna Wɩa doluŋ kala Tɩɩna, ɛɛ nɛ ŋ nɩaa Wɩɩ-chʋɔlʋŋ jaŋ leŋ dɩ ŋ baanɩŋ sii ba nyuŋ a diene magɛ?

⁵ Ŋ leŋe tʋɔ-cheeŋ nɛ ŋaa ba kʋdiilee, sɩlɩɩrɩŋ ma ŋaa ba lɩɩ-nyʋalʋŋ.

⁶ Ŋ leŋe la ŋaa mɔmɩa nɛ tinteye-la nɩaa sɩ gollila teeŋ, la dʋndɔŋŋɔɔ sisieri la lɛ.

⁷ Wɩa doluŋ kala Tɩɩna, kɛnla mɩɩra kɔ, a suri ŋ sɩaa pɩla dɩ la na wiese.

⁸ La nagɛ girep tɩa nɛ, ŋ kɛnla kaa lɩɩ Ijipiti tinteeŋ lɛ. Ŋ kiri tinteyee dɔnsʋŋ nɩaa nɛ aŋ jonla chɔnsɛ.

⁹ Ŋ wasɛ leriŋ gollu nɛ, ʋ naapoloo tuu tinteeŋ woruŋ, ʋ jɛrɛ laa tintee-la kala.

¹⁰ Ʋ fɩɛlɩŋ tɔ peelee, ʋ naakelee ma jɩla kieli kuoli-duduosuŋ.

¹¹ Ʋ naakelee jɛrɛ mʋ yi mʋgʋ-bal-la ba sɩɩ yɩrɛ Mediterenia, a kɛŋ ŋɩɩ mʋ yi Yufireti fuoŋ.

¹² La Tɩɩna, bɛɛ nɛ tɩɩ ŋ ŋmoo jebii-la ba sɩ saa gollu a lo? Lɛɛlɛ, dɩ nʋʋkala nɛ kʋ to lee-la aa bal, ʋ jaŋ wuo tɔrɛ ʋ nɛnɛɛ.

¹³ Baga toonuŋ lɩɩ duuŋ tʋɔŋ a yigi tɩa-la lo nɛ, baga kɩaa didii.

¹⁴ Wɩa, doluŋ kala Tɩɩna, mɩɩra kɔ la teeŋ. Ŋ hɛ ŋ jaŋ lɛ nɛ, gʋra bee na wɩɩ-la sɩ ŋaa tɩa-la lɛ.

¹⁵ Ŋ tɩtɩa nɛ chɔnsʋ a leŋ ʋ naapoloo tuu tinteeŋ. Ŋ leŋ ʋ waa a ŋaa ŋ kʋŋ.

¹⁶ La dʋndɔŋŋɔɔ keri tɩa-la lo nɛ a joŋ nyiniŋ hɛ. Na baanɩŋ ba nyuŋ a cheiba.

¹⁷ Ama chu tɔ nɩɩ-la ŋ sɩ dɩɛsa lɛ, ʋ ŋaa ŋ tɩtɩa nʋʋ, a hɔŋ ŋ nadiiŋ.

¹⁸ Kɛnla bɩrɩmɛ a pɩla mɩɩ-falɩŋ, dɩ la bɩra sɩ́ ŋ harɩŋ mɩɩrʋ aŋ dɩdɛnnɩŋ.

¹⁹ La Tɩɩna Wɩa doluŋ kala Tɩɩna, kɛnla mɩɩra kɔ, a suri ŋ sɩaa pɩla dɩ la wuo na wiese.