WƖA YƖƖLAA 78 - WƖA TENIŊ

Yɩɩl-la Asaf sɩ yɩa.

¹ Mɩ nɩaa, mɩɩ sʋlma, má jegile nɩɩ wɩalɩŋ mɩ sɩɩ dagʋ. Má leŋ dɩ mɩ niiŋ wɩaa jʋʋ ma dɩgɩlaa woruŋ.

² Mɩ jaŋ magɛ namagaba a dagɛ wɩalɩŋ fa sɩ faa, a chɩŋ dʋnɩa dɩ-suomuŋ.

³ Wɩalɩŋ la sɩ nɩa aŋ jɩŋ ma, wɩalɩŋ la naabalɩmaba sɩ bʋla pɩla.

⁴ La bɩ jaŋ joŋo faa la biiriŋ, la jaŋ bʋl wɩalɩŋ pɩ nɩalɩŋ ba ha sɩ jaŋ lʋl, wɩalɩŋ La Tɩɩna sɩ ŋaa a magɛ dɩ la dɛnnʋ, ʋ doluŋ arɩ wʋkpuŋkperisi-la ʋ sɩ ŋaa.

⁵ Ʋ joŋ ʋ niiŋ wɩaa dagɛ Jekɔb nɛ, a leŋ ʋ wombii-la ʋ sɩ bile dɩ ba tuto chɩŋ kpaŋkpaŋ Iziral lɛ. Wɩalɩŋ ʋ sɩ bʋla pɩ la naabalɩmaba, ʋ bʋl ŋɩɩ dɩ ba joŋo dagɛ ba biiriŋ,

⁶ dɩ ba biiri-la ma ba sɩ jaŋ lʋl jɩmba a bɩra joŋo dagɛ ba biiriŋ dɩ ba ma jɩmba, dɩ ba ma joŋo dagɛ ba biiri-la ba sɩ jaŋ lʋl,

⁷ dɩ ŋɩɩ leŋ dɩ ba joŋ ba yɩɛlaa hɛ Wɩa lɛ, a sɩ́ ʋ wʋŋaalaa yʋ, aŋ tuto wɩalɩŋ ʋ sɩ daga.

⁸ Dɩ ba sɩ́ ba naabalɩmaba-la sɩ kɛŋ nyuduoŋ a vɩa Wɩa niiŋ ŋɩɩ nagʋ. Ba ŋaa nɩa fa sɩ bɩ ba tʋɔŋ pʋlla pɩ Wɩa nɛ, a bɩ ʋ laa dii.

⁹ Laalɩyuori-babiibalaa fa lɩɩ Efirem a vɔɔ tʋɔnʋŋ a kori tosuŋ arɩ hɛŋŋɛɛ nɛ, ama tapʋlɩɩ-la laalɩŋ sɩ sie, ba mɩɩra fá nɛ.

¹⁰ Ba fa bɩ nii-la Wɩa sɩ bile ʋ dɩ ba pɛgɛ ka to a vɩa dɩ ba to wombii-la ʋ sɩ bile dɩ ba tuto.

¹¹ Ba fa yʋ wɩalɩŋ ʋ sɩ ŋaa nɛ, wʋkpuŋkperisi-la ʋ sɩ ŋaa dagɛba.

¹² Wɩa fa ŋaa wʋmagɩlaa ba naabalɩmaba sɩɩŋ lɛ nɛ, Ijipiti tinteeŋ lee-la ba sɩɩ yɩrɛ Zʋaŋ.

¹³ Ʋ fa kɛŋ mʋgʋ-balɩŋ a kpaa balɩa nɛ, lɩɩ-la sii chɩŋ a nagɛ jebiiŋ, ka ba to ʋ tʋɔŋ lɩɩ.

¹⁴ Wɩɩhɛyɛ ʋ laa ba sɩpaaŋ a nagɛ duoŋ-bɩlɩmbaanɩŋ, tɩtaŋɩŋ ma ʋ nagɛ jebiiŋ sɩ ŋaa nyiniŋ a kɛŋ pʋlʋmʋŋ laa ba sɩpaaŋ.

¹⁵ Wɩa fa leŋe bʋŋ yɛrɛ nɛ tintee-hɩlɩŋ lɛ, lɩɩŋ pɛllɛ lɩɩ a nagɛ fuoŋ ʋ nɩaa nyʋa.

¹⁶ Ʋ fa leŋe lɩɩ-la bulo lɩɩ pɛllɛ bʋŋ-la lɛ a nagɛ fuoŋ nɛ. Lɩɩ-la fa pɛllɛ tuu a nagɛ fuoŋ nɛ.

