WƖA YƖƖLAA 73 - WƖA TENIŊ

Yɩɩl-la Asaf sɩ yɩa.

¹ Wʋtɩtɩɩ, Wɩa chaasa kɛŋ Iziral tɩŋŋaa woruŋ nɛ, nɩalɩŋ sɩ kɛŋ tʋɔpʋla.

² Ama mɩ fa ka mʋa dɩ mɩ joŋ mɩ yɩɛlaa ta, mɩ Wɩa laa diiniŋ fa ka mʋa dɩ ʋ lɛlɛ.

³ Mɩ yaraa faa bieri sɩɩ-duo tɩŋŋaa arɩ nɩbɔŋŋɔɔ lɛ nɛ, a tɩŋ wɩaa sɩ vɛŋ woruŋ aa pɩba.

⁴ Ba bɩ hɛɛŋ ka na, ba yaraa fɩɛla nɛ, ba kɛŋ doluŋ.

⁵ Wʋwalɩmaa bɩ baa jʋʋ a nagɛ ba sɩɩ jʋʋ nɩaa dɔnsʋŋ ŋɩɩ, nyanyalaa ma bɩ baa jʋʋ a nagɛ ba sɩɩ jʋʋ nɩaa dɔnsʋŋ ŋɩɩ.

⁶ Sɩɩ-duoŋ nagɛ banzɔlɔ nɛ ba joŋo hɛ baŋŋaa lɛ, yuosuŋ ma nagɛ gɛrɩŋ ba joŋo laalɛ.

⁷ Ba nɛrɛ chaarɛ sɩaa nɛ kpʋrɩ kpʋrɩ, ba tʋɔbɩɩnaa kala kʋbɔmɔ.

⁸ Baa sieri nɩaa lɛ nɛ a bʋbʋl wʋlɔrʋnʋŋ. Ba sɩɩ-duoŋ leŋ ba fufugisi dɩ ba nyagɛ nɩaa bil.

⁹ Ba bʋl wʋbɔŋŋɔɔ tɩtɩgɛ Wɩa lɛ nɛ, a bʋbʋl sɩɩ-duo wɩaa nɩaa lɛ dʋnɩa lee na-kala.

¹⁰ Ŋɩɩ nɛ leŋe Wɩa nɩaa ma mɩɩra mʋ ba teeŋ a laa wɩalɩŋ kala ba sɩ bʋla dii.

¹¹ Nɩbɔmɔ-la bʋla, “Ɛɛ nɛ Wɩa jaŋ wuo ŋaa a jɩŋ? Wɩa sɩ kɩɩ kʋŋkala kɛŋ wʋjɩmɩɩ nɛɛ?”

¹² Ŋɩɩ nɛ nɩbɔmɔ-la nagɛ, wɩɩkala bɩ ba lɛ ŋaa, ka ba dʋa ma pʋŋa pɩpɛ.

¹³ Dɩ mɩ tʋɔŋ nɛ pʋlla, ŋɩɩ ŋaa pɛɩ nɛ, dɩ mɩ vɩa wʋbɔŋŋɔɔ ŋaanɩŋ ma, ʋ ŋaa pɛɩ nɛ.

¹⁴ Chɛɛ-kala nɛ mɩɩ wɩɩlɛ, ba dʋdɔgɩsɛmɛ chʋchʋɔ-na kala.

¹⁵ Dɩ mɩ nɛ fa bʋl wʋdoho-la nɩbɔmɔ-la sɩ bʋla, mɩ fa jaŋ ŋaa wʋnyɩɛrʋ ŋ nɩaa teeŋ.

¹⁶ Mɩ faa walɩmɛ dɩ mɩ jɩŋ wɩaa deemba bʋbʋɔŋ nɛ, ama ŋɩɩ ŋaa wʋduo nɛ a pɩmɛ,

¹⁷ see bʋa-la lɛ mɩ sɩ jʋʋ ŋ-na Wɩa dɩɩ-balɩŋ nɛ, mɩ wuo jɩŋ wɩɩ-la sɩ jaŋ ŋaa nɩbɔŋŋɔɔ lɛ.

¹⁸ Ŋ leŋe ba chɩŋ lere-la ba sɩ jaŋ sɩɛra tel nɛ, ŋ ŋaa ba tele nyʋgʋsɛ.

¹⁹ Ba guu cheiba nɛ, ba dɩdɛrɩŋ chaasa lɔrɛ nɛ.

²⁰ Nɩbɔŋŋɔɔ nagɛ duosoo nɩa sɩ duoso a sii chʋchʋɔŋ a yʋ nɛ. La Tɩɩna, dɩ ŋ nɛ sie, ba jaŋ nyɩɩgɛ.

²¹ Wɩaa fa sɩɩ wɩɩmɛ, mɩ tʋɔŋ faasa chei nɛ,

²² mɩ fa yaara nɛ a bɩ wɩɩ jɩŋ. Mɩ fa nagɛ pʋna nɛ ŋ sɩpaaŋ.

²³ Ama ŋ bʋbʋɔŋ nɛ mɩ hɛ bʋa na-kala ŋ kɛmmɛ arɩ ŋ naduo-la.

²⁴ Wɩalɩŋ ŋ sɩ dagɛmɛ nɛ kɛmmɛ bil wombiiŋ lɛ, ʋ dɩdɛrɩŋ kala ŋ jaŋ laamɛ arɩ zile.

²⁵ Wɩa-jaŋ lɛ ŋ dʋndʋŋa nɛ mɩ kʋa, tinteeŋ ma lɛ, mɩ bɩ kʋŋkala ka chɛ, see ŋ dʋndʋŋ.

²⁶ Mɩ tʋɔbɩɩnaa arɩ mɩ yaraa kala jaŋ wuo pʋgʋmɛ, ama ŋ-na Wɩa nɛ mɩ doluŋ, Ŋ dʋndʋŋa nɛ mɩ chɩchɛ a kaa mʋ wuu.

²⁷ Nɩalɩŋ kala sɩ bɩŋ kpaga jaŋ lɛl, ŋ jaŋ chei nɩalɩŋ kala sɩ bɩŋ laa dii.

²⁸ Ama mɩ-na teeŋ ʋ ŋaa wʋzɔŋ nɛ dɩ mɩ kpagɛ Wɩa. La Tɩɩna Wɩɩjarɩbakɔ nɛ mɩ yuori. Mɩ jaŋ bʋl tɩntɩŋ-duoru-la ŋ sɩ tɩma wɩaa.