WƖA YƖƖLAA 76 - WƖA TENIŊ

Yɩɩl-la Asaf sɩ yɩɩ pɩ gɔgʋ-hɩaŋ.

¹ Juda nɩaa jɩŋ Wɩa nɛ woruŋ, ʋ yɩrɩŋ yʋga Iziral tinteeŋ lɛ.

² Ʋ dɩa hɛ Jerusalɛm lɛ nɛ, ʋ dɩjʋʋlʋŋ hɛ peel-la ba sɩɩ yɩrɛ Zaayɔŋ lɛ.

³ Nɩmɛ nɛ ʋ bori ʋ dʋndɔŋŋɔɔ to-hɛŋŋɛɛ, hɔɔtaalɩ-la laalɩyuoroo sɩ kaa kɛrɛɛ laa bayuori hɛŋŋɛɛ, ba tokobiee arɩ kɩalɩŋ kala ba sɩ kaa yuo laalɩŋ.

⁴ Wɩa, ŋ tʋla yʋga nɛ a chaanɛ, ŋ sɩ jɩl peel-la nyuŋ a yuo dii ŋ dʋndɔŋŋɔɔ, ŋ genne nɛ a mɩɩraa kɔ.

⁵ Ba laalɩyuori babiibalaa sɩ yuo laa kɩalɩŋ, ba kala nɛ ba kaa laa. Ka ba lɛɛlɛ pɩŋ a nagɛ ba sʋba, laalɩyuori babiibala-la kʋbala ma bɩ ʋ nandaa wuo kaa je.

⁶ Jekɔb Wɩa, ŋ sɩ kpɩa ba lɛ, ba janɩŋ arɩ ba ja-jɩllaa kala tele sʋʋ nɛ.

⁷ Ŋ dʋndʋŋa nɛ maga dɩ nʋʋkala fá. Nʋʋkala bɩ ŋ sɩpaaŋ wuo chɩŋ, dɩ ŋ nɛ na baanɩŋ.

⁸ Ŋ hɛ ŋ jaŋ lɛ nɛ, aŋ bʋl arɩ ŋ jaŋ dii nɩaa sarɩya, fawʋllʋŋ kɛŋ dʋnɩa nɩaa nɛ ba ŋaa fʋɩɩ,

⁹ bʋa-la lɛ ŋ-na Wɩa, sɩ sii chɩŋ dɩ ŋ dii nɩaa sarɩya, a laa nɩalɩŋ ba sɩɩ dɔgɩsʋ dʋnɩa lɛ ta.

¹⁰ Dɩ nɩaa nɛ na baanɩŋ, ŋɩɩ nɛ yie leŋ ŋ yɩrɩŋ faasa yɩrɛ. Nɩalɩŋ sɩ ka a bɩ sʋba nɛ jaŋ gbigbieli ŋ gbiele.

¹¹ Má hɛ niiriŋ a pɩ La Tɩɩna ma Wɩa, aŋ lɩɩsɛ niiri-la. Má leŋ dɩ tinteye-la nɩaa kala sɩ hɔnɔ gollima kɛŋ kɩaa kʋ ŋaa zile pɩ Nɩɩ-la sɩ maga dɩ ba fá.

¹² Ʋ nɛ chei sɩpaalaaraa kala bɔɩ-duo wɩaa, a leŋ tinteeŋ kuoroo kala fɩfáʋ.