¹⁷ Ka ba ha vɩa Wɩa sɩ kɩɩ kʋŋkala niiŋ, aŋ ŋɩŋaa wʋbɔŋŋɔɔ tintee-hɩlɩɩ-la lɛ.

¹⁸ Nɩalɩŋ fa sɛnɛ nɛ aŋ magɩsɛ Wɩa, a chɩchɛ dɩ ʋ pɩba kʋdiile-la ba sɩɩ hɩɛnʋ.

¹⁹ Ba fa lɩɩ Wɩa harɩŋ nɛ a pɩɛsɛ, “Wɩa jaŋ wuo pɩla kʋdiilee tintee-hɩlɩŋ deeŋ lɛ?

²⁰ Wʋtɩtɩɩ, ʋ sɩ ŋmoo bʋŋ, lɩɩŋ gbu lɩɩ nɛ, a pɛllɛ nagɛ fuoŋ. Ama ʋ jaŋ wuo pɩla kʋdiilee maa? Ʋ jaŋ wuo pɩ ʋ nɩaa nammɩaa?”

²¹ La Tɩɩna sɩ nɩa dɩ ba bʋl ŋɩɩ, ʋ chaasa na baanɩŋ, a joŋ nyiniŋ wurisi Jekɔb doho nɩaa, Iziral tɩŋŋaa, ka ʋ baanɩŋ ha sisii ba nyuŋ,

²² bɛɛ wɩaa ba bɩ Wɩa laa dii, koo a laa dii dɩ ʋ jaŋ wuo laaba ta.

²³ Ka Wɩa ha bʋl wɩaa wɩa-nyuŋ a leŋ Wɩa-jaŋ borusuŋ suri.

²⁴ Ʋ leŋe kʋdiilee ba sɩɩ yɩrɛ mana kʋʋ tuu nɛ wuru wuru ʋ nɩaa dii, Wɩa-jaŋ kʋdiilee nɛ ʋ pɩba.

²⁵ Wɩa tɩndaaraa kʋdiilee nɛ nuhuobiinee dii, ʋ fa pɩba kʋdiilee magɛ ŋɩɩ kala ba sɩɩ chɛ nɛ.

²⁶ Ʋ doluŋ lɛ nɛ ʋ leŋ peliŋ lu wɩa-nyuŋ a lɩɩ wɩɩpɔsʋŋ dɩɩrɩŋ, a leŋ ʋ lu lɩɩ wɩɩpɔsʋŋ nadiiŋ dɩɩrɩŋ.

²⁷ Ʋ leŋ diibiisiŋ kʋ su leriŋ a nagɛ hagɩla sɩ pɩŋ mʋga niiŋ, nammɩa pʋrɩgɛ a nagɛ hagɩlɩ-biee.

²⁸ Wɩa leŋe ba kʋ tuu su ba buguŋ nɛ, a golli ba lɛŋŋɛɛ kala.

²⁹ Ba fa chaŋ nammɩa a magɛ ŋɩɩ kala ba sɩɩ chɛ nɛ, bɛɛ wɩaa Wɩa fa pɩba magɛ ŋɩɩ ba sɩɩ hɩɛnʋ nɛ.

³⁰ Ba chaŋ aŋ ha bɩ ba naŋ-hɩɛnɩŋ kpʋa, aŋ chɩchaŋ wuu.

³¹ Ŋɩɩ nɛ Wɩa na baanɩŋ Iziral tɩmma-la nyuŋ, a kpʋ ba nɩduoruŋ arɩ ba bapʋɔsɛ-zɔŋŋɔɔ.

³² Wɩa fa ŋaa wʋkpuŋkperisiŋ deemba kala nɛ, ka nɩalɩŋ sɩ ka ha vɩa aŋ ŋɩŋaa wʋbɔŋŋɔɔ. Ba fa bɩ ʋ laa dii.

³³ Ŋɩɩ nɛ Wɩa keri ba mɩɩsɩŋ tapʋlaa ta, ba jɩsɩŋ kala lɛ fawʋllʋŋ kɛmba.

³⁴ Dɩ Wɩa nɛ kpʋ ba dɔnsʋŋ bʋa na-kala, nɩkaana-la yie mɩɩra chɛ ʋ leriŋ nɛ, a bɩrɩma lɩɩ ba wʋbɔŋŋɔɔ lɛ.

³⁵ Ba yie liise yi arɩ Wɩa sɩ kɩɩ kʋŋkala nɛ ŋaa ba dɩ-duoŋ arɩ ba Laataara.

³⁶ Ama niiŋ nɛ ba kala fa kaa nyɩsɛ Wɩa, wʋtɩtɩɩ kala tuo ba lɛ.

