WƖA YƖƖLAA 8 - WƖA TENIŊYɩɩl-la Devit sɩ yɩɩ pɩ gɔgʋ-hɩaŋ. 1 La Tɩɩna, ŋ nɛ Nɩɩ-la sɩɩ benla, ŋ yɩrɩŋ yʋga nɛ woruŋ dʋnɩa lee-kala. Ŋ leŋe ŋ tʋla kieli wɩa-nyuŋ nɛ. 2 Ŋ leŋe hambiisiŋ arɩ bii-mulluŋ dɩdɛnnɩŋ a tɩŋ ŋ dʋndɔŋŋɔɔ wɩaa nɛ, dɩ ŋ dʋndɔŋŋɔɔ arɩ nɩalɩŋ sɩ lɩɩ ŋ harɩŋ bɩra sɩ́ wɩɩ wuo bʋl. 3 Dɩ mɩ nɛ beŋ wɩa-nyuŋ-la ŋ sɩ ŋaa arɩ ŋ nɩsɩŋ, a beŋ chɛnɛ arɩ chɛnwʋlaa ŋ sɩ leŋe ba chɩŋ ba dɩchɩnaa, 4 mɩ yie bʋl, “Nuhuobiine tuo kʋŋkala, ka ŋ bɩbɩɩnɛ ʋ wɩaa. Nuhuobiine bie tuo kʋŋkala, ka ŋ chɩl ʋ wɩaa.” 5 Ŋ ŋaa nuhuobiine a leŋ ŋ tɩndaaraa sɩ hɛ Wɩa-jaŋ nɛ kɩɩʋ mʋa, ka ŋ zilu a leŋ ʋ kɛŋ doluŋ arɩ yɩrɩŋ. 6 Ŋ joŋ kɩalɩŋ kala ŋ sɩ ŋaa a hɛ ʋ nɩsɩŋ lɛ nɛ ʋ bibeŋ, a leŋ ʋ kɛŋ doluŋ ba lɛ: 7 Pʋsʋŋ arɩ bagɩlaa kala, 8 diibiisiŋ arɩ chenfilee arɩ kʋŋ na-kala sɩɩ jʋʋ lɩɩŋ. 9 La Tɩɩna Wɩa, ŋ yɩrɩŋ yʋga nɛ woruŋ dʋnɩa lee-kala. |
©Ghana Institute of Linguistics Literacy and Bible Translation 1984, 2014
Wycliffe Bible Translators, Inc.