WƖA YƖƖLAA 72 - WƖA TENIŊ

Wɩɩsʋlʋŋ ba sɩ sʋla pɩ kuoro.

¹ Mɩ Wɩa, mɩɩ sʋlʋŋ, pɛ kuoro lɛ dɩ ʋ kɛŋ wʋtɩtɩɩ, pɛ kuoru-bie lɛ dɩ ʋ kɛŋ tʋɔpʋla a nagɩŋ,

² dɩ ʋ wuo beŋ ŋ nɩaa arɩ wʋtɩtɩɩ a wasa nyaŋ summoo.

³ Leŋ dɩ tintee-la nɩbalaa arɩ nɩbiisiŋ kala dʋa, dɩ tʋɔpʋla hɛ nɩmɛ.

⁴ Leŋ dɩ kuoro chɩŋ summoo harɩŋ kpaŋkpaŋ, a yuo laa nɩalɩŋ sɩ bɩ ba tɩtɩa lɛ wuo pɛ ta nɩalɩŋ sɩ nyagɛba bil nɩsɩŋ lɛ.

⁵ Leŋ dɩ ʋ hɛ nɩmɛ a kaa mʋ wuu, a nagɛ wɩɩpɔsʋŋ arɩ chɛnɛ sɩ hɛ nɩmɛ deeŋ deeŋ ŋɩɩ.

⁶ Leŋ dɩ kuoru-la nagɛ duonuŋ sɩ nɩɩ hɛ yaŋ sɩ bumo tɔsɛ lɛ, a nagɛ duonuŋ sɩ faasa nɩɩ a hɛ tinteeŋ lɛ.

⁷ Leŋ dɩ tʋɔpʋla hɛ nɩmɛ kuoro mɩɩsɩŋ bʋa kala lɛ, dɩ yarɩfɩɛlaa hɛ nɩmɛ deeŋ deeŋ a nagɛ chɛnɛ sɩ pɔsɔ chɩŋ.

⁸ Leŋ dɩ tintee-la ʋ sɩɩ beŋ jallɛ a chɩŋ mʋgʋ-balɩŋ sɛmɛ dɔŋɔ a mʋ yi sɛmɛ dɔŋɔ, a chɩŋ fuo-la ba sɩɩ yɩrɛ Yufireti lɛ, a mʋ yi tinteeŋ sɛmɛ na-kala.

⁹ Doho doho-la sɩ hɛ tintee-hɩlɩŋ lɛ jaŋ kpirimi kuoru-la sɩpaaŋ, dɩ ʋ dʋndɔŋŋɔɔ ma gbieni ʋ sɩpaaŋ.

¹⁰ Leŋ dɩ Taasɩs tinteeŋ kuoroo arɩ tinteye-la nɩaa lɩɩŋ sɩ gollo chu to ʋ niiŋ a tiŋ lampoo a pʋpʋ. Leŋ dɩ tasɩ-la ma ba sɩɩ yɩrɛ Sɛba arɩ Sɩɩba kɛŋ kɩaa kʋ dii zile kuoro lɛ.

¹¹ Leŋ dɩ kuoroo kala kpikpirimi ʋ sɩpaaŋ, dɩ tinteyee kala nɩaa tɩma pʋpʋ.

¹² Ʋ jaŋ laa nɩalɩŋ sɩ bɩ ba tɩtɩa lɛ wuo pɛ ta dɩ ba nɛ yele pʋ, nɩalɩŋ sɩ bɩ nɩaa kɛnɛ dɩ ba pɛ ba lɛ.

¹³ Kuoro ka fá puwuoloo arɩ nɩalɩŋ sɩ bɩ ba tɩtɩa lɛ wuo pɛ nenige nɛ, a laa nɩalɩŋ sɩ bɩ ba tɩtɩa lɛ wuo pɛ ta dɩ ba sɩ́ sʋʋ.

¹⁴ Ʋ jaŋ laaba ta nɩalɩŋ sɩ nyagɛba bil arɩ yuo-hɛɛrɛɛ nɩsɩŋ lɛ. Ʋ chaasa chɩl ba mɩɩsɩŋ wɩaa nɛ.

¹⁵ Leŋ dɩ kuoro mɩɩsɩŋ duomi. Leŋ dɩ ba kɛŋ sɛlɩmɛ lɩɩ Sɩɩba kʋʋ pʋ. Leŋ dɩ nɩaa sʋl Wɩa pʋpʋ bʋa na-kala, dɩ Wɩa pɩpɛ ʋ lɛ tapʋlɩɩ kala.

¹⁶ Leŋ dɩ kʋdiilee pʋrɩgɛ tintee-la kala lɛ, dɩ mɩaa su dundolluŋ nyuŋ. Leŋ dɩ kʋdiile-la pʋrɩgɛ a nagɛ Lɛbanɔŋ peel-la kɩaa. Leŋ dɩ mɩa-la chaasa bɩɩ woruŋ a nagɛ yaŋ.

¹⁷ Leŋ dɩ kuoro yɩrɩŋ yɩrɛ a kaa mʋ wuu, a nagɛ wɩɩpɔsʋŋ sɩ hɛ wɩa-nyuŋ. Leŋ dɩ tinteyee nɩaa kala to ʋ lɛ a na wʋzɔŋŋɔɔ, a kɛnʋ yɩyɩrɛ tʋɔtɔrɛ tɩɩna.

¹⁸ Má dɛnnɛ La Tɩɩna Wɩa, Iziral tɩŋŋaa Wɩa. Ʋ dʋndʋŋa nɛ ŋaa wʋmagɩlaa.

¹⁹ Má dɛnnɛ ʋ yɩrɩ-balɩŋ a kaa mʋ wuu, a leŋ dɩ ʋ tʋla su dʋnɩa kala. Amɩɩ, Amɩɩ.

²⁰ Jesi nanʋala Devit Wɩɩsʋlʋŋ dɩdɛrɩŋ nɛ ŋ-la.