³⁷ Ba fa bɩ ba tʋɔŋ pʋla pɩ Wɩa, a bɩ nii-la ma sɩ hɛ ʋ dɩ ba pɛgɛ ka to.

³⁸ Ama Wɩa fa ha fá ʋ nɩaa nenige nɛ, a joŋ ba wʋbɔŋŋɔɔ chɛba, a bɩ ba cheye. Naansɩɩŋ yʋga nɛ ʋ sɩ nyalɩma a bɩ baanɩŋ ka na ba nyuŋ.

³⁹ Ʋ liise arɩ ba ŋaa kɩa sɩɩ sʋʋ nɛ, ba bɩ dieni, a nagɛ peliŋ sɩ yie lu bal ŋɩɩ.

⁴⁰ Bʋa-la lɛ ba sɩ hɛ tintee-hɩlɩŋ lɛ, ba yie lɩɩ Wɩa harɩŋ nɛ a ŋaa ʋ tʋɔŋ chei.

⁴¹ Ba fa magɩsɛ Iziral Wɩa sɩ bɩ disiniŋ kɛnɛ ŋɩɩ nɛ halɩɩ, ʋ baanɩŋ sii. Ʋ tʋɔŋ chei.

⁴² Ba fa bɩ liise yi ʋ sɩ kɛŋ doluŋ lɛ, arɩ tapʋlɩɩ-la ʋ sɩ laaba ta ba dʋndɔŋŋɔɔ nɩsɩŋ lɛ,

⁴³ tapʋlɩɩ-la ʋ sɩ ŋaa wʋkpuŋkperisiŋ arɩ wʋmagɩlaa Ijipiti tinteeŋ, lee-la ba sɩɩ yɩrɛ Zʋaŋ lɛ.

⁴⁴ Ʋ fa leŋe ba fuonuŋ arɩ fuonaasɩŋ lɩɩŋ kala bɩrɩmɛ chalɩŋ nɛ, ba bɩ wuo nyʋa.

⁴⁵ Ʋ leŋ nanchʋɔsʋŋ kʋ su ba leriŋ, a bɩra leŋ sɔrɔɔ ma kʋ su lee-la kala a chichei ba tinteeŋ.

⁴⁶ Ʋ fa leŋe hɔbɔ arɩ nyaŋgɩrɩgɛba kʋ tɔ Ijipiti tinteeŋ kala, a dii ba bagɩsɩŋ kɩaa kala.

⁴⁷ Ʋ fa bɩra leŋe duoŋ-tabɩaa kʋ tuu tel nɛ, a chei ba girep tɩɩsɩŋ arɩ ba tutogusuŋ

⁴⁸ aŋ kpʋ ba nɛsɩŋ kala. Ka duonuŋ ma kpɩa a kpʋ ba pʋŋ-kaanaa kala.

⁴⁹ Wɩa fa chaasa na baanɩŋ nɛ Ijipiti tɩŋŋaa nyuŋ woruŋ. Ʋ yaraa hosi ba nyuŋ, ŋɩɩ leŋ ʋ ŋaa ʋ tɩndaaraa kʋ tuu cheiba kɩŋkɛŋ.

⁵⁰ Ʋ baaŋ-la fa bɩ fɩɛla, ʋ bɩra bɩ leŋe nɩalɩŋ kɛŋ mɩɩsɩŋ ma, ama ʋ leŋe nyanyal-bɔŋ nɛ kpʋba.

⁵¹ Wɩa fa kpʋ Ijipiti tɩŋŋaa bii-bumbumba kala sɩ ŋaa hambolibiisiŋ nɛ Ijipiti tinteeŋ kala lɛ, ba bapʋɔsɛ biiriŋ, baal kʋbala ba sɩɩ yɩrɛ Ham lɛŋŋɛɛ lɛ.

⁵² Ŋɩɩ nɛ ʋ kɛŋ ʋ nɩaa lɩɩ a nagɛ pie-laalɩŋ, a kɛmba kaa to tintee-hɩlɩŋ a mʋ.

⁵³ Ʋ fa beŋ ba nyuŋ nɛ woruŋ, fawʋllʋŋ bɩ ba kɛnɛ, ama aŋ leŋ mʋga sii kʋ tɔ ba dʋndɔŋŋɔɔ-na kala lɛ.

⁵⁴ Ŋɩɩ nɛ Wɩa kɛmba kaa mʋ tintee-la sɩ bɩ disiniŋ kɛnɛ, a kɛmba kaa mʋ ʋ tɩtɩa sɩ yuo laa tintee-la peelee sɩ gollo chu.

