WƖA YƖƖLAA 74 - WƖA TENIŊ

Yɩɩl-la Asaf sɩ yɩa.

¹ Wɩa, bɛɛ nɛ tɩɩ ŋ vɩala ta ŋ-la? Ŋ jaŋ na baanɩŋ ŋ nɩaa nyuŋ deeŋ deeŋ?

² Liisi nɩalɩŋ ŋ sɩ laa ta faafaa kala wɩaa, ba nɛ doho-la nɩaa ŋ sɩ lɩɩsa ba ŋaa ŋ nɩaa, ŋ laaba ta. Bɩɩnɛ Zaayɔŋ peeliŋ wɩaa, lee-la ŋ fa sɩ hɛ.

³ Mʋ jikpeeni-la na, la dʋndɔŋŋɔɔ chei kɩalɩŋ kala sɩ hɛ ŋ dɩɩ-bal-la lɛ nɛ.

⁴ Ŋ dʋndɔŋŋɔɔ chiese nɛ a jʋʋ ŋ dɩɩ-bal-la lɛ ŋ sɩ yie kɔ la teeŋ. Ba joŋ ba jɔnjɔmba pɛ nɩmɛ nɛ aa dagɛ arɩ ba yuo dii lee-la nɛ.

⁵ Ba wʋŋaalaa nagɛ nɩaa sɩ kɛŋ saasɩŋ jʋʋ duuŋ tʋɔŋ a keri tɩɩsɩŋ lulo nɛ.

⁶ Ba kɛŋ saasɩŋ arɩ hamaba a ŋmoo daasɩ-la kala ba sɩ kaa kɩɛla tɔ dɩa-la tʋɔŋ jeeŋ a chei nɛ.

⁷ Ba nyɩgɛ ŋ dɩɩ-bal-la nɛ, aŋ ŋaa lee-la ba sɩɩ chʋɔlʋŋ kɛŋ disiniŋ.

⁸ Ba tʋɔŋ lɛ ba sɩ, “La jaŋ yuo diiba gbelem gbelem.” Ba nyɩgɛ lere-la kala la sɩ hilimee dɛnnɛ Wɩa la tinteeŋ kala lɛ nɛ.

⁹ La bɩra bɩ wʋmagɩl kala na, Wɩa wʋlaabʋllaa ma tuo. La kʋŋkala bɩ jɩŋ ŋɩɩ wɩɩŋ deeŋ sɩ jaŋ diene magɛ.

¹⁰ Wɩa, ɛɛ nɛ ŋ dʋndɔŋŋɔɔ jaŋ mɔmʋŋ a diene magɛ? Ba jaŋ tʋʋsɛ ŋ joŋŋoo deeŋ deeŋ koo?

¹¹ Bɛɛ nɛ tɩɩ ŋ vɩa dɩ ŋ pɛ la lɛ, aŋ kɛŋ ŋ nɩsɩŋ gɩrɛ, ŋ naduo-la? Kaa lɩɩsɛ gɛrɩŋ bʋbʋɔŋ a cheiba.

¹² Wɩa, dɩ-suomuŋ kala nɛ ŋ ŋaa la kuoro. Ŋ nɛ laa tinteeŋ nɩaa kala ta.

¹³ Ŋ doluŋ nɛ kɛŋ mʋgʋ-balɩŋ a pɔɩ balɩa, aŋ yɛrɛ peribanyeŋŋu-la sɩ hɛ lɩɩ-la tʋɔŋ nyusuŋ.

¹⁴ Ŋ nɛ yɛrɛ peribanyeŋŋu-la nyusuŋ, a joŋ ʋ nammɩa pɩ baga kɩaa sɩ hɛ tintee-hɩlɩŋ lɛ ba dii.

¹⁵ Ŋ nɛ leŋe lɩɩ-bul-sɩaa bubul, fuonuŋ pɩpɛllɛ. Ŋ nɛ bɩra leŋe fuo-bala-la ma sɩɩ pɛllʋ bʋa na-kala hʋ.

¹⁶ Ŋ nɛ tɩɩ wɩɩhɛyɛ, ŋ nɛ tɩɩ tɩtaŋɩŋ ma. Ŋ nɛ ŋaa wɩɩpɔsʋŋ arɩ chɛnɛ, ba chɩŋ ba dɩchɩnaa kpaŋkpaŋ.

¹⁷ Ŋ nɛ ŋaa tintee kala kɛŋ ʋ bʋa dʋnɩa lɛ. Ŋ nɛ ŋaa yibiiniŋ arɩ tafaaŋ ma.

¹⁸ La Tɩɩna, liisi ŋɩɩ ŋ dʋndɔŋŋɔɔ sɩ mɔmʋŋ, arɩ ŋɩɩ nɩyaara-la sɩ tʋʋsɛ ŋ joŋŋoo.

¹⁹ Sɩ́ ŋ nɩalɩŋ sɩ bɩ ba tɩtɩa lɛ wuo pɛ leŋe pɩ ba dʋndɔŋŋɔɔ. Sɩ́ ŋ nɩalɩŋ ba sɩ to naasɩŋ dʋdɔgɩsɛ wɩaa yʋ.

²⁰ Liise yi nii-la sɩ hɛ la pɛgɛ. Nɩbɔmɔ-la sɩ cho yuosuŋ faa birimiŋ tʋɔŋ dʋnɩa loŋgoru kala lɛ nɛ.

²¹ Sɩ́ leŋe dɩ nɩalɩŋ ba sɩ nyaga bil dii hɩɩsɩŋ a mɩɩrɛ ŋ harɩŋ. Ama pɛ summo-la arɩ nɩalɩŋ sɩ bɩ ba tɩtɩa lɛ wuo pɛ lɛ dɩ ba dɛnnɩŋ.

²² Wɩa, sii chɩŋ a bʋla laa ŋ tɩtɩa. Liisi ŋɩɩ nɩyaara-la sɩɩ mɔŋ ŋ lɛ tapʋlɩɩ kala.

²³ Sɩ́ goŋ-la ŋ dʋndɔŋŋɔɔ sɩɩ ŋaa wɩaa yʋ, goŋ-la ba sɩ na baanɩŋ a kpɩkpɩa deeŋ deeŋ.