⁵⁵ Ʋ nɩaa sɩ kɔ, ʋ kiri tinteye-la nɩaa fa sɩ hɔŋ nɩmɛ ta, aŋ kɛŋ ba tinteeŋ kpaa a pɩ Iziral tɩŋŋaa ba doho doho. Ʋ ŋaa ba kʋŋ, ba hɔŋ nɩmɛ.

⁵⁶ Ama nɩalɩŋ fa ha magɩsɛ Wɩa nɛ, a vɩa Wɩa sɩ kɩɩ kʋŋkala, a bɩ wɩalɩŋ ʋ sɩ daga ka to.

⁵⁷ Ba lɩɩ ʋ harɩŋ a nagɛ ba naabalɩmaba fa sɩ ŋaa ŋɩɩ nɛ. Ba fa golibo nɛ a nagɛ toŋ sɩ golibo, ŋ bɩ ŋ yɩɛlaa wuo joŋo hɛ ba lɛ.

⁵⁸ Ba kɛŋ ba vesiŋ dɩ-kpaarɩŋ ŋaa Wɩa na baanɩŋ, ba vʋɩya-la kpaarɩŋ ŋaa ʋ yaraa bibieri.

⁵⁹ Wɩa fa sɩ na wɩalɩŋ, ʋ baanɩŋ faasa sii ʋ chaasa vɩa ʋ nɩaa Iziral tɩŋŋaa ta.

⁶⁰ Ŋɩɩ nɛ ʋ vɩa ʋ dɩa-la ma sɩ hɛ Sɩlɔ lɛ ta, lee-la ʋ sɩ yie hɛ a guoli nɩaa tʋɔŋ.

⁶¹ Ʋ leŋe ba yuo laa ʋ-na Wɩa niiriŋ daga-la sɩ ŋaa ʋ doluŋ a kaa viiri, ʋ joŋ ʋ tʋla a hɛ ba dʋndɔŋŋɔɔ nɩsɩŋ lɛ.

⁶² Ʋ leŋ ba kpʋ ʋ nɩaa laalɩŋ lɛ ʋ fa chaasa na baanɩŋ nɛ ʋ nɩtɩɩlaa nyuŋ.

⁶³ Bapʋɔsɩ-biisiŋ kala nɛ ba fa kpʋ laalɩŋ lɛ, aŋ ka hatoloo bɩ baalaa na dɩ ba jaa.

⁶⁴ Ba kpʋ ba Wɩɩsʋllɩ sɩpaalaaraa kala, aŋ pɔ dɩ ba yo-haalaa sɩ́ yel.

⁶⁵ Ʋ ŋɩɩ harɩŋ lɛ nɛ, La Tɩɩna sii a nagɛ nɩa sɩ pɩŋ doŋ a hirige sii, a nagɛ bapʋɔsɩ-duoŋ sɩ nyʋa sɩnɩŋ bugi ʋ kɛnʋ tɩtɩŋ.

⁶⁶ Ʋ kiri ʋ dʋndɔŋŋɔɔ hɛ pɛgɛ lɛ, a leŋ ba dii hɩɩsɩŋ a kaa mʋ wuu.

⁶⁷ Ŋɩɩ nɛ aŋ ka La Tɩɩna vɩa Josɛf doho nɩaa ta, ʋ bɩ Efirem doho nɩaa ma lɩɩsa.

⁶⁸ Ʋ mɩɩra lɩɩsɛ Juda doho nɩaa nɛ, peel-la ba sɩɩ yɩrɛ Zaayɔŋ, lee-la ʋ sɩ cho.

⁶⁹ Nɩmɛ nɛ ʋ saa ʋ dɩa, ʋ leŋie nagɛ wɩa-nyuŋ, ʋ leŋ ʋ chɩŋ kpaŋkpaŋ, a nagɛ tinteeŋ sɩ chɩŋ ŋɩɩ kpaŋkpaŋ a kaa mʋ wuu.

⁷⁰ Ʋ lɩɩsɛ ʋ tɩntɩnna Devit, ʋ fa lɩɩsʋ piesee harɩŋ nɛ,

⁷¹ Ŋɩɩ nɛ ʋ kɛnʋ kɔ ʋ ŋaa ʋ tɩtɩa nɩaa Iziral tɩŋŋaa kuoro, a beŋ ba nyuŋ, arɩ pie-daara sɩ yie beŋ piesee nyuŋ ŋɩɩ.

⁷² Devit fa beŋ ba nyuŋ arɩ tʋɔ-bala nɛ, a pɔba woruŋ arɩ wʋjɩmɩŋ.